काठमाडौं- कुवेत सरकारले आप्रवासी श्रमिकहरुको बसोबासका लागि १२ वटा नयाँ हाउजिङ कम्प्लेक्स निर्माण गरिरहेको जनाइएको छ । विशेषगरी आप्रवासी एकल पुरुषलाई लक्षित गरी सरकारले पारिवारिक आवास क्षेत्रभन्दा बाहिर तोकिएको स्थानमा कम्प्लेक्सहरु निर्माण गरेको जनाइएको छ । यो योजनाले आप्रवासी कामदारलाई नियमन गर्ने, सहरलाई व्यवस्थित गर्ने र सामाजिक सुरक्षाको अवस्थालाई बलियो बनाउने जनाइएको छ ।
यो योजनालाई आप्रवासी श्रमिकहरुको संख्या बढी भएका जलेब अल-शुयुख जस्ता क्षेत्रहरूमा केन्द्रित गरिएको त्यहाँका सञ्चारमाध्यमले रिपोर्ट गरेका छन् । यी स्थानहरुमा अविवाहित पुरुषहरुका लागि बनेका असुरक्षित र गैरकानुनी बासस्थानले स्वास्थ्य र सुरक्षा जोखिम बढाएको जनाइएको छ । सरकारको यो कदमले बारम्बार घट्दै आएका अपराधलगायतका घटनाको दिगो समाधान गर्ने विश्वास लिइएको छ । त्यहाँको सरकारी प्रतिवेदनका अनुसार नयाँ मोडलमा बनाइएको आवास कम्प्लेक्सहरू वातावरणीय दिगोपन, जनस्वास्थ्य र सेवा पूर्वाधारलाई प्राथमिकता दिने हिसाबले डिजाइन गरिएको छ । यस योजनाअन्तर्गत करिब दुई लाख ७५ हजार कामदारका लागि नयाँ छ वटा सहरहरु निर्माण गरिने छ । जसमध्ये चारवटा जहरा गभर्नरेटमा र दुई अहमदीमा रहेको जनाइएको छ । श्रमिकहरुको दैनिकीलाई बाक्लो जनसंख्या भएका स्थानहरुबाट टाढा लगेर व्यवस्थितरुपमा स्थानान्तरण गर्ने सरकारको रणनीति रहेको बुझिएको छ ।
कुवेतका नगरपालिकाहरुले यो योजनाअन्तर्गतको काम थालिसकेका छन् । गत अप्रिलमा सुभानमा ४० हजार वर्ग मिटरको कम्प्लेक्समा तीन हजार कामदार राख्ने क्षमताको काम सुरु भएको जनाइएको छ । अमघारा र अहमदी भन्ने स्थानमा अन्य कामहरु जारी रहेका छन् । उत्तरी पश्चिम शुएबा क्षेत्रको सात लाख ५० हजार वर्ग मिटरमा सबैभन्दा ठूलो परियोजना बनिरहेको छ । यो मेगा कम्प्लेक्समा करिब ५६ हजार कामदार अट्ने अपेक्षा गरिएको छ । यसबाहेक, शद्दादियाहमा तीनवटा नयाँ कम्प्लेक्स बनाइँदै छ । कूल क्षेत्रफल चार लाख ५० हजार वर्ग मिटरमा फैलिएको यो कम्प्लेक्समा ४२ हजार कामदार अटाउने अपेक्षा गरिएको छ । प्रत्येक कम्प्लेक्समा संगठित आवास एकाइहरूका लागि २० प्रतिशत, स्वास्थ्य सेवासहित अत्यावश्यक सेवाहरूका लागि पाँच प्रतिशत, बगैँचाका लागि १२ प्रतिशत, पूर्वाधारका लागि पाँच प्रतिशत, आन्तरिक सडक निर्माणका लागि ३६.३ प्रतिशत बजेट छुट्याइएको छ । कम्प्लेक्सहरूले आवास, व्यावसायिक गतिविधि, सेवा, खुला ठाउँ, पूर्वाधारहरू र आन्तरिक सडकलगायत सन्तुलित सहरका लागि आवश्यक पर्ने सबै पूर्वाधारहरु समेट्ने छ । यसले श्रमिकको स्वास्थ्य, सुरक्षा र जीवनको स्तरलाई प्राथमिकता राखेको जनााइएको छ । सरकारको यो कदमले श्रमिकहरु बसोवास गर्ने क्षेत्रमा हुने भीडभाड नियन्त्रण गर्दै उनीहरुको हित गर्ने भनिएको छ ।
यीबाहेक अल-हज्जाज सहरको पश्चिममा र अर्को सुभान (ब्लक ११) गरी दुई साइटहरु दिगोपनको मूल्यांकनको समीक्षापछि रद्द गरिएको जनाइएको छ । त्यहाँका अधिकारी तथा सहरीविज्ञहरुले यो परियोजना श्रमिकहरुका आवासको समाधानमात्र नभएर राष्ट्रिय स्थायित्वमाथिको लगानी भएको जनाएका छन् ।
