काठमाडौं– वैदेशिक रोजगार व्यवसायी संघ झापा स्थापनाको दोस्रो वर्षमा प्रवेश गरेको छ । गत वर्ष दर्ता भएर वैशाखमा नयाँ कार्यसमिति चयन गरेको संघले शुक्रबार झापाको बिर्तामोडमा कार्यक्रम गरी प्रथम स्थापना दिवस तथा साधारणसभा सम्पन्न गरेको छ । सोही कार्यक्रमबाट संघमा मनोनीत पदाधिकारी तथा सदस्य घोषणा गरिएको छ ।
साधारणसभामा संघका अध्यक्ष धनबहादुर पन्धाकले संस्थाको प्रतिवेदन प्रस्तुत गरेका थिए । उनले संस्थाको आफ्नै भवन, स्वास्थ्य बिमा, व्यावसायिक कर्जा, व्यवसायी राहत कोषलगायतका कार्यक्रम सञ्चालन गर्ने योजना रहेको बताए ।कार्यक्रममा प्रमुख अतिथिको रुपमा उपस्थित नेपाल वैदेशिक रोजगार व्यवसायी संघका तृतीय उपाध्यक्ष वैकुण्ठप्रसाद पौडेलले संघ व्यवसायीको हक हितमा लागिपरेको र कानुनी समस्या समाधानका लागि सरकारसँग निरन्तर लबिइङमा रहेको बताए ।
युरोपका लागि मागपत्र प्रमाणीकरण जतिसक्दो छिटो लागू गरिदिन सरकारसँग आग्रह गरिएको पनि उनले जानकारी दिए । साथै, सेवा शुल्क निर्धारण गर्न सरकारसँग निरन्तर छलफलमा लागिरहेको पनि उनले बताए । कार्यक्रममा संघका संस्थापकलाई कदरपत्रले सम्मान गरिएको थियो ।
