- संघका अध्यक्ष भुवनसिंह गुरुङले गरे चार सदस्यको मनोनयन
- मनोनीत हुनेमा मोहमद जबारदिन मियाँ, रबिन मेगाले मगर, शिवकुमार कार्की र सविताकुमारी सिंह
- संघको विधान–२०४९ को दफा १७ (१) अनुसार मनोनयन गरिएको जानकारी
- चैत अन्तिममा निर्वाचित कार्यसमितिले तीन महिनापछि पायो पूर्णता
काठमाडौं– नेपाल वैदेशिक रोजगार व्यवसायी संघको कार्यसमितिमा चार जना सदस्य मनोनीत भएका छन् । संघका अध्यक्ष भुवनसिंह गुरुङले बुधबार विधानबमोजिम मनोनयन गर्न बाँकी चार सदस्य पदमा उनीहरुलाई मनोनीत गरेका हुन् ।
मनोनीत हुनेमा अल जाफर इन्टरनेसनल प्रालिका सञ्चालक मोहमद जबारदिन मियाँ, भर्षा म्यानपावर प्रालिका सञ्चालक रबिन मेगाले मगर, रेडियण्ट ओभरसिज प्रालिका सञ्चालक शिवकुमार कार्की र रोज ह्युमन रिसोर्सेस प्रालिकी सञ्चालक सविताकुमारी सिंह रहेका छन् ।
संघको विधान–२०४९ को दफा १७ (१) मा रहेको व्यवस्थाबमोजिम उक्त मनोनयन गरिएको हो । संघको २१ सदस्यीय कार्यसमितिमध्ये १७ जना निर्वाचन प्रक्रियाबाट निर्वाचित गर्ने र बाँकी चार जना सदस्य अध्यक्षले मनोनीत गर्ने व्यवस्था उक्त दफामा रहेको संघले जानकारी दिएको छ ।
संघको गत चैत २९ मा सम्पन्न ३१औं साधारणसभाबाट गुरुङको नेतृत्वमा नयाँ कार्यसमिति निर्वाचित भएको थियो । तीन महिनापछि रिक्त सदस्य मनोनीत गरिएको हो । यससँगै संघको कार्यसमितिले पूर्णता पाएको छ । वैदेशिक रोजगार व्यवसायीहरुको छाता संगठन यस संघले व्यवसायीहरुको अधिकार र वैदेशिक रोजगार व्यवसायलाई मर्यादित बनाउन भूमिका खेल्दै आएको छ ।
००००
