- कूल ९९ हजार ११८ आप्रवासी श्रमिकमध्ये १९ हजार २०७ जना नेपाली
- अधिकांश व्यक्तिगत श्रम स्वीकृति लिएर क्रोएसिया गएको तथ्यांक
- क्रोएसियामा रोजगारीका लागि जाने संख्या बर्सेनि बढ्दै
काठमाडौं– क्रोएसियामा आप्रवासी श्रमिकको रुपमा सबैभन्दा धेरै नेपाली नागरिक कार्यरत रहेको पाइएको छ । त्यहाँको आन्तरिक मन्त्रालय (एमयुपी)को नयाँ तथ्यांकमा विभिन्न मुलुकका आप्रवासी श्रमिकहरुमध्ये सबैभन्दा बढी नेपाली नागरिक रहेका पाइएको हो ।
क्रोएसियामा हाल विदेशी कामदारको संख्या ९९ हजार ११८ रहेको जनाइएको छ । जसमध्ये सबैभन्दा धेरै १९ हजार २०७ जना नेपाली नागरिक छन् । दोस्रोमा बोस्निया र हर्जगोभिनाबाट १८ हजार ११७ र तेस्रोमा सर्बियाबाट १५ हजार २१४ जना श्रमिक त्यहाँ कार्यरत रहेका तथ्यांकमा उल्लेख छ । यी दुवै मुलुक क्रोएसियाका छिमेकी राष्ट्र हुन् । चौथोमा फिलिपिन्सका नौ हजार २८६ र पाँचौंमा भारतीय नागरिक नौ हजार ६० जना कार्यरत रहेको तथ्यांकमा देखिन्छ ।
त्यहाँ रहेका अधिकांश आप्रवासी श्रमिक पर्यटन र आतिथ्य क्षेत्रमा कार्यरत रहेको उल्लेख गरिएको छ । यस क्षेत्रमा ३५ हजार ५५८ विदेशी कामदारहरू छन् । पर्यटनपछि दोस्रो ठूलो रोजगारी त्यहाँको निर्माण क्षेत्रले सिर्जना गरेको छ । जहाँ २८ हजार ३५२ जना विदेशी श्रमिक कार्यरत छन् । त्यस्तै १२ हजार ४१६ जना श्रमिक विभिन्न औद्योगिक भूमिकाहरूमा काम गरिरहेका छन् । अन्य प्रमुख क्षेत्रहरूमध्ये जम्मा सात हजार ९० जना श्रमिक यातायात र सञ्चार र खुद्रा व्यवसायमा काम गर्छन् । जसमध्ये पाँच हजार ४५ जना विदेशी श्रमिक छन् ।
क्रोएसियामा सन् २०२५ को जनवरीदेखि जुनसम्मको छ महिनामा पहिलोपटक रोजगारीका लागि कूल ५५ हजार २० जनालाई कार्य अनुमतिपत्र जारी गरिएको थियो । यसका साथै थप ३१ हजार ५५७ अनुमतिपत्रहरू नवीकरण गरिएको र १२ हजार ५४१ अनुमतिपत्र मौसमी कामदारलाई प्रदान गरिएको मन्त्रालयले जनाएको छ । जसमध्ये अधिकांश श्रमिक पर्यटन र आतिथ्यता क्षेत्रमा छन् ।पर्यटन क्षेत्र विस्तार हुँदै गइरहेको र निर्माण उद्योग फस्टाउँदै गएकाले सन् २०२५ मा क्रोएसियाको आर्थिक अवस्थामा आप्रवासी श्रमिकले महत्वपूर्ण स्थान रहने जनाइएको छ ।
क्रोएसिया जाने नेपाली बर्सेनि बढ्दै
क्रोएसिया पछिल्लो समय नेपालीहरुको आकर्षक रोजगार गन्तव्य बन्दै गएको छ । अघिल्लो आर्थिक वर्ष २०८०/८१ मा नेपालबाट रोजगारीका लागि सबैभन्दा बढी श्रमिक लैजाने युरोपेली मुलुक बनेको थियो, क्रोएसिया । उक्त आवमा १५ हजार ३६५ जना रोजगारीका लागि क्रोएसिया गएका वैदेशिक रोजगार विभागको तथ्यांक छ ।
आव २०७६/७७ यता क्रोएसिया जानेको संख्या बर्सेनि बढेको पाइन्छ । त्यस वर्ष ६४६ जना व्यक्तिगत श्रम स्वीकृति लिएर क्रोएसिया गएका थिए । त्यसपछि आव २०७७/७८ मा एक हजार ९४, २०७८/७९ मा पाँच हजार ३४४ र २०७९/८० मा सात हजार ४११ जना उक्त मुलुक गएको तथ्यांक छ । त्यसअघिका वर्षमा वैधानिक माध्यमबाट १० जनाभन्दा कम श्रमिक रोजगारीका लागि क्रोएसिया गएको पाइन्छ । त्यसताका खाडी मुलुक र मलेसिया नै प्रमुख रोजगार गन्तव्य थिए ।
म्यानपावरबाट भने आव २०७८/७९ बाट उक्त मुलुक पठाउन थालिएको थियो । उक्त आवमा एक हजार ४३७ जना पहिलोपटक संस्थागत माध्यमबाट क्रोएसिया गएका थिए । अहिले पनि त्यहाँ जाने अधिकांश श्रमिक व्यक्तिगत श्रम स्वीकृतिमै जाने गरेका छन् । दक्षिण एसियाली मुलुकहरुबाट जानेका लागि खाडी मुलुकको तुलनामा आकर्षक तलब, विदेशी कामदारको बढ्दो माग, वैधानिक श्रम सम्झौता, कानुनी प्रक्रिया पूरा गरेपछि अन्य युरोपेली मुलुकमा प्रवेश गर्न सहज हुनेजस्ता कारणले क्रोएसिया जानेहरुको संख्या बर्सेनि बढ्दै गएको जानकारहरु बताउँछन् ।
-1752335779.jpg)
