काठमाडौं– इजरायल–इरान युद्धका कारण लगाइएको यात्रा प्रतिबन्ध फुकुवा भएसँगै इजरायलमा श्रमिक पठाउने प्रक्रिया पुनः सुरू गरिएको छ । मंगलबार परराष्ट्र मन्त्रालयले इजरायलमा पूर्ववत्रुपमा यात्रा गर्न सकिने सूचना जारी गरेसँगै दीर्घकालीन स्याहार केन्द्र (केयरगिभर)का लागि ६६ जनाको करार सम्झौता प्राप्त भएको व्रदेशिक रोजगार विभागले जानकारी दिएको छ । विभागले बुधवार सूचना जारी गर्दै ६६ जना उम्मेदवारको करार सम्झौता प्राप्त भएको जनाएको हो ।
विभागमा ४२ जना महिला २४ जना पुरुषको सम्झौता प्राप्त भएको छ । उक्त पत्रमा उम्मेदवारहरुले गरेको सम्झौता इजरायलको जनसंख्या र अध्यागमन प्राधिकरण (पिवा) र इजरायली दूतावासकोे कन्सुलर डिभिजनमा भिसाका लागि पठाइने विभागले जनाइएको छ । विभागले उम्मेदवारहरुलाई दुई समूहमा विभाजन गरी आवश्यक कागजातसहित विभागमा उपस्थित हुन भनेको छ ।
गत जेठ ३० गतेबाट इजरायल–इरान युद्ध सुरु हुँदा नेपालको परराष्ट्र मन्त्रालयले अत्यावश्यक कामबाहेकको अवस्थामा यी मुलुकमा जान रोक लगाएको थियो । त्यसयता केयर गिभरका लागि इजरायल जाने प्रक्रिया स्थगित भएको थियो । भिसा लागेर टिकेट तय भएका ३५ जना सहायक कामदार पनि यात्रा प्रतिबन्धका कारण रोकिएका थिए । १२ दिनसम्म चलेकोे युद्ध रोकिएपछि परराष्ट्रले मंगलबार प्रतिबन्ध फुकुवा गरेको हो ।
इजरायलका लागि २०८१ सालको असारमा खुलेको आवेदनबाट पहिलो चरणमा छानिएका ९१९ जनामध्ये हालसम्म ५४३ जना गइसकेका विभागले जनाएको छ । ३५ जनाको भिसा लागिसकेको छ भने ६६ जनाको करार सम्झौता बुधबार प्राप्त भएको हो ।
