काठमाडौं– वैदेशिक रोजगार व्यवसायी संघले आफ्नो ३३औं स्थापना दिवस मनाएको छ । सिफलस्थित कार्यालयमा मंगलबार शुभकामना आदानप्रदान गर्दै स्थापना दिवस मनाइएको हो । कार्यक्रममा संघका पदाधिकारी, पूर्वअध्यक्ष तथा व्यवसायीहरुको उपस्थिति रहेको थियो ।
कार्यक्रमलाई सम्बोधन गर्दै संघका अध्यक्ष भुवनसिंह गुरुङले वैदेशिक रोजगारबाट फर्किएकाहरु उद्यमी भएर आन्तरिक रोजगारीमा योगदान गरिरहेको बताए । उनले विगतका कुरामा अल्झिनेभन्दा पनि अब कसरी अघि बढ्नेतर्फ सोच्नुपर्ने बताए । ‘व्यवसायीहरुलाई सरकारले सेवा सुविधाको सुनिश्चितता गर्नुपर्छ । विगतमा के भयो ? के गर्यो भन्दा पनि अब संघलाई कसरी अगाडि बढाउने भन्ने सोच्नु आवश्यक छ,’ गुरुङले भने ।
उनले मलेसियालगायत कुनै पनि मुलुकको सिण्डिकेट मान्य नहुने र यसविरुद्ध जस्तोसुकै कदम चाल्न संघ तयार रहेको भन्दै ढुक्क भएर काम गर्न व्यवसायीलाई आग्रह गरे । आफूहरु निर्वाचित भएर आएपछि विभिन्न जिल्लामा समस्यामा परेका नागरिकलाई आर्थिक सहयोग गर्दै लोक कल्याणको काम गरेको गुरुङको भनाइ थियो ।
संघका पूर्वअध्यक्ष तिलक राणाभाटले ३३ वर्ष पूरा गर्दैगर्दा पनि वैदेशिक रोजगार व्यवसाय जोखिमपूर्ण र नभई नहुने व्यवसायका रुपमा रहेको बताए । यस व्यवसायले रेमिट्यान्सदेखि रोजगारीमा महŒवपूर्ण योगदान पु¥याएको उनको भनाइ थियो ।यस क्षेत्रमा पछिल्लो पुस्ताको पनि चासो रहेकाले व्यवसायलाई सम्मानित र जिम्मेवार बनाउनतर्फ ध्यान दिनुपर्ने राणाभाटको भनाइ थियो । ‘यो क्षेत्र व्यावसायिक भएको र दोस्रो पुस्ताले पनि यसमा रुचि राखेका छन्,’ उनले भने, ‘तर सामाजिक उत्तरदायित्वमा कमी आएको छ । व्यवसायीहरु सामाजिक कार्यमा प्रत्यक्ष सहभागी हुनुपर्ने आवश्यक रहेको छ ।’
संघले मंगलबार नै आफ्नो स्थापना दिवसको अवसर पारेर कीर्तिपुरस्थित भत्केपाटीमा रहेकोे ‘चिल्ड्रेन अफ द स्ट्रिट्स (कट्स)’मा रहेका चेपाङ समुदायलगायत अन्य बालिकाका लागि खाद्यान्न, स्यानिटरी प्याड र स्टेसनरी वितरण गरेको छ । संघले त्यहाँ रहेका ४१ जना बालिकाका लागि तीन महिनालाई पुग्नेगरी उक्त सामग्री वितरण गरेको जानकारी दिएको छ ।सहयोग सामग्री हस्तान्तरण गर्न संघको वर्तमान कार्यसमितिका साथै अन्य वैदेशिक रोजगार व्यवसायीसमेतको टोली पुगेको थियो । व्यवसायीहरुलाई कट्सका बालिकाहरुले स्वागत गरेका थिए । दैनिक उपभोग्य सामग्री दिएर सहयोग गरेकोमा उक्त संस्थाले संघलाई धन्यवाद दिएको छ ।
