काठमाडौं - सरकारले इजरायललगायत मुलुकमा लगाएको यात्रा प्रतिबन्ध खोलेको छ । परराष्ट्र मन्त्रालयले इजरायल–इरान युद्धका कारण उत्पन्न जोखिमलाई मध्यनजर गर्दै यसअघि लागू गरेको यात्रा प्रतिबन्ध हटाएको मंगलबार एक सूचनामार्फत जानकारी दिएको हो ।
इजरायल–इरानबीच युद्धविराम भई अवस्था सामान्य भएकोले ती मुलुकहरुमा त्यहाँको अध्यागमन कानुन पालना गरी पूर्ववत् यात्रा गर्न सकिने मन्त्रालयले जारी गरेको सूचनामा उल्लेख छ । परराष्ट्रले गत असार ४ गते ‘ट्राभल एड्भाइजरी’ जारी गर्दै इजरायल–इरान द्वन्द्वका कारण अत्यावश्यक अवस्थामाबाहेक यी देशहरुमा भ्रमण नगर्न भनेको थियो । यात्रा प्रतिबन्ध फुकुवा भएसँगै इजरायलमा रोजगारीका लागि श्रमिक पठाउने बाटो खुलेको छ । यात्रा प्रतिबन्धका कारण इजरायलको दीर्घकालीन स्याहार केन्द्र (केयरगिभर)का लागि जाने तयारीमा रहेकाहरु रोकिएका थिए ।
गत जेठ ३० गते सुरु भएको युद्ध १२ दिनपछि अन्त्य भएको थियो । युद्धविरामपछि इजरायलस्थित नेपाली दूतावासले गत असार १३ गते त्यहाँको अशान्त र भयपूर्ण स्थिति सामान्य भएको जनाएको थियो । त्यसपछि विभागले रोकिएर बसेका श्रमिकको माग र इजायलबाट पनि सबै ठीक छ भनेको अवस्थालाई मध्यनजर गर्दै उक्त एड्भाइजरी हटाउन मन्त्रालयलाई असार १५ गते पत्राचार गरेको विभागका महानिर्देशक कमलप्रसाद भट्टराईले जानकारी दिएका थिए ।
‘परराष्ट्र मन्त्रालयले एड्भाइजरी जारी गरेकाले ‘नो अब्जेक्सन’ दिनु भनेर हामीले आइतबार मन्त्रालयमा लेखेर पठाएका छौं । हामीले हाम्रोतर्फबाट श्रमिकको माग, नेपालमा भएका इजरायलका राजदूत र इजरायलमा हुनुहुने नेपाली राजदूतले पठाएको विषय चिठीमा उल्लेख गरेका छौं,’ उनले सोमबार प्रभावसँग भनेका थिए, ‘परराष्ट्रले नो अब्जेक्सन दिनेबित्तिकै नियमित सञ्चालन हुन्छ, त्यो काम ।’
इजरायल–हमास द्वन्द्वका कारण रोकिएको श्रमिक लैजाने प्रक्रिया गत वर्षको असारमा आवेदन आह्वान गरेसँगै पुनः सुरु भएको थियो । उक्त आवेदन दिएकामध्येबाट कूल ९१९ जना इजरायल जान छनोट भएका थिए । जसमध्ये ५४३ जना गइसकेका छन् । भिसा लागेका ३५ जनाको उडान गत जुन २१ तारिखका लागि तय भए पनि इरानसँगको पछिल्लो द्वन्द्वका कारण स्थगित भएको थियो । परराष्ट्रले यात्रा प्रतिबन्ध हटाएसँगै इजरायल रोजगारीमा पठाउने प्रक्रिया सुरु हुने विभागले बताएको छ ।
