काठमाडौ - श्रम, रोजगार तथा सामाजिक सुरक्षामन्त्री शरतसिंह भण्डारीले युवाहरुले देशभित्रै गर्न सक्छु भन्ने दृढ आत्मविश्वास जगाउनुपर्ने बताएका छन् ।सोमबार राष्ट्रिय युवा परिषद्द्वारा आयोजित युवा उद्यमशीलता प्रवद्र्धन सम्मेलनमा बोल्दै मन्त्री भण्डारीले ऊर्जावान् युवा देशको प्रमुख शक्तिस्रोतको रुपमा रहेको बताउँदै उनीहरुले स्वदेशमै उद्यमशीलता गर्नुपर्ने बताएका हुन् ।
मन्त्री भण्डारीले बाध्यात्मक वैदेशिक रोजगारलाई अगामी १० वर्षभित्र अन्त्य गर्नका लागि आन्तरिक रोजगार प्रवद्र्धन दशकको रुपमा कार्यक्रम घोषणा गरिएको बताए । ‘वैदेशिक रोजगार स्वेच्छिक हुनुपर्छ, बाध्यमात्मक हुनुहुँदैन । स्वेच्छाले जानेहरुलाई रोक्न सकिँदैन । तर, रोजगारी नपाएर बाध्यात्मक अवस्थामा वैदेशिक रोजगारमा जानेहरुलाई देशभित्रै रोजगारीको अवसर सिर्जना गर्न श्रम मन्त्रालय संरचना र नीति निर्माणसहित कार्य गरिरहेको छ,’ उनले भने ।
मन्त्री भण्डारीले रोजगारी सिर्जना गर्ने कार्य निजी क्षेत्रको भएको हुनाले उत्पादन र उत्पादकत्व बढे स्वतः रोजगारी सिर्जना हुने जिकिर गरे । संसारको जुनसुकै देशमा सरकारले सीमित संख्यामामात्रै रोजगारी सिर्जना गर्ने गरेको बताउँदै निजी क्षेत्रसँगको समन्वय, सहकार्य गरी रोजगारीका विभिन्न अवसरहरु सिर्जना गर्न सरकारले आवश्यक नीति नियम सुधार गरेर जानुपर्नेमा उनले जोड दिए ।
मन्त्री भण्डारीले देशभित्रै रहेका रोजगारीका सम्भवानाहरुलाई सही तरिकाले सदुपयोग गर्न नसक्नुृ गम्भीर चिन्ताको विषय भएको बताए । उनले थोरै पैसाका लागि विदेसिनुभन्दा स्वदेशमै स्वरोजगार गरेर बस्न सुझाव दिए । उनका अनुसार मुलुकमा केवल वैदेशिक रोजगारीमा जानेहरुको लर्कोमात्रै छैन, वैदेशिक रोजगारमा गएकाहरु सीप, ज्ञान, थोरै भए पनि पुँजी लिएर फर्केर आउनेहरुको संख्या पनि उत्तिकै छ ।
मन्त्री भण्डारीले नेपाली श्रमबजारमा प्रत्येक वर्ष पाँच लाख श्रमशक्ति आउने गरेको जिकिर गर्दै ती श्रमशक्तिको सीप र क्षमता अभिवृद्धि गर्नसके देशभित्रै रोजगारीको अवसरलाई सदुपयोग गर्न सकिने बताए ।
