काठमाडौं – इजरायलको अवस्था सामान्य भइसकेकाले परराष्ट्र मन्त्रालयले जारी गरेको ‘ट्राभल एड्भाइजरी’ (यात्रासम्बन्धी जानकारी) हटाउनासाथ श्रमिक लैजाने प्रक्रिया सुरु हुने वैदेशिक रोजगार विभागले जनाएको छ । परराष्ट्रले गत असार ४ गते ट्राभल एड्भाइजरी जारी गर्दै इजरायल–इरान द्वन्द्वका कारण अत्यावश्यक अवस्थामाबाहेक यी देशहरुमा भ्रमण नगर्न भनेको थियो । त्यसयता इजरायलको दीर्घकालीन स्याहार केन्द्र (केयरगिभर)का लागि जानेहरु रोकिएका छन् ।
गत जेठ ३० गते सुरु भएको युद्ध १२ दिनपछि अन्त्य भएको थियो । युद्धविरामपछि इजरायलस्थित नेपाली दूतावासले गत असार १३ गते त्यहाँको अशान्त र भयपूर्ण स्थिति सामान्य भएको जनाएको थियो । त्यसपछि विभागले रोकिएर बसेका श्रमिकको माग र इजायलबाट पनि सबै ठीक छ भनेको अवस्थालाई मध्यनजर गर्दै उक्त एड्भाइजरी हटाउन मन्त्रालयलाई असार १५ गते पत्राचार गरेको विभागका महानिर्देशक कमलप्रसाद भट्टराईले जानकारी दिए ।
‘परराष्ट्र मन्त्रालयले एड्भाइजरी जारी गरेकाले ‘नो अब्जेक्सन’ दिनु भनेर हामीले आइतबार मन्त्रालयमा लेखेर पठाएका छौं । हामीले हाम्रोतर्फबाट श्रमिकको माग, नेपालमा भएका इजरायलका राजदूत र इजरायलमा हुनुहुने नेपाली राजदूतले पठाएको विषय चिठीमा उल्लेख गरेका छौं,’ उनले भने, ‘परराष्ट्रले नो अब्जेक्सन दिनेबित्तिकै नियमित सञ्चालन हुन्छ, त्यो काम ।’
इजरायल–हमास द्वन्द्वका कारण रोकिएको श्रमिक लैजाने प्रक्रिया गत वर्षको असारमा आवेदन आह्वान गरेसँगै पुनः सुरु भएको थियो । उक्त आवेदन दिएकामध्येबाट कूल ९१९ जना इजरायल जान छनोट भएका थिए । जसमध्ये ५४३ जना गइसकेका छन् । भिसा लागेका ३५ जनाको उडान गत जुन २१ तारिखका लागि तय भए पनि इरानसँगको पछिल्लो द्वन्द्वका कारण स्थगित भएको थियो । अब भने परराष्ट्रले अनुमति दिनेबित्तिकै काम सुरु हुने विभागको भनाइ छ ।
