- एक हजार २६३ जनाले आवेदन दिएकामा ९० जना ‘सर्ट लिस्ट’मा
- कोही उम्मेदवारलाई आफू पनि ‘सर्ट लिस्ट’मा पर्नुपर्ने तर छुट भएको लागेमा प्रमाणसहित भोलि मंगलबार दिउँसो १२ बजेसम्म दाबी गर्न सकिने
- आवेदकलाई मूल्यांकन समितिले छनोटका लागि योग्य ठह¥याए उनीहरुको नाम पनि अन्तर्वार्ताका लागि समावेश गरिने
काठमाडौं– दक्षिण कोरियाको ‘रुट इण्डस्ट्री’का लागि आवेदन दिएकामध्ये ९० जना अन्तर्वार्ताका लागि छनोट भएका छन् । कोरियाले गत जेठमा खुलाएको ५० जनाको कोटाका लागि एक हजार २६३ जनाले आवेदन दिएका थिए । जसमध्ये ९० जना अन्तर्वार्ताका लागि छनोट भएको वैदेशिक रोजगार विभागअन्तर्गतको इपिएस कोरिया शाखाले जानकारी दिएको छ ।
‘रुट इण्डस्ट्री’को वेल्डिङ क्षेत्रका लागि संक्षिप्त सूचीमा छनोट भएका ९० जना नै पुरुष रहेका छन् । उत्पादनसँग सम्बन्धित यो क्षेत्रमा धातुसँग सम्बन्धित काम गर्नुपर्छ । विभिन्न उपकारण बनाउन चाहिने अत्यावश्यक पार्टपुर्जा बनाउन धातुलाई पगाल्ने र विभिन्न आकार दिने काम यस क्षेत्रमा गरिन्छ ।
आवेदकले पेस गरेको कागजातका आधारमा अंक प्रदान गरी संक्षिप्त सूची निकालिएको इपिएस शाखाद्वारा प्रकाशित सूचनामा जनाइएको छ । जसमा सबैभन्दा बढी अंक ६८ ल्याउने चार जना छन् । सबैभन्दा कम अंक ५३ ल्याउने १५ जना छन् । सूचीमा सबैभन्दा बढी आवेदकको ५५ अंक आएको शाखाले जनाएको छ ।
शाखाले अन्तर्वार्ताको स्थान र मितिबारे अर्को सूचनामार्फत जानकारी गराउने बताएको छ । यदि कोही उम्मेदवारलाई आफू पनि ‘सर्ट लिस्ट’मा पर्नुपर्ने तर छुट भएको लागेमा प्रमाणसहित भोलि असार १७ गते दिउँसो १२ बजेसम्म दाबी गर्न भनिएको छ । त्यस्ता आवेदकलाई मूल्यांकन समितिले छनोटका लागि योग्य ठह¥याए उनीहरुको नाम पनि संक्षिप्त सूचीमा समावेश गरिने जनाइएको छ ।
सूचनामा सक्कल प्रमाणपत्र नभए अन्तर्वार्तामा सहभागी हुन नपाइने जनाइएको छ । ‘संक्षिप्त सूचीमा परेका व्यक्तिहरुले अन्तर्वार्तामा उपस्थित हुँदा अनिवार्यरुपमा आफ्नो सक्कल नागरिकता, राहदानी, लब्धांक प्रमाणपत्र, मूल प्रमाणपत्र, चारित्रिक प्रमाणपत्रका साथै अनुभव, तालिमलगायत सम्पूर्ण कागजातको सक्कल कपी नै साथमा लिई अन्तर्वार्तामा उपस्थित हुनुपर्ने छ,’ सूचनामा भनिएको छ ।
अन्तर्वार्तापछि योग्यताक्रमका आधारमा ५० जना छनोट गरिने जनाइएको छ । पाँच जनालाई भने वैकल्पिक उम्मेदवारको रुपमा छनोट गरिने सूचनामा भनिएको छ । यदि ५० जनामध्ये कोही तालिममा अनुपस्थित भए वैकल्पिक उम्मेदवारको योग्यताक्रमको आधारमा तालिममा सहभागी गराइने उल्लेख छ । छनोट भएका उम्मेदवारलाई रुपन्देही जिल्लाको बुटवलस्थित कोरिया–नेपाल बहुप्राविधिक शिक्षालयमा १२० घण्टाको वेल्डिङ र १२० घण्टाको कोरियन भाषा तालिम दिइन्छ । तालिममा कम्तीमा पनि ८० प्रतिशत उपस्थित भएको र सो क्रममा लिइएको परीक्षामा ६० प्रतिशतभन्दा बढी अंक प्राप्त गर्नुपर्ने प्रावधान छ ।
उक्त तालिमका लागि लाग्ने शुल्क भने व्यक्ति स्वयंले व्यहोर्नुपर्ने भनिएको छ । आवासीय सेवा नलिए न्यूनतम ५५ हजार ५०० रुपैयाँ शुल्क र आवासीय सेवा लिनुपरे न्यूनतम ८८ हजार रुपैयाँ तिर्नुपर्ने जनाइएको छ । तालिममा सहभागी भएर रोस्टर सार्वजनिक भएपछि पनि रोजगारदाताको छनोटमा नपरेसम्म कोरिया जाने निश्चित भने नहुने भनिएको छ ।
नेपालीहरुको आकर्षक रोजगार गन्तव्यका रुपमा रहेको दक्षिण कोरियाले सन् २००८ देखि जिटुजीमार्फत नेपालीहरु लग्दै आएको छ । सन् २०२३ सम्म कृषि तथा पशुपालन, उत्पादनमूलक क्षेत्र र सिप बिल्डिङ (जहाज निर्माण)मा मात्र श्रमिकहरु लग्दै आएको थियो भने २०२४ बाट रुट इण्डस्ट्री, वन तथा सेवा क्षेत्रका लागि पनि नेपालीहरु लग्न थालेको हो । यस वर्षजस्तै अघिल्लो वर्ष पनि ‘रुट इण्डस्ट्री’का लागि ५० जना छनोट गरिएको थियो । यो क्षेत्रमा पनि नेपाल सरकार र कोरिया सरकारबीच भएको समझदारीपत्र अनुरुप इपिएस प्रणालीअन्तर्गत श्रमिक लग्ने गरिन्छ ।
