काठमाडौं – इजरायल–इरान युद्धका कारण इरानमा रहेका नेपालीलाई उद्धार गर्न भारतको सहयोग लिने भएको छ । परराष्ट्रमन्त्री डा. आरजु राणा देउवाले भारत सरकारको सहयोगमा उनीहरुको उद्धार गरिने बताइन् ।
इरानमा रहेका १६ जना नेपालीको उद्धारका निम्ति आफूले भारत सरकारसँग आग्रह गरेको जानकारी दिँदै उनले त्यसप्रति भारत सकारात्मक रहेको बताइन् । परराष्ट्रमन्त्री राणाले भनिन्, ‘इरानमा केही नेपाली हुनुहुन्छ । आफ्ना नागरिकको उद्धार गर्दा नेपालीको पनि उद्धारका निम्ति मैले भारत सरकारसँग आग्रह गरेकी छु । हामी भारतबाट सकारात्मक जवाफ आउनेमा विश्वस्त छौं ।’
सरकारको निर्देशनअनुसार भारतका लागि नेपालका राजदूत डा. शंकर शर्मा पनि इरानमा रहेका नेपालीको उद्धारका निम्ति भारत सरकारसँग निरन्तर सम्पर्क एवं समन्वयमा रहेको बताइएको छ । तेहरानस्थित भारतको दूतावासले आफ्ना नागरिकको उद्धार गर्दै छ । यस क्रममा उक्त दूतावासले नेपालीलाई पनि सम्पर्कमा आउन सूचना जारी गरेको छ ।
परराष्ट्र मन्त्रालयका प्रवक्ता लोकबहादुर पौडेल क्षेत्रीले इरानमा रहेका नेपालीको उद्धारका लागि त्यहाँस्थित भारतीय दूतवासका उपप्रमुखसँग सम्पर्क र समन्वय गरिरहेको बताए ।
