- इजरायलमा करिब पाँच हजार ५०० जना र इरानमा रहेका करिब १२ जना नेपाली रहेको तथ्यांक
- नेपाली दूतावासद्वारा २४सै घण्टा हटलाइन सेवा सञ्चालन
- स्थानीय सुरक्षा प्रोटोकलहरुको पालना गर्न, आफ्नो क्षेत्रका लागि जारी गरिएका अद्यावधिक सूचनाबारे जानकार रहन र अत्यावश्यक अवस्थामाबाहेक घरबाट बाहिर ननिस्कन आग्रह
काठमाडौं– इजरायल र इरानमा रहेका सबै नेपाली सुरक्षित रहेको परराष्ट्र मन्त्रालयले जनाएको छ । गत शुक्रबार इजरायलले इरानमा आक्रमण गरेयता त्यस क्षेत्रको स्थिति तनावपूर्ण बनेको छ । दुई मुलुकबीच तनावपूर्ण स्थिति सिर्जना भएपश्चात् त्यहाँ मिसाइल आक्रमणको शृंखला जारी छ ।
परराष्ट्र मन्त्रालयले आइतबार प्रेस विज्ञप्ति जारी गर्दै इजरायलमा रहेका करिब पाँच हजार ५०० जना र इरानमा रहेका करिब १२ जना नेपाली सुरक्षित रहेको जानकारी प्राप्त भएको जनाएको हो । सोही विज्ञप्तिमार्फत परराष्ट्रमन्त्री डा. आरजु राणा देउवाले दुई देशबीच गत शुक्रबारदेखि विकसित घटनाक्रमप्रति चासो व्यक्त गरेकी छन् । उनले नेपाली नागरिकको सुरक्षालाई उच्च प्राथमिकतामा राखेर काम गर्न सम्बन्धित देशमा रहेका नेपाली दूतावासहरुलाई निर्देशन दिएकी छन् ।
‘इजरायल र इरानबीच पछिल्ला तीन दिनदेखि विकसित घटनाक्रमका सन्दर्भमा माननीय परराष्ट्रमन्त्री डा. आरजु राणा देउवाले तेल अभिभ र दोहास्थित नेपाली राजदूतावासलाई टेलिफोन सम्पर्क गरी आफू प्रमाणित र सहप्रमाणित मुलुकमा रहेर नेपाली नागरिकहरुको सुरक्षालाई उच्च प्राथमिकतामा राखेर काम गर्न, नेपाली समुदायसँग निरन्तर सम्पर्कमा रहन र सम्बन्धित मुलुकले जारी गरेका सुरक्षा सतर्कतासम्बन्धी अद्यावधिक सूचना नियमितरुपमा प्रवाह गरी नेपालीलाई निरन्तर सुसूचित गर्नसमेत निर्देशन दिनुभएको छ,’ विज्ञप्तिमा भनिएको छ ।
मन्त्रालयले इजरायल र इरानबीच विकसित उक्त घटनाक्रमलाई नेपाल सरकारले नजिकबाट नियालिरहेको र त्यहाँ रहेका नेपालीहरुको हित सुनिश्चित गर्न आवश्यकताअनुसार उपयुक्त कदम चालिने जनाएको छ । साथै, इजरायल र इरानमा रहेका नेपाली नागरिकरुलाई अप्ठ्यारो परेको अवस्थामा सम्पर्क गर्ने फोन नम्बर र इमेल पनि सार्वजनिक गरिदिएको छ ।
हाल चलिरहेको इजरायल–इरान युद्धका दौरान इजरायलका विभिन्न स्थानहरूमा ठूलो जनधनको क्षति पुगेको स्थितिमा इजरायली होम फ्रन्ट कमाण्डद्वारा सर्वसाधारणका लागि लगातार अध्यावधिक निर्देशनहरु जारी भइरहेको तेल अभिभस्थित नेपाली दूतावसले जनाएको छ । दूतावासले नेपालीहरुको सहयोगका लागि २४सै घण्टा हटलाइन सेवा सञ्चालन हुने जनाएको छ ।
दूतावासका अनुसार हाल इजरायलमा अत्यावश्यकबाहेकका कार्यालय बन्द छन् । त्यहाँ रहेका नेपाली नागरिकलाई स्थानीय सुरक्षा प्रोटोकलहरुको पालना गर्न, आफ्नो क्षेत्रका लागि जारी गरिएका अद्यावधिक सूचनाबारे जानकार रहन र आफ्नो सुरक्षातर्फ विशेष ध्यान दिन आग्रह गरिएको छ । साथै, अत्यावश्यक अवस्थामाबाहेक घरबाट बाहिर ननिस्कनसमेत भनिएको छ ।
गत आर्थिक वर्षमा एक हजार पाँचजना युवाहरु वैदेशिक रोजगारीका लागि इजरायल गएका थिए । इरानमा भने गत आवमा वैधानिकरुपमा श्रम स्वीकृति लिएर नेपालीहरु गएको तथ्यांक छैन । दुई देशबीचको युद्धका कारण त्यहाँ रहेका नेपालीहरुको अवस्थाबारे चिन्ता बढेको छ । रोजगारीबाहेक अध्ययनलगायतका प्रयोजनका लागि नेपालीहरु इजरायल जाने गरेका छन् । तर इरान र इजरायलबीचको पछिल्लो स्थितिका कारण उनीहरुको विषयमा चासो र चिन्ता बढेको छ । इजरायलमा गत २०८० असोजमा हमासले गरेको आक्रमणमा १० जना नेपाली विद्यार्थीको ज्यान गएको थियो । इजरायलमा फसेका २८३ विद्यार्थीलाई सरकारले उद्धार गरेको थियो ।
शुक्रबार इजरायलले इरानमा ठूलो मात्रामा आक्रमण गरेको थियो जसमा शीर्ष सैन्य कमाण्डर, आणविक वैज्ञानिकहरू मारिएको र देशभरका सैन्य आधारहरू, आणविक स्थलहरू र आवासीय क्षेत्रहरूमा आक्रमण गरिएको अन्तर्राष्ट्रिय सञचारमाध्यमले जनाएका छन् । जवाफमा इरानले इजरायलमाथि घातक क्षेप्यास्त्र आक्रमण गरेको छ । निरन्तरको आक्रमणले त्यहाँ रहेका नेपालीहरु त्रासमा छन् ।
