काठमाडाैं - मोरङ अटोमोबाइल्स डिलर्स एशोसिएशन (MADA) को १६औं वार्षिक साधारण सभा शनिबार कोशी प्रदेशका आन्तरिक मामिला तथा कानुनमन्त्री रेवतीरमण भण्डारीको प्रमुख आतिथ्यतामा भव्य रूपमा सम्पन्न भएको छ।
कार्यक्रमको अध्यक्षता एशोसिएशनका अध्यक्ष सञ्जय कुमार श्रेष्ठले गरेका थिए ।साधारण सभामा विशिष्ट अतिथिका रूपमा नाडाका महासचिव सुरेन्द्र कुमार उप्रेती, नेपाल उद्योग परिसंघ (CNI) का उपाध्यक्ष भीम घिमिरे, आन्तरिक राजस्व कार्यालय विराटनगरका प्रमुख भूपालराज शाक्य, लगायत मोरङका अग्रणी उद्योगी व्यवसायीहरूको उल्लेखनीय सहभागिता रहेको थियो।
अध्यक्ष श्रेष्ठले एशोसिएशनको स्थापना सन् १९९७ (वि.सं. २०५४) मा भएको स्मरण गर्दै अटोमोबाइल व्यवसायीको हक–हित संरक्षण, व्यवसाय विस्तार, र नीति निर्माणमा सकारात्मक दबाब दिँदै आएको उल्लेख गरे । उनले चर्को बैंक ब्याजदर विरुद्ध पहिलोपटक सातै प्रदेशमा एकसाथ गरिएको ऐतिहासिक प्रदर्शन, नीतिगत त्रुटीहरूमा सरकारलाई बुझाइएको ज्ञापन, र VCTS प्रणालीमा सुधार र व्यावसायिक सहजता कायम गर्न एशोसिएशनले लिएको अग्रसरताबारे जानकारी दिए ।
अध्यक्ष श्रेष्ठले सरकारले अनिवार्य बनाएको MRP स्टिकर सम्बन्धी नीतिले साना व्यापारीहरूलाई थप जटिलतामा पार्ने भन्दै नीतिगत लचीलोपनको आवश्यकता औंल्याए । उनले विद्युतीय सवारी साधनको विकासलाई लक्षित गर्दै कर छुट, चार्जिङ स्टेसन विस्तार, सुलभ शुल्क संरचना जस्ता विषयमा सरकार गम्भीर हुनुपर्ने धारणा व्यक्त गरे ।
कार्यक्रममा भन्सार, कर र VCTS प्रणालीमा देखिएको समस्यालाई समन्वयमार्फत समाधान गरिने र भविष्यमा व्यवसायीक तालिम, कर प्रणालीको सहज जानकारी तथा समर्थनात्मक अभियानलाई निरन्तरता दिइने प्रतिबद्धता गरिएको थियो। सभामा एशोसिएशन स्थापनाकालका अग्रणी सदस्यहरू प्रेम खड्का र महेश भट्टराई, साथै ईमानदार ट्राफिक प्रहरी राम कुमार साह र कमला कार्कीलाई सम्मान पत्र र नगद पुरस्कार प्रदान गरिएको थियो।
यसैगरी भवन निर्माणको पहिलो चरणमा योगदान दिने नाडा, सिप्रदी ट्रेडिङ, STC Group का सुरेन्द्र उप्रेती, मोरङ उद्योग वाणिज्य संघका अनुपम राठी, र CNI उपाध्यक्ष भीम घिमिरेलाई विशेष सम्मान प्रदान गरिएको थियो। कार्यक्रममा नाडाका उपाध्यक्षदेखि ट्राफिक प्रहरी प्रमुख, पत्रकार महासंघ प्रतिनिधि, संघसंस्थाका प्रतिनिधिहरू, अटोमोबाइल्स व्यवसायी तथा व्यवसायिक क्षेत्रका सरोकारवाला व्यक्तिहरूको व्यापक उपस्थिति रहेको थियो। कार्यक्रमको सञ्चालन सचिव मनोज विक्रम शाहले गरेका थिए ।
मोरङ अटोमोबाइल्स डिलर्स एशोसिएशनको यो सभा केवल नियमित साधारण सभा नभई व्यवसायीक आवाज, सञ्जाल, र समन्वयको सशक्त उदाहरण बनेको छ।
