काठमाडाैं - आर्थिक वर्ष २०८२/८३ को बजेट वक्तव्यमा समेटिएका अव्यवहारिक कर नीतिहरूको खारेजीको माग गर्दै नेपाल सुनचाँदी रत्न तथा आभूषण महासंघ र नेपाल सुनचाँदी व्यवसायी महासंघका संयुक्त कार्यदलका पदाधिकारीहरूले सम्माननीय सभामुख देवराज घिमिरेसमक्ष शिष्टाचार भेट गरेका छन्।
आज असार १ गते काठमाडौंमा भएको उक्त भेटका क्रममा कार्यदलले हालको बजेटले सुनचाँदी व्यवसायमा नकारात्मक असर पार्ने नीति अपनाएको भन्दै गम्भीर आपत्ति जनाएका थिए। प्रतिनिधिसभाका सभामुख घिमिरेलाई ज्ञापनपत्र बुझाउँदै व्यवसायी महासंघले व्यवसायमै संकट उत्पन्न हुने खालका कर संरचना सच्याउनुपर्ने माग राखेका छन्।
व्यवसायीहरूको तर्फबाट प्रस्तुत ज्ञापनपत्रमा भनिएको छ, “हाल बजेटमार्फत प्रस्ताव गरिएका केही कर नीति र संरचनाहरू व्यावसायिक दृष्टिकोणले व्यवहारिक छैनन्। यस्ता नीतिले कारोबार संकुचन र अवैध व्यापारलाई प्रोत्साहन दिन सक्छ। तसर्थ, सम्बद्ध निकायले गम्भीरतापूर्वक पुनर्विचार गर्न आवश्यक छ।”
शिष्टाचार भेटमा महासंघका पदाधिकारीहरूले बजारको यथार्थ अवस्थाबारे सभामुखलाई अवगत गराउँदै नीतिगत संवाद र समाधानमुखी पहलको अपेक्षा पनि व्यक्त गरेका थिए। सभामुख घिमिरेले व्यवसायीको चासो र माग गम्भीर रूपमा संसदमा प्रस्तुत गरिने आश्वासन दिएका छन्।
