काठमााडौं - वैदेशिक रोजगार बोर्डले आर्थिक सहायताका लागि स्थानीय तहमार्फत निवेदन दिन अनुरोध गरेको छ । बोर्डले मंगलबार एक सूचना जारी गर्दै वैदेशिक रोजगार नियमावली, २०६४ को नियम २८ को उपनियम ७ बमोजिम आर्थिक सहायता पाउनका लागि स्थानीय तहमार्फत निवेदन दिन भनेको हो । बोर्डले दिँदै आएको कल्याणकारी कामअन्तर्गतका सेवा लिन कतिपय सेवाग्राही बोर्डमै पुग्ने गरेकाले स्थानीय तहमार्फत आवेदन दिन भनेको हो ।
बोर्ड सचिवालयबाट रोजगारीका क्रममा श्रमिकको मृत्यु र अंगभंग भए आर्थिक सहायता, कामदारको परिवारलाई घातक रोग लाग्दा पाइने उपचार खर्च, रोजगारीको सिलसिलामा श्रमिकको मृत्यु, अंगभंग वा गम्भीर बिरामी भए विद्यालयस्तरमा अध्ययनरत सन्ततिलाई छात्रवृत्तिलगायतका सेवाहरु पाउँदै आएका छन् । बोर्डले स्थानीय तहहरूलाई ‘फारेन इम्प्लोइमेन्ट वेलफेयर इन्फरमेसन म्यानेजमेन्ट सिस्टम’मा पहुँच दिइसकिएको हुँदा, बोर्डबाट प्रदान गरिने सम्पूर्ण कल्याणकारी सेवाहरूका लागि सोही प्रणालीमार्फत आवेदन पेस गर्न सम्बन्धित सरोकारवालालाई समेत अनुरोध गरेको छ ।
बोर्डले ७७ वटै जिल्लामा संचालनमा रहेका बहुआयामिक स्रोत केन्द्रहरुमा आवेदन आएको अवस्थामा पनि ती केन्द्रबाट आवश्यक सहजीकरण गरी सम्बन्धित स्थानीय तहमार्फत बोर्डको प्रणालीमा आवेदन प्रविष्टिको व्यवस्था मिलाउनु भनेको छ । यस्ता निवेदनलाई इमेलमार्फत नपठाउन सूचनामा भनिएको छ । बोर्डको उक्त सिस्टमको पहँुच पाउन बाँकी पालिकाहरुलाई बोर्डमा निवेदन दिनसमेत भनिएको छ ।
