- थाइल्याण्डस्थित नेपाली राजदूतावासले म्यानमारबाट उद्धार गरी तीन जना पुरुषलाई नेपाल पठाएको जानकारी
- सन् २०२५ यता अनलाइन स्क्यामिङमा लगाइएका २४ जना पुरुष र दुई जना महिलाको उद्धार
- कम्बोडिया, लाओस, म्यानमार र थाइल्याण्डमा लगेर अनलाइन स्क्यामिङ कार्यमा लगाउने गिरोह सक्रिय
- छिटो पैसा कमाउने प्रलोभनमा परी यी देशमा नआउन दूतावासको आग्रह
काठमाडौं– ‘अनलाइन स्क्यामिङ’ कार्यमा लगाइएका तीन जना नेपालीलाई म्यानमारबाट उद्धार गरी नेपाल फर्काइएको छ । थाइल्याण्डस्थित नेपाली राजदूतावासले थाइल्याण्ड सरकारको सहयोगमा तीन जना पुरुषलाई नेपाल फर्काइएको जनाएको छ । उनीहरुलाई म्यानमारको मेवाडीबाट उद्धार गरी थाइल्याण्डको बैंककहुँदै बुधबार काठमाडौं पठाइएको हो ।
दूतावासले सूचना जारी गर्दै तोकिएको मापदण्ड पूरा गरेर मात्र रोजगारीमा जानका लागि सचेत गराएको छ । साथै, आकर्षक तलबको प्रलोभनमा नपर्नसमेत आग्रह गरेको छ । ‘नेपाल सरकारले तोकेका मापदण्डबमोजिम श्रम स्वीकृति लिएर मात्र वैदेशिक रोजगारीमा जान तथा कसैको प्रलोभनमा परी छिटो पैसा कमाउने हेतुले कम्बोडिया, लाओस, म्यानमार र थाइल्याण्डलगायत देशमा नआउनका लागि राजदूतावास सबैमा अनुरोध गर्दछ,’ सूचनामा भनिएको छ ।
दूतावासले सन् २०२५ यता अनलाइन स्क्यामिङमा लगाइएका २४ जना पुरुष र दुई जना महिला गरी २६ जना नेपाली नागरिकलाई उद्धार गरेर स्वदेश पठाइएको जनाएको छ । यस अवधिमा अन्य मुलुक पठाइदिने नाममा अलपत्र पारिएकालाई पनि दूतावासले उद्धार गरी पठाइदिएको उल्लेख गरेको छ । गत माघ ४ गते लाओसको गोल्डेन ट्रांगलमा गैरकानुनी काममा लगाइएका एक जनाको उद्धार गरेको थियो ।
फागुन २३ गते आकर्षक रोजगारीको प्रलोभनमा पारी पलाउ भन्ने मुलुक पठाइदिने नाममा अलपत्र पारिएका २० जनालाई नेपाल फर्काइएको थियो । उनीहरुलाई बिचौलियाले भारतको दिल्लीहुँदै थाइल्याण्ड लगेर छोडेको भेटिएको थियो । क्यानडाको भिसा लगाइदिने भन्दै थाइल्याण्डमा छोडिएका पाँच जनाको गत चैत १५ गते दूतावासले उद्धार गरेको थियो । उनीहरुको राहदानी आफैंसँग लगेर बिचौलिया फरार भएको थियो । त्यस्तै, लामो समयदेखि अलपत्र पारिएका दुई जनाको गत जेठ ९ गते उद्धार गरिएको थियो ।
रोजगारीको प्रलोभन देखाएर नेपाली युवाहरुलाई अनलाइन स्क्यामिङ, अनलाइन जुवा, कल सेण्टर, क्रिप्टोकरेन्सी ठगीलगायतका काममा शंकास्पद आइटी कम्पनीहरुले लग्ने विगतदेखिको समस्या रोकिएको छैन । रोजगारीको प्रलोभन देखाएर विशेषगरी सामाजिक सञ्जालमार्फत विज्ञापन गर्ने गरेको दूतावासले जनाउँदै आएको छ । रोजगारीको खोजीमा रहेका युवाहरुलाई नेपाल सरकारले निषेध गरेका कार्यका लागि विशेषगरी थाइल्याण्ड, भियतनाम, लाओस, कम्बोडियालगायत मुलुकमा लगेर बन्दी बनाएर काम लगाउने गरेका घटना विगतमा पनि सार्वजनिक भइसकेका छन् । यस्ता निषेधित काममा रोजगारीमा नआउन दूतावासले पटक–पटक आग्रह गर्दै आएको छ ।
दूतावासका अनुसार नेपालीहरु पर्यटक भिजामा यी मुलुकमा पुग्ने गरेका छन् । वैदेशिक रोजगारीको प्रयोजनमा भिजिट भिसाको प्रयोग गर्दा समस्या निम्तिएको भन्दै यसप्रति सजग हुन दूतावासले आग्रह गर्दै आएको छ । उल्लिखित मुलुकहरुमा रोजगारीमा जानुअघि सम्बन्धित रोजगारदाता र कम्पनीको बारेमा जानकारी लिएर मात्र जान गत पुसमा परराष्ट्र मन्त्रालयलेसमेत सजग गराएको थियो । तर गैरकानुनी रुपमा थाइल्याण्ड जाने क्रम रोकिएको छैन ।
म्यानमार, लाओस, भियतनाम र कम्बोडिया अनलाइन स्क्यामिङका ठूलो धन्दा सञ्चालित मुलुकमध्येमा पर्छन् । भौगोलिकरुपमा यी सबै मुलकको बीचमा थाइल्याण्ड पर्छ । थाइल्याण्डको अर्थतन्त्रको प्रमुख स्रोतमध्येमा पर्यटन रहेको छ । पर्यटकको आवागमन बाक्लो हुने भएकाले छिमेकी मुलुकमा गैरकानुनी धन्दा चलाउँदै आएका गिरोह र सोझासाझा युवाहरुलाई रोजगारीको प्रलोभन देखाउने बिचौलियाले थाइल्याण्डलाई सुरक्षित सेल्टरको रुपमा प्रयोग गरेको पाइएको छ । यो ठगीको जालोलाई भत्काउन पछिल्लो समय थाई सरकारले चीन, संयुक्त राज्य अमेरिका र युरोपसँग अन्तर्राष्ट्रिय कानुनका विभिन्न पक्षमा काम गर्न थालेको जनाएको छ ।
