काठमाडौं – वैदेशिक रोजगारीमा जाने श्रमिकको स्वास्थ्य परीक्षण गर्दै आएका तीनवटा संस्था खारेजीमा परेका छन् । तोकिएको समयावधिभित्र नवीकरण नभएको भन्दै श्रम, रोजगार तथा सामाजिक सुरक्षा मन्त्रालयले ती संस्था खारेज गरेको हो ।
ललितपुरको नख्खुमा रहेको गोल्डेन गेट पोलिक्लिनिक तथा डाइबेटिज सेन्टर प्रालि, स्वयम्भूमा अवस्थित मनमोहन मेडिकल कलेज तथा शिक्षण अस्पताल र गोंगबुको रोज इन्टरनेसनल मेडिकल सर्भिसेज प्रालि खारेज गरिएको मन्त्रालयले जानकारी दिएको छ ।
मन्त्रालयमा सूचीकृत स्वास्थ्य संस्थाले वैदेशिक रोजगार नियमावली, २०६४ को नियम ४५(क) को उपनियम ८ तथा वैदेशिक रोजगारीमा जाने कामदारको स्वास्थ्य परीक्षण गर्ने स्वास्थ्य संस्था सूचीकरण, नवीकरण र अनुगमनसम्बन्धी कार्यविधि, २०७२ को दफा ४ को उपदफा १ बमोजिम सूचीकरण नवीकरण भएको मितिदेखि तेस्रो वर्षको पुस १ गतेदेखि पुस मसान्सम्म नवीकरण गरिसक्नुपर्ने प्रावधान छ । विशेष कारणबस नवीकरण गर्न नसकेमा कारण खुलाएर १५ दिनभित्र नवीकरणका निवेदन दिइसक्नुपर्छ ।
तोकिएको अवधिभित्र नवीकरण नगरेका गोल्डेन गेट र मनमोहन मेमोरियलले स्पष्टीकरण पेस गरे पनि चित्तबुझ्दो नभएको मन्त्रालयले जनाएको छ । रोज इन्टरनेसनल मेडिकलले भने स्पष्टीकरणसमेत नबुझाएको पाइएको छ ।
