- इपिएस कोरिया शाखाद्वारा तालिमका लागि आवेदन आह्वान
- १२० घण्टाको वेल्डिङ र १२० घण्टाको कोरियन भाषा तालिम दिइने
- १८ देखि ३९ वर्ष उमेर भएका व्यक्तिले आवेदन दिन सक्ने
- न्यूनतम १२ कक्षा उत्तीर्णले मात्र तालिममा आवेदन दिन सकिने
काठमाडौं– दक्षिण कोरियाले ‘रुट इण्डस्ट्री’को वेल्डिङ क्षेत्रमा नेपाली श्रमिक लैजाने भएको छ । वैदेशिक रोजगार विभागअन्तर्गतको इपिएस कोरिया शाखाले आइतबार तालिमका लागि आवेदन आह्वान गरेको छ । आवेदन फाराम आज सोमबारदेखि यही जेठ २३ गते शुक्रबारसम्म भर्न सकिने शाखाको सूचनामा उल्लेख छ । सूचनामा उल्लेख भएअनुसार तालिमपश्चात् छनोट भएका ५० जनाले रोजगारीका लागि कोरिया जाने अवसर पाउने छन् । आवेदनका अनलाइन फाराम भर्नुपर्ने जनाइएको छ ।
कोरियाले सन् २०२४ बाट नेपालीहरुलाई ‘रुट इण्डस्ट्री’मा लाग्न थालेको हो । उत्पादन क्षेत्रअन्तर्गत पर्ने यो क्षेत्रमा विशेषगरी धातुसँग सम्बन्धित काम गरिन्छ । त्यहाँ धातुलाई पगाल्ने र विभिन्न आकार दिने काम हुन्छ । विभिन्न उपकारण बनाउन चाहिने अत्यावश्यक पार्टपुर्जा ‘रुट इण्डस्ट्री’ले तयार गर्छ । उच्च तापक्रममा फलामसँग काम गर्नुपर्ने भएकाले उत्पादनक्षेत्रका अन्य कामको तुलनामा रुट इण्डस्ट्रीको कामलाई गाह्रो मानिन्छ ।
यस क्षेत्रमा पनि नेपाल सरकार र कोरियन सरकारबीच भएको समझदारीपत्रअनुरुप इपिएस प्रणालीमार्फत श्रमिक लग्ने गरिन्छ । सूचनामा जनाएअनुसार १८ वर्ष पूरा भइ ३९ वर्ष ननाघेका व्यक्तिले आवेदन दिन सक्ने छन् । आवेदकले न्यूनतम १२ कक्षा पास गरेको र नेपाल या कोरियामा कम्तीमा एक महिनाको व्यावसायिक तालिम लिएको हुनुपर्ने छ ।
कसरी गरिन्छ छनोट ?
आवेदकले पेस गरेको कागजातको मूल्यांकन गरी उनीहरुलाई अंक प्रदान गरिन्छ । प्रदान गरिएको अंकभारका आधारमा तालिमका लागि छनोट गरिने जनाइएको छ । उदाहरणका लागि आवेदकको शैक्षिक योग्यता स्नातक तह उत्तीर्ण भए ३० अंक दिइन्छ र १२ कक्षामात्र पास गरेको भए २० अंक दिइन्छ ।
त्यस्तै, कोरियन भाषामा टोपिक लेभल पाँच या सोभन्दा माथिल्लो तह पास गरेको भए ३० अंक, लेभल फोरलाई २४, लेभल थ्रीलाई १८, लेभल टुलाई १२ र लेभल वानलाई छ अंक दिइन्छ । यसरी अनुभव, व्यावसायिक तालिम, भाषा परीक्षाको किसिमलगायत पाँच वटा शीर्षकका आधारमा अंक प्रदान गरेर उत्कृष्ट ५० जनालाई छनोट गरेर ‘सर्ट लिस्ट’ निकालिन्छ । नाम निस्किएकाहरु पुलिस रिपोर्ट र स्वास्थ्य परीक्षणमा पनि उत्तीर्ण हुनुपर्ने हुन्छ । त्यसपछि उनीहरुको अन्तर्वार्ता लिइन्छ । अन्तर्वार्तामा कोरियन भाषाको दक्षता, सम्बन्धित क्षेत्रको सीप, आचरणजस्ता मापदण्डको मूल्यांकन गरिन्छ ।
यसपटक बढिमा ५० जना छनोट गर्ने र त्यसपछिको उत्कृष्ट अंक ल्याउने सात जना वैकल्पिक उम्मेदवारको रुपमा छनोट गर्ने जनाइएको छ । छनोट भएका उम्मेदवारलाई रुपन्देहीको बुटवल, तामनगरस्थित कोरिया–नेपाल बहुप्राविधिक शिक्षालयमा १२० घण्टाको वेल्डिङ र १२० घण्टाको कोरियन भाषा तालिम दिइने छ । तालिममा कम्तीमा पनि ८० प्रतिशत उपस्थित भएको र सो क्रममा लिइएको परीक्षामा ६० प्रतिशतभन्दा बढी अंक प्राप्त गर्नुपर्ने प्रावधान रहेको छ ।
उक्त तालिमका लागि लाग्ने शुल्क भने व्यक्ति स्वयंले व्यहोर्नुपर्ने भनिएको छ । आवासीय सेवा नलिए न्यूनतम ५५ हजार ५०० रुपैयाँ शुल्क र आवासीय सेवा लिनुपरे न्यूनतम ८८ हजार रुपैयाँ तिर्नुपर्ने जनाइएको छ । तालिममा सफल भएर रोस्टरमा नाम निस्किए पनि राजगारदाताको छनोटमा नपरेसम्म भने कोरिया जान पाउने सुनिश्चित नहुने इपिएस कोरिया शाखाले प्रस्ट पारेको छ ।
