- चालु आवको १० महिनामै गत आवकोभन्दा धेरैले लिए सेवा
- श्रमिकहरुले बोर्डबाट पाइने विभिन्न सेवासुविधाको विषयमा जानकारी पाउन थालेकाले सेवा लिनेको संख्या बढेको बोर्डको भनाइ
- बोर्डबाट श्रमिकका परिवारलाई औषधि उपचार खर्च, घातक रोग लागेमा उपचार खर्च उपलब्ध
- रोजगारीमा गएका श्रमिकको मृत्यु, अंगभंग भए या गम्भीर प्रकृतिको रोग लागे कामदारको छोराछोरीलाई विद्यालयस्तरमा दिइन्छ छात्रवृत्ति
काठमाडौं– वैदेशिक रोजगार बोर्डले उपलब्ध गराउँदै आएका विभिन्न सेवासुविधा लिनेको संख्या बढेको छ । चालु आर्थिक वर्ष २०८१/८२ को १० महिनामा वैदेशिक रोजगारीमा गएका श्रमिकका ३०३ परिवारले औषधि उपचार खर्च पाएका छन् । जबकि, अघिल्लो आव २०८०/८१ को १२ महिनामा यस्तो खर्च २६५ जनाले मात्र लिएका थिए ।
पछिल्लो १० महिनामा उपचार खर्चबापत एक करोड १५ लाख रुपैयाँभन्दा बढी रकम वितरण गरेको बोर्डले जानकारी दिएको छ । रोजगारीमा गएका श्रमिकको परिवारलाई घातक रोग लागेमा बोर्डले उपचार खर्च उपलब्ध गराउँदै आएको छ । यस अवधिमा सबैभन्दा बढी संयुक्त अरब इमिरेट्स (युएई) गएका श्रमिकका परिवारले खर्च लिएका छन् । युएई गएकामध्ये ६० जनाको परिवारले सहयोग लिएको तथ्यांक छ । गत वैशाख महिनामामात्रै रोजगारीमा गएका श्रमिकको परिवारका ४७ जनाले यस्तो खर्च लिएका छन् । गत चैतमा भने २८ जनाले सहयोग लिएका थिए ।
रोजगारीमा गएका श्रमिकको करार अवधि बाँकी छँदै परिवारका सदस्य बिरामी परेमा बोर्डले आर्थिक सहायता दिन्छ । यसका लागि बिरामीले आर्थिक समस्या परेको निवेदन दिनुपर्छ । वि.सं. २०७३ मा ‘पारिवारिक स्वास्थ्य उपचार मापदण्ड, २०७३’ बनेपछि श्रमिकका परिवारले यस्तो सेवा पाउँदै आएका छन् । बोर्डले पाँचवटा घातक रोग लागेमा बढीमा ५० हजार रुपैयाँसम्मको आर्थिक सहायता उपलब्ध गराउँछ । क्यान्सर, अल्जाइमर, मुटुको शल्यक्रिया, मिर्गौला प्रत्यारोपण र पार्किन्सनजस्ता गम्भीर रोग लागेमा बिरामीले उपचार खर्च पाउँछन् । यस्तो खर्च एकपटक मात्र पाइने बोर्डले जानएको छ ।
त्यसैगरी गत १० महिनामा १७८ जनाको उद्धार तथा खोजतलास गरिएको बोर्डले जनाएको छ । विभिन्न मुलुकमा आर्थिक अभावले स्वदेश फिर्ता हुन नसकेका, कानुनी सजाय पाएका, दुर्घटना वा बिरामी परेकालगायत कारणले अलपत्र परेका श्रमिकको खोजी गरी बोर्डले उद्धार गर्दै आएको छ । गएको वैशाखमा २१ जनाको र चैतमा २६ जनाको उद्धार गरेको थियो । गत आव २०८०/८१ मा १८६ जनाको उद्धार तथा खोज गरिएको थियो ।
अघिल्लो वर्षको तुलनामा शव झिकाउने र ढुवानी गर्नेको संख्यामा पनि वृद्धि भएको छ । चालु आवको १० महिनामै बोर्डले रोजगारीका क्रममा मृत्यु भएका ७५ जनाको शव झिकाएको तथ्यांक छ । जबकि, गत आवमा ३०८ जनाको शव स्वदेश झिकाएकोे थियो । त्यसैगरी चालुमा ८६३ जनाको शव मृतकको घरसम्म ढुवानी गरिदिएको बोर्डले जनाएको छ । अघिल्लो आवमा ७७५ जना शव ढुवानी गरिदिएको थियो । चालु आवको वैशाखमा ३६ शव झिकाएको थियो भने ५८ शव ढुवानी गरिदिएको थियो ।
पछिल्लो समय वैदेशिक रोजगारीमा गएका श्रमिकको बालबालिकाले छात्रवृत्ति लिने क्रम पनि बढेको छ । अघिल्लो आवमा दुई हजार २३३ जनालाई छात्रवृत्ति दिइएको थियो । चालु आवको १० महिनामा तीन हजार २४५ जनालाई सन्तति छात्रवृति दिइएको बोर्डले जनाएको छ । रोजगारीमा गएको श्रमिकको मृत्यु, अंगभंग भए या गम्भीर प्रकृतिको रोग लागे कामदारको छोराछोरीलाई विद्यालयस्तरमा छात्रवृत्ति दिइन्छ । गत वैशाखमा ४० जना र चैतमा ४६ जनाले छात्रवृत्ति पाएका थिए ।
अघिल्लो आर्थिक वर्षमा तीन हजार ३१ जनाले टेलिमेडिसिन सेवा लिएका थिए । चालु आवको प्रत्येक महिनाका औसतमा ४०० जनाले सेवा लिइरहेका बोर्डले जनाएको छ । वैशाख महिनामा ४२९ जनाले यो सुविधाको उपभोग गरेका थिए भने चैतमा ४४५ जनाले सेवा लिएका तथ्यांक छ । श्रमिकहरुले बोर्डबाट पाइने विभिन्न सेवासुविधाको विषयमा जानकारी पाउन थालेकाले सेवा लिनेको संख्या बढेको बोर्डका अधिकारी बताउँछन् ।
