घोराही - साहित्यकार स्मृति योगीको ‘अनुराग’ गजलसङ्ग्रहको आज घोराहीमा एक कार्यक्रमबीच विमोचन गरिएको छ । राप्ती साहित्य परिषद् जिल्ला शाखा दाङको आयोजनामा उक्त गजलसङ्ग्रह विमोचन गरिएको हो । राप्ती साहित्य परिषद् दाङका अध्यक्ष यम रेग्मी, साहित्यकार बुनु लामिछानेलगायतले उक्त गजलसङ्ग्रहको विमोचन गरेका हुन् ।
उक्त गजलसङ्ग्रहमा विभिन्न विषयसँगै गत चैत १५ गते काठमाडौँको तीनकुनेमा भएको हिंसात्मक प्रदर्शनमा आगजनीमा परेर मृत्यु भएका पत्रकार सुरेश रजकको विषयलाई समेत समेटिएको छ । साहित्यकार योगीको ‘अनुराग’ गजलसङ्ग्रहमा विभिन्न विषय समेटेर तयार पारिएका ८० गलज समावेश छन् । समाजमा भएका विभिन्न विभेद, सामाजिक, आर्थिक, विभिन्न विसङ्गतीलगाएत कुरालाई ‘अनुराग’मा समेट्ने प्रयास गरिएको छ ।
गजलसङ्ग्रह ‘अनुराग’को साहित्यकार सन्ध्या रेग्मी र छविलाल कोपिलाले समिक्षा गरेका थिए । उनीहरुले गजल बाचन गर्दै यसले समाजमा भए गरेका विभिन्न विषय उठान गरी समाज रुपान्तरणमा महत्वपूर्ण भूमिका खेलेको उल्लेख गरेका थिए । कार्यक्रममा ‘अनुराग’ गजलसङ्ग्रहका लेखक साहित्यकार स्मृति योगीले भने, “अनुरागमा मैले मेरा सपनाहरु समेटेकी छु । मेरा कल्पनाका चित्र कोरेकी छु, मेरो पीडाको मलम अनुरागमै छ । मेरो खुशीको कारण पनि यसमै छ ।”
आफैँले भोगका, देखेका, बालापनमा सहेका पीडा, अनुभव गरेका विभेदलगायत विषयलाई समेटे्ने प्रयास गरेको उनले बताए । घोराही उपमहानगरपालिका–१७ गुलरियाकी योगीको यो पहिलो कृति हो । उनले तुलसीपुर उपमहानगरपालिका–८ स्थित माध्यमिक विद्यालय अश्वारामा नेपाली सांकेतिक भाषा दोभाषे शिक्षकका रुपमा कार्यरत छन् । साहित्यकार योगी राप्ती बहिरा सङ्घ समेत आवद्ध छन् ।
-1752335779.jpg)
