काठमाडौं - श्रम, रोजगार तथा सामाजिक सुरक्षामन्त्री शरतसिंह भण्डारीले श्रम गर्न गएका नेपाली श्रमिकहरुलाई गन्तव्य मुलुकले दासको व्यवहार गर्न नपाउने बताएका छन् । मंगलबार श्रम, रोजगार तथा सामाजिक सुरक्षा मन्त्रालय, स्वीस सरकार र आइएलओको अन्तर्राष्ट्रिय तालिम केन्द्र (आइटिसी)द्वारा धुलिखेलमा आयोजित श्रम सम्झौताको विकास, सौदाबाजी र कार्यान्वयनसम्बन्धी आवासीय तालिमको उद्घाटन गर्दै श्रममन्त्री भण्डारीले वैदेशिक रोजगारीमा गएका नेपाली श्रमिकलाई गन्तव्य देशबाट सधैं सम्मानपूर्ण व्यवहारको अपेक्षा नेपालले राख्ने गरेको बताएका हुन् ।
‘आफ्नो देशमा श्रमशक्ति नभएपछि नेपालबाट श्रमिक लिएर जाने गरेको हो । नेपालबाट गएका श्रमिकले गन्तव्य देशको विकासमा ठूलो योगदान गरिरहेका छन् । यसलाई गन्तव्य देशहरुले पनि स्वीकादै आएका छन्,’ मन्त्री भण्डारीले भने । भण्डारीले गन्तव्य देशले श्रम गर्न गएका नेपाली श्रमिकहरुलाई त्यहाँका नागरिक सरह नै आधारभूत अधिकार पाउने हैसियत कायम गरिनुपर्ने बताए ।
‘त्यो देशको विकासमा योगदान गर्ने नेपाली श्रमिकलाई दाससरह व्यवहार गर्न पाइँदैन,’ उनले भने, ‘नेपाली श्रमिकले स्थानीय नागरिकसरह नै आधारभूत अधिकार पाउने हैसियत राख्दछन् । सम्मानजनक व्यवहार खोज्दछन् ।’नेपालले गन्तव्य देशसँग नेपाली श्रमिककोे न्यूनतम तलब, स्वास्थ्य सुरक्षा, बिमा, सामाजिक सुरक्षा, मर्यादित कार्यस्थल र न्यायोचित भर्ना प्रक्रियाको विषयलाई सम्बोधन हुनेगरी श्रम सम्झौता गरिरहेको पनि उनले बताए । मन्त्री भण्डारीले नेपाल सरकार सुरक्षित आप्रवासनका लागि काम गरिरहेको बताउँदै कुनै पनि श्रमिक घरबाट निस्केर गन्तव्य मुलुकसम्म पुगेपछि फर्किएर नआएसम्मका सबै चरणमा सुरक्षाको सुनिश्चित गर्ने विषयमा श्रम सम्झौता गर्नुपर्ने बताएका छन् ।
कार्यक्रममा श्रमसचिव डा. कृष्णहरि पुष्करले गन्तव्य देशसँग श्रम सम्झौता गर्दा अन्तर्राष्ट्रिय आधारभूत मानवअधिकारका विषयमा कुनै पनि सौदाबाजी गर्न नहुने विषयमा जोड दिएका थिए । ‘श्रमिकको सुरक्षा र हक दिलाउने विषयमा विश्वव्यापी मानवअधिकारका आधारभूत मान्यताका विषयमा सौदाबाजी हुँदैन,’ उनले भने, ‘सामाजिक सुरक्षालगायतका विषयमा भने थप छलफल गर्न सकिन्छ ।’
