काठमाडौं– चालु आर्थिक वर्षको १० महिनामा रोजगारीको सिलसिलामा झण्डै सात लाख युवाले मुलुक छाडेका छन् । वैदेशिक रोजगार विभागले सार्वजनिक गरेको वैशाख मसान्तसम्मको तथ्यांकमा छ लाख ८५ हजार ९२४ जना श्रम स्वीकृति लिएर वैदेशिक रोजगारीमा गएको पाइएको हो । यो संख्या व्यक्तिगत, संस्थागत र पुनः श्रम स्वीकृति लिएर जानेहरुको हो ।
यसरी विदेसिनेमा ७७ हजार ८५ जना महिला रहेका छन् । बाँकी छ लाख आठ हजार ८४९ जना पुरुष रहेको विभागले जनाएको छ । विभागको तथ्यांकअनुसार यस अवधिमा व्यक्तिगत श्रम स्वीकृति लिएर रोजगारीमा जानेको संख्या एक लाख आठ हजार ४०२ जना रहेको छ । जसमध्ये ८५ हजार ३२४ जना पुरुष र २३ हजार ७८ जना महिला रहेका छन् । संस्थागत माध्यम (म्यानपावर कम्पनी)बाट रोजगारीमा जानेहरु दुई लाख ८६ हजार ९८१ जना छन् । जसमा दुई लाख ५८ हजार २५३ जान पुरुष र २८ हजार ६८८ जना महिला छन् ।
त्यसैगरी, दुई लाख ८० हजार ३१८ जना पुनः श्रम स्वीकृति लिएर गएका छन् । दुई लाख ५६ हजार २०२ जना पुरुष र २४ हजार ११३ जना महिला पुनः श्रम स्वीकृति लिएर रोजगारीमा गएका हुन् । यस अवधिमा जिटुजीमार्फत १० हजार २६३ जना रोजगारीमा गएका छन् । जसमा नौ हजार ५७ जना पुरुष र एक हजार २०६ जना महिला छन् । जिटुजीमार्फत नेपाली कामदारहरु कोरिया, इजरायल र बेलायत गएका छन् ।
पछिल्लो महिना वैशाखमा ७८ हजार ५१ जनाले विभिन्न मुलुकमा रोजगारीमा जान श्रम स्वीकृति लिएको तथ्यांक छ । जसमध्ये ६९ हजार १२० जना पुरुष र आठ हजार ९३१ जना महिला रहेका छन् । वैशाखमा रोजगारीमा गएकामध्ये १३ हजार ३६९ जना व्यक्तिगत श्रम स्वीकृति लिएर गएका हुन् । जसमा १० हजार १६८ जना पुरुष र तीन हजार २०१ जना महिला छन् । उक्त महिनामा ३३ हजार ११ जना म्यानपावरमार्फत रोजगारीमा गएका छन् । यसरी जानेमा ३० हजार ८९ जना पुरुष र दुई हजार ९२२ जना महिला छन् । सोही महिनामा पुनः श्रम स्वीकृति लिएर ३० हजार ६६२ जना गएको तथ्यांक छ । जसमा २७ हजार ९९६ जना पुरष र दुई हजार ६६६ जना महिला रहेका छन् ।
त्यसैगरी जिटुजी प्रणालीमार्फत वैशाख महिनामा एक हजार नौ जना रोजगारीमा गएका छन् । यसरी गएकामध्ये ८६७ जना पुरुष र १४२ जना महिला छन् । मुलुकमा रोजगारीको अवसर नहुँदा दैनिक हजारौंको संख्यामा युवाहरु विदेसिने गरेको तथ्यांक छ । सरकारले स्वदेशमै रोजगारीको अवसर सिर्जना गर्ने बताउँदै आए पनि वैदेशिक रोजगारीको बाध्यता हटेको छैन । विभागको तथ्यांकअनुसार चालु आवको साउन महिनामा ५९ हजार ५७५ जना, भदौमा ५७ हजार ४९३, असोजमा ५३ हजार ५२५, कात्तिकमा ७० हजार ९९०, मंसिरमा ८४ हजार २२६, पुसमा ६७ हजार २५८, माघमा ७२ हजार ४४१, फागुनमा ६८ हजार ९६३ र चैतमा ७३ हजार ४०३ जना श्रम स्वीकृति लिएर वैदेशिक रोजगारीमा गएका छन् । यो संख्या व्यक्तिगत, संस्थागत, पुनः श्रम स्वीकृति लिने र जिटुजी प्रणालीमार्फत जानेहरुको हो । पछिल्लो १० महिनामा सबैभन्दा बढी मंसिरमा र सबैभन्दा न्यून असोजमा गएको तथ्यांकमा देखिन्छ ।
चालु आवको १० महिनामा श्रम स्वीकृति लिनेको संख्या
साउन |
५९,५७५ |
| भदौ |
५७,४९३ |
| असोज |
५३,५२५ |
| कात्तिक |
७०,९९० |
| मंसिर |
८४,२२६ |
| पुस |
६७,२५८ |
| माघ |
७२,४४१ |
| फागुन |
६८,९६३ |
| चैत |
७३,४०३ |
| वैशाख |
७८,०५१ |
स्रोतः वैदेशिक रोजगार विभाग
