ललितपुर - श्रम, रोजगार तथा सामाजिक सुरक्षामन्त्री शरतसिंह भण्डारीले आन्तरिक रोजगारीका सम्भावनालाई व्यवस्थापन गर्दै फाइदा उठाउने गरी काम गर्नुपर्नेमा जोड दिएका छन् । श्रम, रोजगार तथा सामाजिक सुरक्षा मन्त्रालयको आयोजनामा आइतबार यहाँ भएको आन्तरिक रोजगार प्रवद्र्धन तथा वैदेशिक रोजगारबाट फर्केका व्यक्तिहरूको पुनःएकीकरणसम्बन्धी छलफलमा उनले मुलुकमा रोजगारीको सम्भावना नै छैन भन्ने धारणाबाट बढेको नैराश्यता हटाउन जरूरी रहेको बताए ।
‘दोषारोपण गरेर हैन, यथार्थतालाई चिरफार गरेर अगाडि बढ्नुपर्छ, रोजगारदाताले उपयुक्त जनशक्ति पाइरहेको छैन, यहाँका काममा बाहिरबाट मानिस आउनुपर्ने अवस्था छ । भनसुनविनै योग्यता, क्षमताअनुसारको काम पाउने अवस्था सिर्जना गर्न श्रम संसारको सुरुआत गरेका छौं, त्यसलाई नागरिक एपमा जोड्छौं,’ मन्त्री भण्डारीले भने, ‘सरोकार भएकाहरूलाई एकीकृत गरेर सुधारका काम गर्छौं, विदेशबाट फर्किएर आएका र रोजगारीको खोजीमा रहेकालाई रोजगारमा जोड्ने गरी काम गर्नुपर्छ भनेर लागिरहेका छौं ।’
उनले मन्त्रालयको काम वैदेशिक रोजगारको मात्रै काम हो भन्ने सोचबाट मुक्त भएर मुलुकमा भएको रोजगारीको सम्भावना र अवसरलाई पनि ध्यान दिएर काम गर्न लागिपरेको बताए । राष्ट्रिय योजना आयोगका उपाध्यक्ष प्रा.डा. शिवराज अधिकारीले देशभित्रै उत्पादनका क्षेत्रमा रोजगारीको सिर्जना गर्न ध्यान दिनुपर्नेमा जोड दिए । उनले कृषि, निर्माण, पर्यटन, होटललगायतका क्षेत्रमा सम्भावना रहेकाले यसमा लगानी गर्नुपर्ने बताए । प्रा.डा. अधिकारीले दिगो विकास योजनाअनुसारको लक्ष्य प्राप्त गर्न ३० खर्ब २३ अर्ब रुपैयाँ लगानी गर्नुपर्ने भन्दै उद्योग विभागले सम्पादन गर्ने हरेक कार्यसँग रोजगारीलाई जोड्नुपर्नेमा जोड दिए ।
मन्त्रालयका सचिव कृष्णहरि पुष्करले ज्ञानसहितको दक्ष जनशक्ति नहुँदा रोजगारीका क्षेत्रमा ठूलो समस्या देखापरेको बताए । उनले देशभित्रै काम गर्न गाह्रो मान्ने तर त्यही काम विदेशमा गएर गर्न तत्पर रहने पद्धतिले रोजगारीको वातावरण नबनिरहेको धारणा राखे ।रिटर्नी नेटवर्क नेपालका अध्यक्ष उत्तम अधिकारीले विदेशमा श्रम गरेर फर्किएर आएकाहरूलाई उनीहरूको सीपलाई सदुपयोग हुनेगरी ध्यान दिएर ‘स्टार्टअप’ परियोजनालाई प्रभावकारी रूपमा लागू गरिनुपर्ने बताए ।
