काठमाडौं– श्रम, रोजगार तथा सामाजिक सुरक्षा मन्त्रालयले ‘वैदेशिक रोजगार व्यवस्थापन सेवा प्रवाह कार्यविधि, २०७९’ मा दोस्रो संशोधन गरेको छ । मन्त्रालयले शुक्रबार संशोधित कार्यविधि वेबसाइटमार्फत सार्वजनिक गरेको हो । मन्त्रालयका अनुसार उक्त कार्यविधिमा दुईवटा मात्रै संशोधन गरिएको छ । संशोधनपछि कार्यविधिको नाम ‘वैदेशिक रोजगार व्यवस्थापन सेवा प्रवाह (दोस्रो संशोधन) कार्यविधि, २०८२’ कायम गरिएको छ ।
कार्यविधिमा दोस्रो संशोधनमार्फत कार्यविधिको दफा १ मा (२) यो कार्यविधि मन्त्रालयबाट स्वीकृति भएपछि लागू हुने छ भन्ने व्यवस्था थप गरिएको छ । दोस्रो संशोधन कार्यविधिको दफा २३ मा गरिएको छ । जसमा ‘मे ३१’ भन्ने शब्दको सट्टा ‘सेप्टेम्बर ३०’ राखिएको तथा ‘तर नेपाल सरकारको वैदेशिक रोजगारमा जान खुला नगरेका मुलुक’ भन्ने शब्दावलीपछि रहेको ‘र पेसा’ भन्ने शब्दहरु झिकिएको मन्त्रालयले जनाएको छ ।
संशोधित दफा २३ वैधानिकीकरण श्रम स्वीकृतिसँग सम्बन्धित रहेको छ । जसमा ‘यस कार्यविधिमा दफा (२) को खण्ड (ट) बमोजिमको श्रम स्वीकृतिका लागि अनलाइन आवेदन पेस गरेमा श्रम स्वीकृति प्रदान गर्न अख्तियारी पाएका मन्त्रालयअन्तर्गतका कार्यालय वा निकायबाट वैधानिकीकरण श्रम स्वीकृति प्रदान गरिने छ । सन् २०२४ को सेप्टेम्बर ३० सम्म रोजगारीका लागि भिसा प्राप्त गरेका श्रमिकले सम्बन्धित मुलुकस्थित कूटनीतिक नियोगमा श्रम स्वीकृतिका लागि आवेदन गरेमा त्यस्ता कामदारलाई सम्बन्धित नियोगले वैधानिकीकरण श्रम स्वीकृति प्रदान गर्न सकिने छ’ भन्ने उल्लेख गरिएको छ ।
मन्त्रालयले यसअघि २०८१ वैशाखमा उक्त कार्यविधिमाथि पहिलो संशोधन गरेको थियो । पछिल्लो संशोधन यही जेठ ४ गते मन्त्रालयबाट स्वीकृत भएको हो ।वैदेशिक रोजगार विभाग र अन्तर्गतका कार्यालय तथा प्रत्यायोजित अधिकार प्रयोग गरी वैदेशिक रोजगार व्यवस्थापनसम्बन्धी सेवा प्रवाह गर्ने कार्यालय तथा निकायहरुबाट प्रवाह हुने सेवालाई जनमुखी, पारदर्शी तथा सेवाग्राहीमैत्री एवं आधुनिक सूचना प्रविधिमा आधारित बनाउन २०७९ सालमा यो कार्यविधि कार्यान्वयनमा ल्याएको थियो । सर्वसाधारणले पाउनुपर्ने सेवा छिटो, छरितो र सहज ढंगले पाउने अवस्था सिर्जना गरी सुशासन कायम गर्न तथा वैदेशिक रोजगार ऐन, नियमावलीलगायत अन्य सान्दर्भिक कानुन कार्यान्वयन गरी सेवा प्रवाहलाई प्रभावकारी बनाउने कार्यविधिको प्रस्तावनामा उल्लेख छ ।
