काठमाडौं– वैदेशिक रोजगारीका लागि आकर्षक गन्तव्य इजरायलमा नेपाली श्रमिकका लागि थप अवसर सिर्जना गर्न वैदेशिक रोजगार विभागले पहल थालेको छ । विभागका महानिर्देशक कमलप्रसाद भट्टराईले मंगलबार नेपालका लागि इजरायली राजदूत श्मुलिक एरी बाससँग यसबारे छलफल गरेका हुन् ।
ताहाचलस्थित विभागको कार्यालयमा भएको भेटवार्तामा नेपाली नागरिकका लागि इजरायलमा हाल प्राप्त केयर गिभरका साथै रोजगारीका अतिरिक्त अन्य क्षेत्रसमेत पहिचान गर्दै रोजगारीको दायरा विस्तार गर्ने विषयमा छलफल भएको विभागले जनाएको छ । ‘नेपालीहरुका लागि इजरायल आकर्षक रोजगारीको गन्तव्यस्थल रहेकोले थप रोजगारीका क्षेत्र पहिचान गर्दै सोलाई कानुनीरुपमा अघि बढाउनका साथै यसअघि छनोट प्रक्रिया पूरा गरी प्रस्थानको पर्खाइमा रहेका केयर गिभरको प्रस्थान प्रक्रिया छिटो गर्न सक्रियतापूर्वक अघि बढ्नेलगायत द्विपक्षीय हितका विषयमा छलफल भएको छ,’ विभागले मंगलबार जारी गरेको विज्ञप्तिमा उल्लेख छ ।
भविष्यमा श्रम रोजगारका नवीन र सुरक्षाका दृष्टिकोणलेसमेत उचित मानिएका क्षेत्रमा नीतिगत व्यवस्था गरी रोजगारका अवसरहरु सिर्जना गर्दै इजरायल रोजगारी गर्न जान चाहने नेपाली नागरिकको प्रस्थान प्रक्रियालाई थप सुव्यवस्थित र पारदर्शी बनाउने विषयमासमेत छलफल भएको विभागले जानकारी दिएको छ ।नेपाली श्रमिकहरुको आकर्षक गन्तव्यको रुपमा इजरायल रहेको छ । इजरायलले बच्चा, युवा तथा ६५ वर्ष ननाघेका गम्भीर अपांगता भएकाहरुको स्याहारका लागि नेपालबाट केयरगिभर लग्दै आएको छ । त्यहाँ जाने कामदारले प्रत्येक दिन सात घण्टाका दरले हप्ताको छ दिनकाम गर्नुपर्छ ।
अतिरिक्त कामगरे त्यसबापतको छुट्टै पारिश्रमिक पाइन्छ । इजरायलमा प्रतिमहिना एक जना श्रमिकले पाँच हजार ८८० इजरायली सेकेल अर्थात् दुई लाख रुपैयाँभन्दा बढी कमाउने गरेका छन् । कम्तीमा एसएलसी उत्तीर्ण गरी मान्यताप्राप्त तालिमप्रदायक संस्थाबाट तीन महिनाको केयर गिभिङ तालिम लिए इजरायल जान योग्य भइन्छ । इजरायलले कामदारको जम्मा मागमध्ये ६० प्रतिशत महिला र ४० प्रतिशत पुरुषलाई लग्दै आएको छ ।
