काठमाडौं– वैदेशिक रोजगार विभागले मंगलबारदेखि आवेदन पेस गरेकै दिनमा श्रम स्वीकृति जारी गर्न थालेको छ । विभागबाट प्रदान गरिने सेवा प्रवाहलाई चुस्त, दुरुस्त र प्रभावकारी बनाउने उद्देश्यसहित विभागले यो सेवा सुरु गरेको हो ।
श्रम स्वीकृतिमा हुने ढिलाइले हैरानी बेहोर्दै आएका सेवाग्राहीले अब भने राहत पाउने भएका छन् । ‘विभागबाट सम्पादन हुँदै आएको श्रम स्वीकृतिको कार्यलाई चुस्त, दुरूस्त र प्रभावकारी बनाउन मंगलबारबाट अनलाइन एप्लिकेसनमा भरेको दिनमै श्रम स्वीकृति दिने परिपाटी र पद्धति सुरुआत गरेको छ,’ विभागले मंगलबार जारी गरेको विज्ञप्तिमा उल्लेख छ ।
यद्यपि, अनलाइन एप्लिकेसन रीतपूर्वक भरेको हुनुपर्ने विभागको भनाइ छ । उक्त सेवा कार्यालय समयभित्रै सम्पादन हुने पनि विभागले जनाएको छ । यसबाट सेवाग्राहीले छिटो, छरितो र प्रभावकारी सेवा पाएको अनुभूति गर्ने विभागको अपेक्षा छ । ‘विभागबाट प्रदान गरिने सेवा प्रवाहलाई चुस्त, दुरूस्त र प्रभावकारी बनाई जनतालाई झण्झटरहित बनाउन यो नीति अवलम्बन गरिएको हो,’ विभागको भनाइ छ, ‘राज्यले अख्तियार गरेको नीति, विधि पद्धतिअनुसार सेवा प्रवाह गर्न विभाग क्रियाशील छ ।’
वैदेशिक रोजगार व्यवसायलाई पारदर्शी एवं मर्यादित बनाउनका लागि अख्तियार गरेको संकल्प, नीति एवं विधिहरूलाई पालना गरी व्यवसायलाई व्यवस्थित गर्ने प्रतिबद्धतासमेत विभागले जनाएको छ । विभागमा हालै महानिर्देशकको जिम्मेवारी सम्हालेका कमलप्रसाद भट्टराईले गएको शुक्रबारमात्रै पत्रकार सम्मेलन गरी विभागको काम कारबाहीलाई चुस्त बनाउने बताएका थिए ।
उनले केही दिनभित्रै नयाँ महानिर्देशक आएको अनुभूति गर्न पाउने बताएको केही दिनमै आवेदन गरेकै दिन श्रम स्वीकृति दिने सेवाको सुरुआत गरेका हुन् । विभागको प्रणालीमा पटक–पटक आउने समस्याले पनि सेवाग्राहीले हैरानी बेहोर्दै आएका छन् । वैदेशिक रोजगार व्यवसायीहरुले यो समस्या हटाउन भन्दै महानिर्देशक भट्टराईलाई ज्ञापनपत्र बुझाएका थिए ।
-1745656903.jpeg)