- विभागमा चार हजार २९३ उजुरी दर्ता, ४६० वटा मिलापत्र
- प्रहरी शाखामा चार हजार १९७ उजुरी
- एक हजार ९१९ वटा उजुरी फस्र्योट गर्दा १२ लाखभन्दा बढी असुल
काठमाडौं– वैदेशिक रोजगारीका नाममा युवाहरु ठगिने क्रम विकराल बन्दै गएको तथ्यांकले देखाएको छ । वैदेशिक रोजगार विभागले शुक्रबार सार्वजनिक गरेको पछिल्लो १० महिनाको तथ्यांकले यो तथ्य उजागर गरेको हो । दैनिकजसो भइरहेको ठगी नियन्त्रणमा सरकार असफल देखिएको छ ।
चालु आर्थिक वर्षको साउनदेखि वैशाख मसान्तसम्मको अवधिमा आकर्षक वैदेशिक रोजगारीमा विभिन्न मुलुक पठाउने भन्दै युवाहरुबाट ३० करोड रुपैयाँभन्दा बढी ठगी भएको विभागको तथ्यांक छ । विभागका अनुसार यस अवधिमा चार हजार २९३ वटा उजुरी विभागमा दर्ता भएका थिए । जसमध्ये ४६० वटा मिलापत्रमार्फत टुंग्याइएको विभागको भनाइ छ । पछिल्लो महिना वैशाखमा मात्रै ५८१ वटा ठगीसम्बन्धी उजुरी दर्ता भएका थिए । तीमध्ये ५४ वटामा मिलापत्र गरिएको विभागले जनाएको छ ।
विभागले चालु आवको वैशाख मसान्तसम्म दर्ता भएका उजुरीमाथि आवश्यक छानबिनपश्चात् १६६ वटा मुद्दा अदालतमा दर्ता गरेको तथ्यांकमा उल्लेख छ । जसमध्ये २० वटा वैशाखमा दर्ता भएका हुन् । अदालतमा दर्ता भएका १६६ वटा मुद्दामा कूल ३० करोड तीन लाख ८९ हजार रुपैयाँबराबरको क्षतिपूर्ति मागदाबी गरिएको विभागले जनाएको छ ।
यता विभागको प्रहरी शाखामा वैशाख मसान्तसम्म चार हजार १९७ उजुरी दर्ता भएको तथ्यांक छ । जसमध्ये १२ वटा मिलापत्रसहित एक हजार ९१९ वटा उजुरी फस्र्योट गरिएको विभागद्वारा उपलब्ध विवरणमा उल्लेख छ । यसरी फस्र्योट गरिएको उजुरीबाट १२ लाख चार हजार रुपैयाँ असुल गरी पीडितलाई हस्तान्तरण गरिएको विभागले जनाएको छ ।
वैदेशिक रोजगारसम्बन्धी ठगीका घटना अनियन्त्रित बनेको विभागद्वारा सार्वजनिक यो तथ्यांकले नै पुष्टि गर्छ । विभागसम्म नपुगेका घटना अझ धेरै रहेको जानकारहरु बताउँछन् । नेपाल प्रहरीले वैदेशिक रोजगारीका नाममा ठगी गरेको अभियोगमा पक्राउ परेका व्यक्तिहरुको विवरण दैनिकजसो सार्वजनिक गर्दै आएको छ ।
पछिल्लो समय बेलायत, क्यानाडा, अमेरिका तथा युरोपका विभिन्न देशमा आकर्षक रोजगारीका लागि पठाउने प्रलोभन देखाएर ठगी गर्ने गरेको पाइएको छ । आकर्षक कमाइको लोभमा युवाहरु लाखौं तिर्न तयार हुने गरेका छन् । जसको फाइदा दलालहरुले लुटिरहेको देखिन्छ । मुलुकमा रोजगारीको अवसर नहुँदा वैदेशिक रोजगारीमा जानुपर्ने बाध्यतामा रहेका युवाहरु ठगहरुको चंगुलमा फसिरहँदा राज्यका निकायहरु निस्प्रभावी बनेका छन् ।
त्यसो त ठगीका पछिल्ला घटनाहरु म्यानपावर कम्पनीभन्दा शैक्षिक परामर्श संस्था (कन्सल्टेन्सी)हरुबाट बढी भएका देखिन्छ । कन्सल्टेन्सीबाट वैदेशिक रोजगारीमा पठाउनु सीधै गैरकानुनी कार्य हो । तर, कन्सल्टेन्सीबाट भएका यस्ता गैरकानुनी कार्यहरु लगातार बाहिर आइरहेका छन् । विभागले वैदेशिक रोजगारसम्बन्धी काम गर्न इजाजतपत्र प्राप्त संस्थाहरुमा नियमित अनुगमन गरिरहेको जनाएको छ ।
थप ११० संस्थालाई इजाजतपत्र, ५१ संस्था खारेज
वैदेशिक रोजगार विभागले चालु आर्थिक वर्षको १० महिनामा वैदेशिक रोजगारसम्बन्धी काम गर्न थप ११० वटा संस्थालाई इजाजतपत्र दिएको छ । यही अवधिमा १२१ वटा इजाजतपत्र नवीकरण तथा ५१ वटा संस्था खारेज गरी धरौटी फिर्ता गरिएको विभागले जनाएको छ । यसैगरी अभिमुखीकरण तालिम सञ्चालन गर्ने दुईवटा, घरेलु कामदारलाई तालिम दिने आठवटा, सीपमूलक तालिम दिने आठवटा, केयर गिभर तालिम दिने आठवटा, केयर गिभर पठाउने चार र जिटको संस्था ४५७ वटाको नवीकरण गरिएको विभागको विवरणमा उल्लेख छ ।
सोही अवधिमा म्यानपावर कम्पनीहरुका १७९ वटा शाखा नवीकरण गरिएको, १११ वटा शाखा सञ्चालनका लागि अनुगमन गरी अनुमतिपत्र प्रदान गरिएको तथा १७ वटा संस्थाको बैंक ग्यारेण्टी फुकुवा गरिएको विभागले जानकारी दिएको छ । सो अवधिमा नियमविपरीत काम गरेका १६१ वटा इजाजतपत्रवाला संस्थालाई जरिवाना गरिएको पनि विभागले जनाएको छ ।
