- नागरिक उन्मुक्तिमा रेशम–रञ्जिताबीच बेमेल, एक मन्त्रीका लागि दुई सांसदको नाम
- जनमत अध्यक्ष सिके र श्रीमती सिन्धु रानीको सम्बन्ध टुट्यो
- नेतृत्व नै पारिवारिक झगडामा रुमलिँदा संकटमा नयाँ दल
- रेशम–रञ्जिता झगडाले नागरिक उन्मुक्ति र जनमत एकतामा ढिलाइ
काठमाडौं– नागरिक उन्मुक्ति (नाउपा) पार्टीकी अध्यक्ष रञ्जिता श्रेष्ठ चौधरी र पार्टीका संरक्षक रेशमलाल चौधरीले सुदूरपश्चिम प्रदेश सरकारमा एक मन्त्रीका लागि दुई जना सांसदलाई अघि सारेका छन् । मन्त्री नियुक्त गर्नुपर्ने एक जना भए पनि दुई जनाको नाम आएपछि मुख्यमन्त्री कमलबहादुर शाहलाई मन्त्री नियुक्त गर्न उल्झन परेको छ ।
रेशम र रञ्जिता श्रीमान्–श्रीमती हुन् । उनीहरूबीच बेमेल छ । त्यही भएर रञ्जिताले उद्योग, पर्यटन, वन तथा वातावरण मन्त्रालयमा सांसद कैलाश चौधरीलाई मन्त्रीका लागि सिफारिस गरेकी छन् । रञ्जिताको यो कदममा रेशम र उनी पक्षको गम्भीर असहमति छ । उनले कैलाशलाई मन्त्री बनाउने निर्णयको विरोध गरेका छन् ।
पार्टी सांसद गंगाराम चौधरी भने दुई नेताबीच खासै असमझदारी नभएको बताउँछन् । तर, मन्त्री सिफारिसमा भने केही समस्या देखिएको बताए । छिट्टै मन्त्रीको विषय समाधान हुने पनि उनको भनाइ छ । ‘अध्यक्षज्यूले माननीय कैलाश चौधरीको नाम सिफारिस गर्नुभयो । तर, संरक्षकज्यूले विनाछलफल सिफारिस गर्नु गलत हो । यो प्रक्रियाबद्ध होइन भनेर भन्नुभएको छ,’ उनले प्रभावसँग भने, ‘यो विषय छिट्टै सल्टिन्छ, धेरै जाँदैन ।’
मन्त्रीका लागि रेशम समूहले घनश्याम चौधरीलाई अगाडि सारेको हो । उनी नाउपा सुदूरपश्चिम प्रदेश संसदीय दलका नेता पनि हुन् । पूर्वमन्त्रीसमेत रहेका उनी फेरि मन्त्री हुन चाहन्छन् । संसदीय दलमा बहुमत पनि रेशम र उनको पक्षमा छ । तर, अध्यक्ष रञ्जिताले आफूनिकट कैलाशलाई सिफारिस गर्दा लफडा भएको हो, जसले गर्दा मन्त्री नियुक्ति सम्भव भएको छैन ।
उसो त नागरिक उन्मुक्ति पार्टीमा यो विवाद पहिलो न अन्तिम । रेशम–रञ्जिता कलहको एउटा परिघटना मात्रै हो । उनीहरूबीचको कलहले पश्चिम तराईबाट देशको राजनीतिमा उदाएको दल नाउपालाई संकटोन्मुख बनाएको छ । पुराना दलहरूको गढ भत्काउँदै राजनीतिमा उदय यो दलको स्थापनाकै बेलादेखि रञ्जिता र रेशम कमाण्डर हुन् । खुला मोर्चामा अध्यक्ष रञ्जिता र आन्तरिक मोर्चामा संरक्षक रेशम प्रभावी छन् । यी दुईबीच शक्ति संघर्ष विगतदेखि नै जारी छ । एकले अर्कालाई पार्टीको कार्यकारी भूमिकामा अस्वीकार गर्दै आएका छन् ।
नाउपा थारुवान आन्दोलन र ७ भदौ २०७२ मा भएको टीकापुर घटना र त्यसपछि भएका परिघटनाको जगमा स्थापित स्थापित भएको हो । यतिबेला भने उक्त दल रेशम–रञ्जिताको घर झगडाको सिकार भएको छ ।नाउपाका एक नेताका अनुसार नाउपा र जनमत पार्टीबीचको एकता ढिलाइमा पनि रेशम–रञ्जिता झगडा कारक छ । उनले भने, ‘रञ्जिता जनमतसँगको एकतामा अध्यक्ष सिकेकै हैसियतमा रहन चाहन्छिन् । नभए, पार्टी एकता गर्ने उनको चाहना छैन ।’
यसअघि २७ पुस २०८० मा टीकापुरमा भएको पार्टीको पहिलो महाधिवेशनबाट अध्यक्षमा रेशम निर्विरोध निर्वाचित भएका थिए । त्यसबेला रञ्जिता असन्तुष्ट हुँदै बन्दसत्र छाडेर हिँडेकी थिइन् । तर, निर्वाचन आयोगले दुई महिना नबित्दै २४ फागुनमा रेशम सदस्य हुन पनि अयोग्य भएको निर्णय गरेको थियो ।आयोगको सो निर्णयसँगै नाउपाको अध्यक्षमा रञ्जिता फर्किन् । तर, त्यसयता श्रीमान्–श्रीमतीको शक्ति संघर्ष पार्टी र सत्तामा देखिएको छ । मूलतः थारुहरूले पुराना दलहरू कांग्रेस, एमाले, माओवादी, राप्रपा, जसपाजस्ता दलहरूविरुद्ध विद्रोह गर्दा स्थापित भएको दल नाउपालाई संकटतर्फ धकेलेको देखिएको ती नेता बताउँछन् । यसरी पश्चिम तराईबाट उदाएको दल नाउपामा श्रीमान्–श्रीमती झगडाको प्रभाव पार्टी र सत्तामा देखिएको छ ।
यता मधेसमा गत चुनावबाटै उदाएको दल जनमत पार्टीका अध्यक्ष डा. चन्द्रकान्त (सिके) राउत पनि पारिवारिक झमेलामा अल्झिए । जबकि, जनमतलाई मधेसका जनताले जनता समाजवादी पार्टी (जसपा)को विकल्पमा अघि सारेको हो । तर, पार्टी अध्यक्ष राउत र श्रीमती सोनी सिन्धु रानीसँग सम्बन्ध राम्रो भएन । बेमेलपूर्ण सम्बन्धपछि १२ भदौ २०८१ मा राउतले नै पत्नी रानीसँग कानुनीरुपमा अलग हुनका लागि ललितपुर जिल्ला अदालतमा मुद्दा दायर गरे । सो मुद्दामा गत ११ वैशाखमा न्यायाधीश निर्मला योङ्याको एकल इजलासमा सहमतिमै दुवै अलग हुन तयार भए । यससँगै मधेसबाट वैकल्पिक नेताको रूपमा राष्ट्रिय राजनीतिमा देखिएका राउतको सम्बन्ध श्रीमती सोनीसँग टुटेको छ ।
