काठमाडौं– नेपाल वैदेशिक रोजगार व्यवसायी संघले वैदेशिक रोजगार सूचना व्यवस्थापन प्रणाली (फेमिस)मा बाराम्बार आउने समस्या समाधन गर्न वैदेशिक रोजगार विभागको ध्यानाकर्षण गराएको छ । विभागका नवनियुक्त महानिर्देशक कमलप्रसाद भट्टराईलाई भेट्न पुगेका संघका पदाधिकारीहरुले व्यवसायीले भोग्दै आएका समस्याबारे ध्यानाकर्षण गराएका हुन् ।
संघका अध्यक्ष भुवनसिंह गुरुङको नेतृत्वमा गएको टोलीले महानिर्देशक भट्टराईसमक्ष तीन बुँदे मागसमेत प्रतुत गरेको छ । जसमा पहिलो माग फेमिस प्रणालीको समस्या तत्काल हटाउनुपर्ने रहेको छ । फेमिस नियमित नचल्ने र चलिहाले पनि सुस्त भएकाले समस्या भइरहेको संघको भनाइ छ । उक्त प्रणालीमा रहेको समस्याकै कारण रोजगारदाताको विश्वासमासमेत असर परेकोले छिटोभन्दा छिटो यसको समाधान निकाल्न महानिर्देहक भट्टराईलाई आग्रह गरिएको संघले जनाएको छ ।
त्यसैगरी, करोडौं धरौटी राखेका व्यवसायीमाथि विभागले पक्राउ पुर्जी जारी गरेर आतंक सिर्जना गर्ने कार्य बन्द गर्नुपर्ने संघको अर्को माग छ । सरकारको ऐन, कानुन पालना गरेर इजाजतपत्र लिएका कम्पनीहरुलाई अनुगमन गर्न जाने विभागका कर्मचारीले भिसा प्रक्रियामा रहेका राहदानीहरु लैजाने, कारोबार बन्द गरिदिने र पक्राउ पुर्जी जारी गर्नेजस्ता काम गरेकोप्रति संघले ध्यानाकर्षण गराएको छ । जघन्य अपराध गरेजसरी व्यवसायीमाथि धरपकड नगरी सौहार्द्रपूर्ण वातावरणमा काम गर्न दिन संघले माग गरेको छ ।
इजाजत प्राप्त संस्थाका विरुद्ध उजुरी गर्नुअघि अनिवार्य मेलमिलापको प्रक्रियामा जाने व्यवस्था गरिदिन पनि संघले नवनियुक्त महानिर्देशक भट्टराईसमक्ष अनुरोध गरेको छ । कतिपय व्यक्ति तथा संस्थाले स्वार्थपूर्तिका लागि मिडियाकर्मी र तेस्रो व्यक्तिलाई ल्याउने गर्दा व्यवसायीले विनाकसुर कानुनी झण्झट व्यहोर्नुपरेकाले मेलमिलापलाई प्राथमिकतामा राख्न आग्रह गरिएको संघका महासचिव महेशकुमार बस्नेतले बताए ।
संघको मागपत्र बुझ्दै महानिर्देशक भट्टराईले व्यवसायीका समस्याप्रति आफू सकारात्मक रहेको र जायज मागमा छलफल अगाडि बढाइने बताएका थिए । पीडितले न्याय पाउने र व्यवसायीलाई पनि समस्या नपर्ने खालको प्रक्रिया निर्माण गरिने उनको भनाइ थियो ।
संघका अनुसार विभागमा संघका द्वितीय उपाध्यक्ष संयोजक हुनेगरी मेलमिलाप कक्ष स्थापना गरेको छ । यसले संस्थागत उजुरीमाथि समन्वय गर्दै पीडित र व्यवसायीबीच मेलमिलाप गराउने जानकारी दिइएको छ । मेलमिलापले व्यवसायीलाई जिम्मेवार बनाउने र संस्थागत समस्यालाई छिटो टुंगोमा पु¥याउने संघको भनाइ छ ।
नवनियुक्त महानिर्देशक भट्टराईको प्राथमिकता
वैदेशिक रोजगार विभागका नवनियुक्त महानिर्देशक कमलप्रसाद भट्टराईले विभागको नीति, प्रविधि र प्रक्रिया सुधारका काम आफ्नो प्राथमिकतामा रहेको बताए । विभागमा बेथिति हटाएर थिति बसाल्ने काम गर्ने उनको प्रतिबद्धता छ । ‘बेथितिविरुद्ध शून्य सहनशीलताका साथ काम गर्न सबैलाई निर्देशन दिइसकेको छु,’ भट्टराईले भने ।
विभागलाई केही समयभित्रै ‘डिजिटलाइज्ड’ बनाउने उनले बताए । ‘आगामी दिनको विभाग प्रविधिमैत्री विभाग हुन्छ । अहिले श्रम स्वीकृतिमात्र गर्दै थियौं, अब मुद्दा लिने, राहत तथा उद्धारको काम डिजिटल माध्यमबाट गर्ने हिसाबले काम गरिरहेका छौं,’ उनले भने ।
विभागको सिस्टमको म्याद सकिएर जुनसुकै बेला क्र्यास हुने अवस्थामा पुगेकाले यथाशीघ्र यसलाई बनाउनतर्फ लागेको उनले बताए । ‘यसको लाइफ सकिसकेकाले कुनै पनि किसिमबाट यसको भरथेग गर्ने अवस्था छैन । अर्को सिस्टम नआएसम्म केही नहोस् भनेर प्रार्थना गर्नुपर्ने अवस्था छ । सरकारको बजेटबाट हुन्छ कि दाताहरुको सहयोगबाट हुन्छ सकेसम्म चाँडो नयाँ सिस्टम ल्याउनुपर्छ । यसका लागि प्रारम्भिक प्रक्रिया पूरा भएको छ, अब मोडालिटी टुंगिन बाँकी छ,’ महानिर्देशक भट्टराईले भने । चालु आर्थिक वर्षको अन्त्यसम्म यस विषयमा निष्कर्ष आइसक्ने उनले बताए ।
भट्टराईका अनुसार विभागबाट हुने जुनसुकै काममा लामो प्रक्रिया छोट्याएर सरलीकृत गरिने, विभागमा थुप्रिएको मुद्दाको अनुसन्धान, अभियोजनजस्ता कामलाई विकेन्द्रीकृत गरिनेतर्फ पनि योजना बनाइँदै छ । त्यस्तै, दीर्घकालीन महत्वका विषयमा पनि काम गर्ने उनले बताए । ‘विभागले दीर्घकालीन योजनाहरुमा ठूलो फड्को मार्न नसकेको अवस्थामा विभिन्न कार्यदल गठन गरी अध्ययन गरेर केही हप्ताभित्रै सुझाव लिन्छौं । संशोधनको क्रममा रहेको वैदेशिक रोजगार ऐनमा राख्न मिल्ने विषय त्यहीँ राख्छौं । नमिल्ने विषयलाई त्यहीअनुसारको निर्णय गरेर अघि बढाउछौं,’ भट्टराईले भने ।
