अस्ति टीआरसीका विषयमा छलफल गर्ने भनेर अध्यक्ष कमरेडलाई बोलाउनुभयो । छलफल भयो । लगत्तै कुलमान हटाउने निर्णय गरेछन् । त्यसपछि अध्यक्ष कमरेडमाथि टीआरसीसँग कुलमान साटेको आरोप लाग्यो । अहिले पनि त्यसरी नै झुक्याउन प्रधानमन्त्रीजीले सक्नुहुन्छ
लिलामणि पोखरेल
सचिव, माओवादी केन्द्र
काठमाडौं– प्रधानमन्त्री केपी शर्मा ओली र विपक्षी नेता पुष्पकमल दाहाल भेटघाटै नगर्ने तहमा पुगेका छन् । जबकि, राष्ट्रिय महत्वका विषयमा छलफल गर्न प्रधानमन्त्री र विपक्षी नेताबीच संवाद हुने चलन छ, जुन हाल आएर तोडिएको छ । दुई नेता एकले अर्कालाई अस्वीकार गर्ने तहमा पुगेका छन् । यो बिहीबारको घटनाले पनि देखाउँछ ।
सरकारको नीति तथा कार्यक्रम संसद्मा प्रस्तुत गर्ने पूर्वसन्ध्यामा प्रधानमन्त्री ओलीले दाहाललाई छलफलका लागि बोलाएका थिए । छलफलस्थल सुरुमा प्रधानमन्त्रीको सरकारी निवास बालुवाटार थियो । पछि सिंहदरबार भनियो । ओलीका अर्का निम्तालु कांग्रेस सभापति शेरबहादुर देउवा थिए । देउवा नेतृत्वको कांग्रेस मुख्य सत्ता साझेदार दल हो ।
तर ओलीले बोलाएको छलफलमा दाहाल गएनन् । ओली र सभापति देउवामात्रै छलफलमा भए । उनीहरू केहीबेर कुरा गरेर हिँडे ।यसअघि यही १२ वैशाखमा संसद्को बर्खे (बजेट) अधिवेशनको पहिलो बैठक बस्यो । संसद् अधिवेशनको पहिलो बैठकलाई प्रधानमन्त्रीले सम्बोधन गर्ने चलन छ । प्रधानमन्त्रीले सम्बोधन गर्ने भएपछि संसद्मा विपक्षी नेताको उपस्थिति अनिवार्य मानिन्छ । तर बजेट अधिवेशनको दिन दाहाल गोरखाको बारपाकमा थिए, जुन ठाउँमा १२ वैशाख २०७२ मा गएको शक्तिशाली भूकम्पको केन्द्र हो । त्यस दिन दाहाल बारपाकमै रहे ।
ओलीले प्रचण्डलाई झुक्याउने, प्रचण्डले ओलीलाई । राजनीतिमा यस्तो निकृष्ट खेल यी दुई नेताले अहिले मात्रै खेलेको होइन । पहिलेदेखि हो । फेरि दुवै इगो बोक्ने नेता हुन् । त्यही भएर देशलाई उभो लगाउन सकेनन्
लोकराज बराल, राजनीतिशास्त्री
दाहाल नआउने भएपछि प्रधानमन्त्री ओलीको संसद्मा सम्बोधन स्थगित भयो । तेस्रो तहका नेताहरूले संसद्को पहिलो बैठकलाई सम्बोधन गरे । यसको एक सातापछि प्रधानमन्त्री ओलीले बोलाएको बैठकमा दाहाल गएनन् । छलफलको चाँजोपाँजो गर्ने पूर्वकानुनमन्त्री भइसकेका एमाले नेता अग्नि खरेल हुन्, जो प्रधानमन्त्री ओलीका संक्रमणकालीन न्यायसम्बन्धिका सल्लाहकारको जिम्मेवारीमा छन् ।
माओवादी सचिव लिलामणि पोखरेलका अनुसार प्रधानमन्त्री ओलीले झुक्याउन सक्ने हुनाले दाहाल छलफलमा नगएका हुन् । उनले प्रभावसँग भने, ‘ अस्ति टीआरसीका विषयमा छलफल गर्ने भनेर अध्यक्ष कमरेडलाई बोलाउनुभयो । छलफल भयो । लगत्तै कुलमान हटाउने निर्णय गरेछन् । त्यसपछि अध्यक्ष कमरेडमाथि टीआरसीसँग कुलमान साटेको आरोप लाग्यो । अहिले पनि त्यसरी नै झुक्याउन प्रधानमन्त्रीजीले सक्नुहुन्छ । त्यसबाट जोगिन उहाँ जानु भएन ।’
ओली सरकारले कुलमान घिसिङलाई ११ चैतमा बर्खास्त गरेको थियो । उनी नेपाल विद्युत् प्राधिकरणका कार्यकारी निर्देशक थिए । उनलाई ऊर्जामन्त्री दीपक खड्कादेखि प्रधानमन्त्री ओलीसम्मले मन पराएका थिएनन् । त्यही भएर टीआरसीबारे छलफल गरेर निस्किँदा सोही दिनको मन्त्रिपरिषद् बैठकले कुलमानलाई बर्खास्त गर्ने निर्णय गरेको थियो । यसलाई दाहाल अहिले पनि धोका भन्दै आएका छन् ।
उसो त २७ फागुन २०८१ मा प्रधानमन्त्री रहेका दाहालले संसद् बैठकलाई सम्बोधन गर्ने कार्यक्रम तय हुँदा तत्कालीन विपक्षी नेता ओली बैठकमा गएनन् । उनी कोशी प्रदेश संसद्लाई सम्बोधन गर्न गए ।त्यसअघि १४ माघ २०८१ मै तत्कालीन प्रधानमन्त्री दाहालले संसद् बैठकलाई सम्बोधन गरेका थिए । त्यसबेला पनि ओली संसद् बैठक गएनन् । दाहालले त्यसदिन संसद्बाटै ओलीको आलोचना गरेका थिए ।
३ भदौ २०८० मा पनि प्रधानमन्त्री रहेका दाहालले संसद्लाई सम्बोधन गर्ने तय हुँदा ओली अनुपस्थित थिए । उनी अनुपस्थित हुँदा संसद् बैठक नै दुई दिन पर सारिएको थियो । यसरी विगतमा ओलीले नै प्रधानमन्त्रीको हैसियतमा दाहालले संसद्मा गर्ने सम्बोधनमा सहभागी हुन अस्वीकार गरेका थिए ।दुई नेताबीच धोकाधडी र अस्वीकारको राजनीति पहिले पनि भएको थियो । १८ जेठ २०८१ मा प्रधानमन्त्री निवास बालुवाटारमा ओली–दाहाल संवाद भएको थियो ।
त्यो संवाद अघिल्लो दिन क्याप्टेन रामेश्वर थापाको घरमा देउवा–ओलीबीच गठबन्धन गरेर सरकार बनाउने लगायतका सात बुँदे समझदारीपछि भएको थियो । त्यहाँ ओलीले आफूलाई ‘स्वर्ग पनि सँगै जाने, नर्क पनि सँगै जाने’ भनेर विश्वस्त तुल्याएको बताएका थिए । यसपछि दाहालले ओलीलाई झुट बोल्ने नेता भन्ने गरेका छन् ।
राजनीतिशास्त्री लोकराज बराल भने दुई नेतामा तौलिँदा कोही तलमाथि नरहेको बताउँछन् । ‘ओलीले प्रचण्डलाई कहिले झुक्याउने र कहिले प्रचण्डले ओलीलाई झुक्याउने । राजनीतिमा यस्तो निकृष्ट खेल यी दुई नेताले अहिले मात्रै खेलेको होइन । पहिलेदेखि हो,’ उनले भने, ‘फेरि दुवै इगो बोक्ने नेता हुन् । त्यही भएर देशलाई उभो लगाउन सकेनन् ।’
