ओलीले जहिल्यै जयजयकार मात्रै मन पराए । भिन्न आवाजलाई थुन्ने काम गरे । अहिले पार्टीभित्र त्यही देखिएको हो ।
कृष्ण पोखरेल
राजनीतिशास्त्री
- उपाध्यक्ष अष्टलक्ष्मी शाक्यमाथि कारबाहीको तयारी
- ओलीबाट संसदीय दल बैठकमा शाक्यको चर्को विरोध
- पार्टी र सरकार दुवैमा विरोधीलाई ओलीको कारबाही
काठमाडौं– विरोधी आवाज पटक्कै नसुन्ने र आफ्नो विरोधमा बोल्नेविरुद्ध निर्मतापूर्वक प्रस्तुत हुने नेतृत्वको रुपमा परिचित छन् प्रधानमन्त्री तथा नेकपा एमालेका अध्यक्ष केपी शर्मा ओली । पार्टीभित्र र बाहिर आलोचना गर्ने जो कोहीविरुद्ध ओली विषवमन गर्छन् । पार्टी र सत्तामा विरोधी आवाज मुखरित गर्नेविरुद्ध कारबाहीकै तहसम्म पुग्छन् ।
यतिबेला कारबाहीको भागीदार बन्ने अवस्थामा पार्टी उपाध्यक्ष अष्टलक्ष्मी शाक्य देखिएकी छन् । उनले हालै शिक्षामन्त्रीबाट राजीनामा दिएकी विद्या भट्टराईको पक्षमा बोलेकी थिइन् । शाक्यको अभिव्यक्ति प्रधानमन्त्री ओलीलाई पटक्कै मन परेको छैन ।
एक जना एमाले सांसदले प्रभावसँग भने, ‘संसदीय दलको बैठकमा उपाध्यक्ष अष्टलक्ष्मी शाक्यले जे स्टाटस माननीय विद्या भट्टराईले शिक्षामन्त्रीबाट राजीनामा दिएको सन्दर्भमा लेख्नुभएको थियो, त्यसलाई लिएर सम्माननीय प्रधानमन्त्री केपी शर्मा ओली कमरेडले किन त्यस्तो लेख्नुभयो ? पार्टी अनुशासनमा किन बस्नु नपरेको ? भनेर प्रश्न गर्नुभयो ।’
एमाले संसदीय दलको बैठक शनिबार बसेको थियो । बैठकमा पार्टी अध्यक्षसमेत रहेका प्रधानमन्त्री ओली शाक्यविरुद्ध चर्को असन्तुष्ट सुनिए । ओली असन्तुष्ट हुँदा नेता कार्यकर्ताले स्पष्टीकरण हुँदै निलम्वनमात्रै होइन पदमुक्तसम्मको कारबाही भोग्नुपरेको छ ।
विगतमा विवादित व्यवसायी मीनबहादुर गुरुङले कीर्तिपुरमा पार्टी कार्यालयका लागि जग्गा दिएको र पार्टी कार्यालय नै बनाइदिने सन्दर्भमा नेता भीम रावल, स्थायी कमिटी सदस्य डा. विन्दा पाण्डे र उषाकिरण तिमल्सेनाले विरोध गरेका थिए । विरोधपछि रावललाई ओलीले पार्टीबाटै निष्काशित गरे । पाण्डे र तिमल्सेनालाई निलम्वित गरे ।
राजनीतिशास्त्री कृष्ण पोखरेल ओली गुणगानमात्रै सुन्न चाहने नेतृत्व भएको बताउँछन् । उनले फरक आवाजलाई कहिल्यै स्थान नदिएको पोखरेलको भनाइ छ । ‘झापा विद्रोहदेखि नै ओलीलाई राम्ररी चिन्छु, तर उनले जहिल्यै जयजयकार मात्रै मन पराए । भिन्न आवाजलाई थुन्ने काम गरे,’ पोखरेल बताउँछन् ।
ओलीले नेकपाकालमा पार्टीभित्र अन्तरसंघर्ष चल्दा नेताहरूको जिम्मेवारी हेरफेरदेखि खोस्नेसम्म गरेका थिए । सरकारमा पनि त्यसै गरेका थिए । विद्युत् महसुल बक्यौता उद्योगीबाट उठाउनुपर्ने र कुलमान घिसिङको नेपाल विद्युत् प्राधिकरणको कार्यकारी निर्देशकबाट भएको बर्खास्तीको विरोध ऊर्जा राज्यमन्त्री पूर्णबहादुर तामाङले गरेका थिए । घिसिङलाई बर्खास्त गर्ने प्रधानमन्त्री ओलीको कदम गलत रहेको उनको भनाइ थियो ।
तामाङका अनुसार उनले २९ चैतको मन्त्रिपरिषद् बैठकमा सरकारले ल्याउने आगामी बजेटमा पाँच–दश लाखको योजना छुट्याउन नहुने मत राख्दा ओली रिसाएका थिए । यिनै घटनाक्रमका बीच अन्ततः ओलीको बर्खास्तगीमा राज्यमन्त्री तामाङ परे । तत्कालीन शिक्षामन्त्री विद्या भट्टराई पनि ओलीको लाइनविपरीत गएर शिक्षा ऐन जारी गर्नेसहितका मागहरूमा सकारात्मक बन्दा उपेक्षाको सिकार बनेकी थिइन् । वैशाख ९ गते काठमाडौंमै भएको एक कार्यक्रममा त उनले काम गर्न नसकेको भनेर भट्टराईको क्षमतामाथि प्रश्न उठाएका थिए । ओलीको ‘किचन क्याबिनेट’मा रहेका महेश बस्नेतले विपक्षीलेभन्दा कडा शब्दमा भट्टराईको विरोध गरेका थिए ।
उद्योगी व्यवसायीबाट विद्युत् महसुल बक्यौता उठाउनुपर्ने अडानमा रहेका कुलमान गत चैतमै ओलीको बर्खास्तगीमा परेका थिए, जसविरुद्ध अहिले पनि काठमाडौंको माइतीघरमा प्रदर्शन हुँदै आएको छ । सक्रिय राजनीतिबाट टाढा हुँदै गएका कम्युनिस्ट नेता टंक कार्कीका अनुसार ओली डेढ दशकअघिसम्म यति साह्रै अलोकतान्त्रिक थिएनन् । उनी एमालेमा लोकतन्त्रका चर्का वकालतकर्ता थिए । जब २०७१ सालमा पार्टी अध्यक्ष पदमा माधवकुमार नेपाललाई पराजित गरेर पार्टी सत्तामा आए, त्यहीँदेखि उनले आन्तरिक लोकतन्त्र मासिदिए ।
कार्की सम्झिन्छन्, ‘ओली पार्टी नेतृत्वमा आउनुअघि प्रत्येक व्यक्तिलाई सरकार, राजनीतिक पार्टीहरू, सामाजिक संस्थाहरू, नेताहरू र अधिकारीहरूको बारेमा आफूलाई लागेका कुराहरू स्वतन्त्र रूपमा बोल्न दिनुपर्छ भन्थे ।’पूर्ववत् यी मान्यताबाट ओली अहिले पछि हटेका छन् । उनी त विरोधी आवाजलाई निर्ममतापूर्वक दबाउने अलोकतान्त्रिक चरित्रको नेतृत्व देखिएको कार्की बताउँछन् ।
