काठमाडौं – नेपाल लोकतान्त्रिक वैदेशिक रोजगार व्यवसायी एसोसिएसनले बृहत् रक्तदान कार्यक्रम सम्पन्न गरेको छ । नेपाली कांग्रेसको शुभेच्छुक संस्थाको रुपमा रहेको एसोसिएसनले आफ्नो १९औं स्थापना दिवसका अवसरमा बिहीबार रक्तदान कार्यक्रम अयोजना गरेको हो । सामाखुसीस्थित स्काइ ब्यांक्वेटमा आयोजित कार्यक्रममा १२० जनाले रक्तदान गरेको एसोसिएसनका महासचिव महेशकुमार बस्नेतले जानकारी दिए ।
कार्यक्रमको उद्घाटन नेपाली कांग्रेसका पूर्वमहामन्त्री डा. शशांक कोइरालाले गरेका थिए । उनले रक्तदानजस्तो मानवीय कार्य गरेकोमा आयोजकको प्रशंसा गरे । ‘रक्तदान एक महान दान हो, हामीले गरेको दानले कसैको ज्यान बच्छ,’ कोइरालाले भने । एसोसिएसनका अध्यक्ष दीपक थापाले आफूहरुले बेरोजगार युवालाई रोजगारी दिलाउने काम गर्दै गर्दा सामाजिक उत्तरदायित्वबोध गर्दै रक्तदान कार्यक्रम गरेर स्थापना दिवस मनाइएको जानकारी दिए । उनले नजिकिँदै गरेको नेपाल वैदेशिक रोजगार व्यवसायी संघको चुनावमा सहयोगको अपेक्षा राखेकोसमेत बताए । उनले भने, ‘अब हुन लागेको संघको चुनावमा लोकतान्त्रिक वैदेशिक रोजगार व्यवसायी एसोसिएसनका उम्मेदवारहरुलाई विजयी गराउन सबैको साथ र सहयोगका लागि आग्रह गर्दछु ।’
एसोसिएसनका पूर्वअध्यक्ष विनोदजंग केसीले संस्था अझ सशक्त बनाउनुपर्नेमा जोड दिए । ‘व्यवसाय तहसनहस हुने जति पनि समस्या उत्पन्न भएका छन् तीबाट जोगाउन सबैको ध्यान जानु आवश्यक छ,’ उनले भने, ‘व्यवसायी र व्यवसायलाई जोगाउने काम नेपाली कांग्रेसले मात्र गर्छ । यसमा नेतृत्वले ध्यान दिनु आवश्यक छ ।’अर्का पूर्वअध्यक्ष तिलक रानाभाटले ३६ लाख रकम जम्मा गरी संस्थाको पूर्वाधार स्थापना गरेको स्मरण गरे । उनले भने, ‘यो संस्था ठगी खाने होइन, गरिखानेहरुको संस्था बनेको छ । गरी खान खोज्नेलाई उचित वातावरण सिर्जना गर्ने काम गरेको छ ।’
नेपाली कांग्रेसको वैदेशिक रोजगार समन्वय तथा आप्रवासन विभाग प्रमुख प्रकाश रसाइलीले फागुन २ गते हुने संघको चुनाव मित्रवत्रुपमा लड्नुपर्ने बताए । ‘संघमा यसपालि हार्ने छुट छैन, व्यक्तिगत स्वार्थ त्यागेर संस्थागत निर्णयमा अगाडि बढ्नुपर्छ,’ उनले भने । कार्यक्रममा एसोसिएसनका संस्थापक र पूर्वअध्यक्षहरुलाई सम्मानस्वरुप मायाको चिनो प्रदान गरिएको थियो । व्यवसायीहरुको उत्साहजनक सहभागितामा कार्यक्रम सफल भएको भन्दै एसोसिएसनका महासचिव बस्नेतले रक्तदाता तथा सहभागीहरुलाई आभार व्यक्त गरे ।
