धरानका उपमहानगरपालिकाका उपमेयर हर्कराज साम्पाङ केही न केही गरी चर्चामा आइरहन्छन् । लोकप्रिय मेयरका रुपमा चिनिएका साम्पाङको पक्षमा सामाजिक सञ्जालका प्रयोगकर्ता धेरै छन् । उनको ‘कन्टेन्ट’ सामाजिक सञ्जालमा क्षणमै भाइरल बन्छ । खरो स्वभावका सुनिने साम्पाङ कुनै बेला धरानमा पानी ल्याएर चर्चामा छाए । पानीको समस्या भोगिरहेको धरानका लागि साम्पाङको यो अभियान अनुकरणीय थियो नै । त्यसैले पनि ठाउँठाउँबाट उनलाई यो अभियानमा सहयोग जुट्यो । कतिले श्रमदान गरे ।
यो भीडमा सबैभन्दा चर्चामा आउने व्यक्ति थिए उनै मेयर साम्पाङ । थोत्रो कपडा लगाएर पसिनापसिना हुँदै पाइप तान्दै गरेको एउटा चित्रमा चिनियो मेयर साम्पाङ । यस्तो कडा परिश्रम गर्नेलाई कसले रुचाउँदैन ? धरानमा उनले यति विधि गरेको दुःख धेरै समय टिकेन । किनभने यो अस्थायी काम थियो । त्यसपछि धरानमा खानेपानीको हाहाकार भयो । स्थायी समाधान नखोजेको भन्दै त्यतिबेलै केही आवाज मेयर साम्पाङको कदममा प्रश्न उठाएका थिए । तर त्यतिबेलाको मेयरको रापताप र वाहवाहीले ती स्वर दबिए ।
अब भने मेयर साम्पाङलाई फसाद प¥यो । अघिल्लो वर्ष झण्डै दुई अर्बको बजेट ल्याएको धरानका प्रमुख हर्ताकर्ता हुन् साम्पाङ । अझ भनौ संघीय शासनको मन्त्रीभन्दा पनि शक्तिशाली व्यक्ति । अघिल्लो वर्ष खानेपानी मन्त्रालयलाई २६ अर्ब बजेट परेको थियो । देशभरको ७५३ स्थानीय तहमध्ये धरान एक हो । अब खानेपानी मन्त्रालयको यो बजेट बाँडफाँड गर्ने हो भने धरानलाई कति पर्ला ?
यद्यपि स्थानीयको आवाज भन्दै मेयर मंगलबार सिंहदरबार आए । त्यो पनि रित्तो गाग्री बोकेर । एक त सिंहदरबारमा यस्ता सामग्री बोकेर जोसुकैलाई प्रवेश दिइन्न । अझ मेयर साम्पाङले त विरोधस्वरुप नै रित्तो गाग्री बोकेर सिंहदरबार छिर्ने प्रयास गरेका थिए । सांकेतिकरुपमा साम्पाङले गरेको आन्दोलन ठीक होला, तर साम्पाङले बिर्सन नहुने कुरा हो, उनी आफैं पनि स्थानीय सरकार प्रमुख हुन् । यसरी विरोधको नाममा विरोध गरेर, संघीय सरकारले दिएन भनेर जनताको वाहवाही कमाएरमात्र बस्नु वा क्षणिक चर्चामा रमाउनु ठीक हुन्न ।
कहिले संघ सरकारलाई नमान्ने भनेर र त कहिले संविधान उल्लंघन गर्दै हिँड्ने साम्पाङ अहिले मनमौजी शासनका कारण आलोचनामा छन् । खानेपानीको समस्या समाधानभन्दा पनि यस्ता आलोचनाबाट बच्न उनी रित्तो गाग्री देखाउन काठमाडौं आइपुगेका हुन् । मेयरसाब, यस्तो ‘स्टन्टबाजी’मा नरमाउनुस् ।
