काठमाडौं– साउदी अरेबियाको भिसा प्रक्रियाका लागि आवश्यक साउदी आइडी म्यानपावर कम्पनीले अब दुई–दुईवटा पाउने भएको छ । भिसा लगाउनका लागि व्यवसायीले भोग्दै आएका समस्यालाई सम्बोधन गर्न दुईवटा आइडी उपलब्ध गराउन नेपाल वैदेशिक रोजगार व्यवसायी संघले गरेको आग्रहपछि नेपालीस्थित साउदी राजदूतावास यसमा सहमत भएको हो ।
संघका अध्यक्ष राजेन्द्र भण्डारी र संघका साउदी संयोजक वैकुण्ठ पौडेलले शुक्रबार नेपालका लागि साउदी राजदूत र कन्सुलरसँग भेट गरी यसबारे कुरा राखेका थिए । साउदी दूतावासमा भएको छलफलपछि राजदूत अबु हमिद दुईवटा आइडी उपलब्ध गराउन तयार भएको अध्यक्ष भण्डारीले बताए ।
साउदी आइडी सबैले सहज तवरबाट पाउनुपर्ने र भिसा सब्मिसनका लागि आवश्यक साउदी आइडी सबै एजेन्सीलाई दुई÷दुई प्रति दिन साउदी संयोजकले गरेको आग्रहमा साउदी महामहिम साथै कन्सुलर सहमत हुनुभएको छ ।
राजेन्द्र भण्डारी
अध्यक्ष, वैदेशिक रोजगार व्यवसायी संघ
‘शुक्रबार साउदी राजदूतावासका महामहिमका साथै कन्सुलरज्यूसँग महत्वपूर्ण छलफल भएको छ । उक्त छलफलमा साउदी आइडी सबैले सहज तवरबाट पाउनुपर्ने र भिसा सब्मिसनका लागि आवश्यक साउदी आइडी सबै एजेन्सीलाई दुई÷दुई प्रति दिन साउदी संयोजकले गरेको आग्रहमा साउदी महामहिम साथै कन्सुलर सहमत हुनुभएको छ,’ अध्यक्ष भण्डारीले भने ।
साउदी आइडी आवश्यक ठानेका व्यवसायीले राजदूतावासले तोकेका सबै कागजात पेस गर्न सक्ने पनि उनले जानकारी दिए । सबै व्यवसायीका आइडीका लागि आएका निवेदन लिएर साउदी आइडी दिन दूतावास तयार भएको अध्यक्ष भण्डारीले प्रस्ट पारे ।
‘दुई आइडी आवश्यक ठानेका व्यवसायीले राजदूतावासले दिएको फम्र्याटमा आइडी बनाएर प्रत्येक शुक्रबार पेस गर्दा तुरुन्तै सञ्चालक वा एजेन्सी प्रतिनिधि दुई जनाकै नाममा आइडी पाउन सक्ने पनि महामहिम राजदूत अबु हमिदले बताउनुभएको छ,’ उनले भने ।
यसअघि दूतावासले उपलब्ध गराउने साउदी आइडी नपाएका कारण वैदेशिक रोजगार व्यवसायीले भिसाका लागि प्रक्रिया अगाडि बढाउन समस्या भोग्दै आएका थिए । साउदी आइडी नहुँदा कतिपय मागपत्रसमेत गुमाउनुपरेको व्यवसायीले गुनासो गर्दै आएका छन् । आइडी नपाएका कतिपय व्यवसायीले भने अइडी भएका म्यानपावर कम्पनीको सहायता लिनुपरेको थियो ।
व्यवसायी समस्यामा परेपछि संघले साउदी आइडी सहज बनाउनका लागि निरन्तर पहल गर्दै आएको थियो । यही क्रममा शुक्रबार भएको भेटवार्ताले सकारात्मक नतिजा ल्याएको अध्यक्ष भण्डारीको भनाइ छ । आवश्यक पर्ने सबै म्यानपावर कम्पनीलाई दुईवटासम्म आइडी दिने भएसँगै साउदी अरेबियामा कामदार पठाउने व्यवसायीलाई राहत मिल्ने संघको अपेक्षा छ ।
०००
-1752335779.jpg)
