काठमाडौं – श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने कामदारको स्वास्थ्य परीक्षण गर्ने स्वास्थ्य संस्थाहरुलाई यही पुस मसान्तभित्र अध्यावधिक गर्न समयसीमा तोकेको छ । मन्त्रालयले अध्यावधिकका लागि आवश्यक कागजात पेस गर्न ती स्वास्थ्य संस्थाहरुलाई सूचित गराएको छ ।
मन्त्रालयले जारी गरेको सूचनाअनुसार वैदेशिक रोजगार ऐनको दफा ७२ एवं वैदेशिक रोजगार नियमावली २०६४ को नियम ४५ (क) मा रहेको प्रावधानबमोजिम वैदेशिक रोजगारमा जाने कामदारको स्वास्थ्य परीक्षण गर्ने सूचीकृत स्वास्थ्य संस्थाहरुले सूचीकरण नवीकरण गर्नुपर्ने कानुनी व्यवस्था रहेको उल्लेख गरेको छ ।
साथै, वैदेशिक रोजगारमा जाने कामदारको स्वास्थ्य परीक्षण गर्ने स्वास्थ्य संस्था सूचीकरण, नवीकरण तथा अनुगमनसम्बन्धी कार्यविधि २०७२ को दफा ४ बमोजिम मन्त्रालयमा सूचीकृत स्वास्थ्य संस्थाहरुले आवश्यक कागजातसहित यही पुुस मसान्तभित्र पेस गर्न आग्रह गरिएको छ ।
मन्त्रालयको सूचनामा अध्यावधिकका लागि स्वास्थ्य संस्था सूचीकरण प्रमाणपत्रको प्रतिलिपि, अघिल्लो आर्थिक वर्षमा नवीकरण भएको भए सो प्रमाणपत्रको प्रतिलिपि, अघिल्लो अर्थिक वर्षको कर चुक्ता प्रमाणपत्रको प्रतिलिपि, अघिल्लो आर्थिक वर्षको लेखापरीक्षण प्रतिवेदनको प्रतिलिपि पेस गर्न भनिएको छ ।
यसैगरी स्वास्थ्य मन्त्रालय वा अन्तर्गतबाट संस्था सञ्चालन स्वीकृतिको प्रमाणपत्र र नवीकरण भएको प्रमाणपत्रको प्रतिलिपिसमेत माग गरिएको छ । स्वास्थ्य संस्थाको नाम वा ठेगाना परिवर्तन गरेको भए सम्बन्धित निकायबाट सोको स्वीकृति प्राप्त गरेको प्रतिलिपि बुझाउनुपर्ने छ ।
