काठमाडौं– दक्षिण कोरियामा रोजगारीका लागि कामदार पठाउन लिइएको कोरियन भाषा परीक्षामा १२ प्रतिशतमात्र उत्तीर्ण भएका छन् । कोरियाको मानव संसाधन विकास सेवा (एचआरडी) ले गत मंसिर २६ देखि पुस २ गतेसम्म लिएको पहिलो चरणको भाषा परीक्षाको नतिजा शनिबार सार्वजनिक गरिको हो । यो म्यानुफ्याक्चरिङ समूहतर्फ कामदार लैजान लिइएको परीक्षाको नतिजा हो ।
श्रम, रोजगार तथा सामाजिक सुरक्षा मन्त्रालयअन्तर्गतको इपिएस कोरिया शाखाले जारी गरेको सूचनाअनुसार कूल २६ हजार ७२ जना परीक्षामा सहभागी भएकामा तीन हजार १२६ जनामात्र उत्तीर्ण भएका हुन् । परीक्षाका लागि ३६ हजार १७९ जनाको आवेदन परे पनि ७२.१ प्रतिशत अर्थात् २६ हजार ७२ जना सहभागी भएका थिए ।
नेपालको श्रम मन्त्रालय र गणतन्त्र कोरियाको श्रम तथा रोजगार मन्त्रालयबीच सम्पन्न समझदारीपत्रअन्तर्गत नेपाली कामदार लैजान कोरियन भाषा परीक्षा सञ्चालन गरिएको इपिएस कोरिया शाखाले जनाएको छ । कोरिया नेपालीहरुको आकर्षक रोजगार गन्तव्यको रुपमा रहेको छ । दुई सरकारबीच भएको जिटुजी सम्झौताअनुसार त्यहाँ नेपाल सरकार आफैंले कामदार पठाउँदै आएको छ । निःशुल्क जान पाइने र आकर्षक कमाइ हुने भएकाले कोरिया जान लाखौं नेपाली युवाहरु प्रयासरत रहेका छन् । यद्यपि, सीमित कोटामा पर्न वर्षौं प्रयास गर्दा पनि अधिकांश असफल हुने गरेका छन् ।
भाषा परीक्षा उत्तीर्ण हुनेबित्तिकै रोजगारी सुनिश्चित भने नहुने इपिएस शाखाका अधिकारीहरु बताउँछन् । ती अधिकारीका अनुसार भाषा परीक्षा भएकाले अब दोस्रो चरणको स्किल टेस्ट र कम्पिटेन्सी टेस्टमा सहभागी हुनुपर्छ । यी दुवै टेस्टमा उत्तीर्ण भएपछि बल्ल रोस्टरमा पर्न योग्य हुन्छन् । रोस्टरमा परेकाबाट पनि छनोटमा परेका कामदार मात्र कोरिया जान पाउँछन् । रोस्टरमा रहेका नामावली सूचीबाट कोरियास्थित सम्बन्धित कम्पनीले नै कामदार छनोट गरी पठाउने गर्दछ । त्यसरी छनोट भएपछि मात्र भिसा प्रक्रिया पूरा गरी कोरिया जाने गर्दछन् ।
‘आकर्षक कमाइ हुने र सरकारीस्तरबाट जान पाउने भएपछि सुरक्षित हुने भएकाले कोरिया जाने सपना बोकेका युवाहरु लाखौं संख्यामा छन्,’ इपिएस शाखाका ती अधिकारीले भने, ‘तर, सीमित कोटाका कारण सबैले अवसर पाउँदैनन् ।’ यद्यपि, दक्षिण कोरियाली सरकारले पछिल्लो समय नेपाली कामदारका लागि कोटा बढाएको छ । मुलुकमा रोजगारीको अवसर नहुँदा दैनिक करिब दुई हजार युवा विदेसिने गरेको वैदेशिक रोजगार विभागको तथ्यांक छ । यसरी विदेसिने युवाहरुले पठाउने रेमिट्यान्सले मुलुकको अर्थतन्त्र धान्ने काम गरेको छ । मुलुकमा विदेशी मुद्रा भित्र्याउन योगदान गरिरहेको वैदेशिक रोजगारलाई सकारात्मक रुपमा लिनुपर्ने तर यसैका कारण गाउँ रित्तिँदै जानु चिन्ताको विषय भएको सरोकारवालाहरु बताउँछन् ।
