काठमाडौं– ओमानको मस्कटस्थित नेपाली दूतावासले वैदेशिक रोजगारीका लागि त्यहाँ कार्यरत नेपालीहरुलाई लक्षित गर्दै सामाजिक सुरक्षा योजनामा आबद्धतासम्बन्धी विशेष कार्यक्रम सञ्चालन गरेको छ । दूतावासले सामाजिक सुरक्षा कोषसँगको सहकार्यमा रोजगारीका लागि ओमानमा रहेका नेपाली श्रमिकहरुलाई उक्त योजनामा आबद्धता तथा योगदानको नियमितता गर्ने कार्यसम्बन्धी दुईदिने सचेतनामूलक कार्यक्रम सञ्चालन गरेको हो ।
उक्त कार्यक्रममा सहभागी श्रमिकहरुलाई सामाजिक सुरक्षा योजनालगायत नेपाल सरकारले अवलम्बन गरेका नीति नियम र त्यसले पार्ने प्रभावका सम्बन्धमा राजदूत डोरनाथ अर्यालले प्रकाश पारेका थिए । त्यस्तै सामाजिक सुरक्षा योजनामा आबद्ध हुने प्रक्रिया र योजनाको महŒव तथा फाइदाबारे कोषका उपकार्यकारी निर्देशक विवेक पन्थीले विस्तृत व्याख्या गरेको दूतावासले जनाएको छ । सामाजिक सुरक्षा योजनासम्बन्धी सचेतनामूलक कार्यक्रम सञ्चालन गर्ने उद्देश्यका साथ पन्थीसहित सहायक निर्देशक राधिका निरौला र सूचना प्रविधि अधिकृत राजेश चापागाईंको टोली ओमान भ्रमणमा रहेको छ ।
त्यसैगरी सोही कार्यक्रममा वैदेशिक रोजगार तथा ओमानको श्रम कानुनसम्बन्धी अलग डेक्स खडा गरेर श्रमिकहरुलाई आवश्यक जानकारी प्रदान गरिएको श्रम सहचारी गोविन्दप्रसाद आचार्यले बताए । ‘ओमानमा रहेका नेपाली श्रमिकहरुलाई समूहगतरुपमा समाजिक सुरक्षा कोषमा आबद्ध हुने र श्रम तथा कन्सुलरसम्बन्धी अभिमुखीकरण सेवा दिइयो,’ उनले भने, ‘कार्यक्रममा उपस्थित अधिकांश सहभागीहरुलाई सामाजिक सुरक्षा प्रणालीका बारेमा पर्याप्त जानकारी नभएको पाइएकाले अभिमुखीकरण कार्यक्रमबाट सकरात्मक प्रभाव परेको छ ।’
सेवाग्राहीहरुले ओमानमा पहिलोपटक सचेतनामूल कार्यक्रम आयोजना गरेकोमा खुसी व्यक्त गर्दै आगामी दिनमा पनि यस्ता किसिमका सेवालाई निरन्तरता दिन र सामाजिक सुरक्षा तथा श्रम स्वीकृतिसम्बन्धी सेवा राजदूतावासबाटै प्रदान गर्न आग्रह गरेको आचार्यले बताए ।विगतमा कार्यालय खुलेको दिनमा सेवा लिन आउन असहज हुने नेपाली श्रमिकहरुलाई लक्षित गर्दै सहजताका लागि सार्वजनिक बिदाकै दिनमा पनि राहदानी तथा कन्सुलर सेवासम्बन्धी शिविर सञ्चालन गर्दै आएको भए पनि सामाजिक सुरक्षासम्बन्धी अभिमुखीकरण कार्यक्रम पहिलोपटक आयोजना गरिएको दूतावासले जनाएको छ । कार्यक्रममा ४०० भन्दा बढी सेवाग्राही सहभागी रहेको तथा आगामी दिनमा पनि सामाजिक सुरक्षामा आबद्धता तथा श्रम कानुनसम्बन्धी जानकारी एवं सेवा प्रदान गर्दै जाने दूतावासले जनाएको छ ।
सरकारले वैदेशिक रोजगारीमा रहेका नेपाली श्रमिकहरुलाई सामाजिक सुरक्षा योजनामा आबद्ध गराउँदै लैजाने नीति लिएको छ । यसको कार्यान्वयनका लागि वैदेशिक रोजगारीमा जानुपूर्व श्रम स्वीकृति (नयाँ÷पुरानो) लिँदा नै कोषमा अनिवार्य योगदान गर्नुपर्ने व्यवस्था गरिएको छ । यद्यपि, पहिलेदेखि वैदेशिक रोजगारीमा रहेका र विदेश गइसकेपछि कोषमा योगदान नगर्ने श्रमिकहरुको संख्या बढ्दै गएको बताइएको छ । त्यस्ता श्रमिकहरुलाई लक्षित गर्दै सम्बन्धित मुलुकमा नै गएर सचेतनामूलक अभिमुखीकरण कार्यक्रम सञ्चालन गर्ने अभियानअन्तर्गत ओमानबाट सुरु गरिएको कोषले जनाएको छ ।
