काठमाडौं– इजरायलले दीर्घकालीन स्याहार केन्द्रमा काम गर्न छनोट भएका सहायक कामदार (केयर गिभर) लाई यथाशीघ्र पठाउन नेपाल सरकारसँग आग्रह गरेको छ । अमेरिकाको मध्यस्थतामा लेबनानको हिजबुल्लाह समूहसँग युद्धविरामको सहमति घोषणा गरेको इजरायलले केयर गिभर पठाउन नेपालसँग आग्रह गरेको हो ।
युद्धविराम घोषणा गरेलगत्तै इजरायलले नेपालबाट केयर गिभर लैजाने सम्बन्धमा नेपालका लागि इजरायली राजदूत श्मुलिक एरिई बासले श्रम, रोजगार तथा सामाजिक सुरक्षामन्त्री शरतसिंह भण्डारीलाई भेटेर सो आग्रह गरेका हुन् । राजदूत बासले बुधबार मन्त्री भण्डारीसँग शिष्टाचार भेट गर्दै नेपाल र इजरायलबीच भएको द्विपक्षीय श्रम सम्झौताको कार्यान्वयन, केयर गिभरका रुपमा छनोट भएका नेपाली कामदारहरुलाई यथाशीघ्र इजरायल पठाउन आग्रह गरेको श्रम मन्त्रालयले जनाएको छ ।
राजदूत बासले हाल इजरायलमा युद्धविराम सुरु भएको हुँदा केयर गिभरमा छनोट भएका सबै नेपाली कामदारलाई क्रमशः लैजाने जानकारी गराएको मन्त्रालयका सहायक प्रवक्ता वसन्तबहादुर बोहराले बताए । उनका अनुसार राजदूत बासले नेपालीहरुलाई केयर गिभरबाहेक कृषि, निर्माणलगायतका अन्य क्षेत्रमासमेत रोजगारी उपलब्ध गराउने विषयमा छलफल गरेका थिए ।
इजरायलले कामदारको स्रोत मुलुकको रूपमा नेपाललाई सूचीकृत गर्ने, कृषि प्रविधि हस्तान्तरण गर्ने, सीप विकास, भाषा तालिम, स्वास्थ्य परीक्षण, श्रमिकको हक अधिकार संरक्षण र सुरक्षालगायतका विषयमा दुवै देशबीच थप कूटनीतिक पहल गर्ने विषयमा छलफल भएको मन्त्रालयले उल्लेख गरेको छ ।राजदूत बाससँगको भेटमा मन्त्री भण्डारीले केयर गिभरको रुपमा इजरायल जान छनोट भई पर्खाइमा रहेका नेपालीहरुलाई यथाशीघ्र पठाउनका लागि परराष्ट्र मन्त्रालयसँग समन्वय र पहल गर्ने बताए । उनले कामदारको सीप विकास, भाषा तालिम, स्वास्थ्य परीक्षणलगायतका क्षेत्रमा कार्य गर्ने र आगामी दिनमा कृषि, निर्माणलगायतका क्षेत्रमा थप सीपयुक्त जनशक्ति पठाउने सम्बन्धमा सहकार्य गर्नुपर्नेमा जोड दिएको सहायक प्रवक्ता बोहराले बताए ।
राजदूत बासले नेपालबाट कामदार लैजान आतुर रहेको सन्देश दिँदै नेपाली कामदार केयर गिभरको क्षेत्रमा उत्कृष्ट रहेको भन्दै प्रशंसा गरेका थिए । यसअघि पनि इजरायलले आफ्नो मुलुकमा कुनै सुरक्षा जोखिम नरहेको भन्दै नेपाल सरकारलाई केयर गिभरमा छनोट भएका नेपालीलाई पठाउन आग्रह गर्दै आएको थियो ।
हाल इजरायलमा झण्डै चार हजार ५०० नेपाली काम गरिरहेको परराष्ट्र मन्त्रालयको तथ्यांकले देखाएको छ । अघिल्लो वर्ष केयर गिभरको रुपमा झण्डै एक हजार २०० नेपाली रोजगारीका लागि इजरायल गइसकेका छन् । सन् २०२४ का लागि इजरायल जान दुई हजार १०० नेपाली केयर गिभरमा छनोट भएका छन् । इजरायल युद्धरत अवस्थामा रहेकाले सुरक्षा चुनौती हुने भन्दै चौतर्फी आलोचना भएपछि नेपाल सरकारले छनोटमा परेका केयर गिभरलाई स्थिति सामान्य नभएसम्म नपठाउने निर्णय गरेको थियो । इजरायलले सन् २०२३ अक्टोबरदेखि हमास र हिज्बुल्ला समूहसँग युद्ध गरे पनि बुधबार युद्धविराम घोषणा गरेको छ ।
हुण्डी कारोबारलाई निरुत्साहित गर्दै दूतावास
इजरायलस्थित नेपाली राजदूतावासले हुण्डीमार्फत हुने कारोबारलाई निरुत्साहित गर्ने नीति लिएको छ । दूतावासले हुण्डीबाट नेपालमा पैसा (रकम) नपठाएको स्वघोषणा गर्ने नेपालीलाई तुरुन्त सेवा दिने घोषणा गरेको छ । दूतावासले एक सूचना जारी गर्दै नेपालमा हुण्डीमार्फत पैसा पठाउने गरेको जानकारीमा आएको भन्दै त्यसको न्यूनीकरणका लागि हुण्डी प्रयोग गरेको छैन भनी दूतावासमा स्व–घोषणा गर्नेलाई थप सेवाहरु प्रदान गर्ने उल्लेख गरेको छ ।
हुण्डी प्रयोग नगरेको स्व–घोषणा गर्ने सेवाग्राहीलाई दूतावासले राहदानी सेवासम्बन्धी सेवा तुरुन्त उपलब्ध गराउने, अन्य प्रमाणीकरण कागजातहरू तुरुन्त उपलब्ध गराउने, आय/आम्दानीका पत्र आवश्यक परे तुरुन्त दिन सकिने जस्ता सेवाहरु शीघ्र उपलब्ध गराउने बताएको छ । यस्तै जानी÷नजानी कोही कतै नेपालीहरुबाट हुँदै आएको हुण्डी व्यवहारका कारण भएका नोक्सानी र बेफाइदाबारे सबै पक्ष जानकार नै भएको जनाउँदै त्यसको न्यूनीकरणका लागि सहयोग गर्न पनि दूतावासले आग्रह गरेको छ ।
त्यस्तै हुण्डी प्रयोग नगरेको स्वघोषणा नगर्ने सेवाग्राहीलाई १० दिनको ‘वर्किङ आवर’ राखेरमात्रै सेवा दिइने दूतावासले प्रस्ट पारेको छ । दूतावासले एक हप्ताअघि पनि इजरायल रोजगारीमा रहेका नेपालीहरुलाई आफ्नो आम्दानीको अंश (पैसा) नेपाल पठाउँदा वैधानिक माध्यमबाट मात्रै पठाउन सूचित गरेको थियो ।
