काठमाडौं– संयुक्त अरब इमिरेट्स (युएई) सरकारले लामो समयदेखि अवैधरुपमा बसिरहेका आप्रवासी कामदार र विदेशी नगारिकलाई आममाफी दिनेगरी घोषणा गरेको ‘एम्नेस्टी २०२४’ को समयावधि दुई महिना थप गरेको छ । युएईले विशेषः गरेर अवैधरुपमा रहेका आप्रवासी कामदारहरुलाई लक्षित गर्दै उनीहरुलाई घर फिर्ती वा वैधरुपमा बस्ने अवस्था सिर्जना गर्न गत सेप्टेम्बर १ देखि अक्टोबर ३० सम्म दुई महिनाको समयावधि दिएर आममाफी कार्यक्रम ल्याएको थियो ।
युएईस्थित नेपाली दूतावासले एक विज्ञप्ति जारी गर्दै युएई सरकारले घोषणा गरेको एम्नेस्टी २०२४ को समयावधि दुई महिना थप गरी डिसेम्बर ३१ सम्म लागू हुने बताएको छ । दूतावासका अनुसार युएईमा अवैधरुपमा रहेका नेपाली कामदारहरुले वैधता प्राप्त गर्न अझै थप दुई महिनाको समय पाउने छन् । आममाफी दिने व्यवस्था लागू गरेसँगै लामो समयदेखि अवैधरुपमा रहेका आप्रवासी कामदारहरुले वैधता प्राप्त गर्ने बाटो खुलेको दूतावासले जनाएको छ । दूतावासले निर्धारित समयमा तोकिएको प्रक्रिया पूरा नगर्ने कामदारहरु जुनसुकै बेला कारबाहीमा पर्न सक्नेतर्फ सचेत गराएको छ ।
विभिन्न कारणबाट रोजगारीको सिलसिलामा वा भिजिट भिसामा आइ ‘ओभर स्टे’ भई जरिवाना बुझाउन नसकी स्वदेश फर्कन नसकेका आप्रवासी कामदारहरुलाई लक्षित गरि एम्नेस्टी २०२४ ल्याएको दूतावासले उल्लेख गरेको छ । अतः थपिएको समयावधि भित्र वर्किङ भिसा÷भिजिट भिसामा आएर रन अवे (कम्पनी छोडेर भाग्ने)÷ओभर स्टेलगायतका जरिवाना तथा अध्यागमनसम्बन्धी समस्या भोगिरहेका नेपाली कामदारहरु एम्नेस्टीमा सहभागी भई लाभान्वित हुनसक्ने बताइएको छ । तोकिएको प्रक्रिया पूरा गरी नेपाल फर्कन वा युएईभित्रै बस्न कानुनी आधार निर्माण गर्न पनि दूतावासले आग्रह गरेको छ ।
आममाफी कार्यक्रममा सहभागी जो कोहीले युएईको अध्यागमनसँग सम्बन्धित जरिवाना वा कुनै शुल्क तिर्नु नपर्ने बताइएको छ । एम्नेस्टीमा सहभागी भई युएईमा नै रहन चाहने व्यक्तिले त्यहाँको मानव संशाधन मन्त्रालयबाट जारी ‘जब अफर लेटर’ लिई आफ्नो ‘स्टाटस’ परिवर्तन गर्नुपर्ने छ । एम्नेस्टीका निम्ति आवेदन दिन आफ्नो भिसा भएको इमिरेट्सभित्रका अध्यागमनमा मात्र सम्पर्क गर्नुपर्ने दूतावासले उल्लेख गरेको छ ।
आममाफीको सुविधा उपयोग गरी नेपाल फर्कन चाहने व्यक्तिहरुका लागि ट्राभल डकुमेन्ट उपलब्ध गराउन दुबईस्थित अल अवीर इमिग्रेसनमा रहेको ‘नेपाल हेल्प डेस्क’बाट प्रत्येक हप्ता बुधबारका दिनमात्र दूतावासका कर्मचारीले सेवा प्रदान गर्ने दूतावासले जनाएको छ । यस्तै २०२४ सेप्टेम्बर १ देखि जरिवानामा परेका तथा अध्यागमन नियम उल्लंघन गरेका व्यक्तिहरुलाई आममाफी सुविधा लागू हुने छैन ।
एम्नेस्टी २०२४ मा सहभागी भएका नेपाली कामदारले सम्बन्धित अध्यागमन कार्यालयले दिएको ‘फाइन क्लियरेन्स’ तथा प्रहरी रिपोर्ट पेस गरेमा दूतावासले उनीहरूलाई नेपाल फर्कन निःशुल्क एकतर्फी यात्रा अनुमतिपत्र (ट्राभल डकुमेन्ट) उपलब्ध गराउने छ । यद्यपि, नेपाल फर्कने हवाई टिकटको व्यवस्था कामदार स्वयंले गर्नुपर्ने बताइएको छ ।
-1752335779.jpg)
