काठमाडौं– श्रम, रोजगार तथा सामाजिक सुरक्षामन्त्री शरतसिंह भण्डारीले मन्त्रालयको कार्यभार सम्हालेको १०० दिन पुगेको अवसरमा कार्य सम्पादन तथा अपेक्षित उपलब्धिको समीक्षा विवरण सार्वजनिक गरेका छन् । गत असार ३१ गते श्रममन्त्रीमा नियुक्त भएका भण्डारीले उक्त अवधिमा गरेका कार्यसम्पादन र अगामी योजना समेटेर सय दिनको प्रगति विवरण सार्वजनिक गरेका हुन् ।
कुनै पनि मन्त्रालय सम्हालेको सय दिनलाई मन्त्रीहरुले महŒव दिँदै आगामी कार्यकालको दिशानिर्देश हुनेगरी प्रगति विवरण सार्वजनिक गर्ने चलन छ । यसलाई मन्त्रीहरुको ‘हनिमुन पिरियड’ पनि भन्ने गरिन्छ । सत्तामा लामो अनुभव भएका मन्त्री भण्डारीले हनिमुन अवधिमा वैदेशिक रोजगार क्षेत्रमा देखिनेगरी ठोस काम गर्न नसकेको पाइएको छ । जसकारण उनको प्रगति विवरण औपचारिकतामा सीमित देखिएको छ । यद्यपि, श्रम तथा वैदेशिक रोजगारीका क्षेत्रमा केही कार्य सम्पन्न गरेको र केही कार्य प्रक्रियामा नै रहेको उनले उल्लेख गरेका छन् ।
मन्त्री भण्डारीले कार्यस्थलमा आधारित सुरक्षा बिमाको काम सम्पन्न गरेको जनाएका छन् । प्रधानमन्त्री रोजगार कार्यक्रमअन्तर्गतका आयोजनामा खटिने श्रमिक र रोजगार सेवा केन्द्रमा कार्यरत कर्मचारी गरी ६५ हजारको सामूहिक सुरक्षा बिमा गरी सामाजिक सुरक्षाको प्रत्याभूति गराएको उल्लेख गरेका छन् । जसमध्ये ६२ हजार २५९ जनाको सामूहिक सुरक्षा बिमा भएको बताइएको छ ।
त्यस्तै, वैदेशिक रोजगारसम्बन्धी सूचना तथा परामर्शका लागि थप ३३ जिल्लामा आप्रवासी स्रोत केन्द्रको स्थापना गर्ने कार्य अघि बढेको जनाइएको छ । हाल ४४ जिल्लामा सञ्चालित आप्रवासी स्रोत केन्द्र विस्तार भई ७७ वटै जिल्लामा स्थापना गरी सेवा प्रवाह गर्ने लक्ष्य लिइएको उनले बताएका छन् । आप्रवासी स्रोत केन्द्र स्थापनाका लागि ३३ वटै जिल्ला प्रशासन कार्यालयलाई पत्राचार गरिएको छ । यसबाट जिल्लास्तरबाट नै वैदेशिक रोजगारसम्बन्धी सूचना र परामर्श प्रदान हुने मन्त्रालयले जनाएको छ ।
मन्त्री भण्डारीले आफ्नो कार्यकालको पहिलो सय दिनमा मधेस प्रदेशमा निर्माण हुने व्यावसायिक प्रशिक्षण प्रतिष्ठानको तालिम केन्द्र निर्माण कार्यलाई प्राथमिकतामा राखेर जग्गा प्राप्ति गर्ने प्रक्रिया अघि बढेको उल्लेख गरेका छन् । त्यस्तै, सामाजिक सुरक्षा कोषमा रोजगारदाता र योगदानकर्ताहरुको थप सूचीकरण गर्ने कार्यलाई पनि मन्त्री भण्डारीले सय दिने कार्यकालको उपलब्धिभित्र राखेका छन् ।
यस अवधिमा ३०० रोजगारदाता थप सूचीकरण गर्ने अपेक्षा गरे पनि त्यो संख्या बढेको छ । जसमा ४६६ रोजगारदाता थपिएर हालसम्म १९ हजार ६७६ रोजगारदाता कोषमा सूचीकृत भएका छन् । त्यस्तै एक लाख ५० हजार योगदानकर्ता थप गर्ने लक्ष्य लिएकोमा एक लाख ९८ हजार ५६३ जना सूचीकरण भएका छन् । हाल सूचीकरण हुने योगदानकर्ताको संख्या १६ लाख ९० हजार १०३ पुगेको प्रगति विवरणमा समेटिएको छ ।
यस्तै गौतमबुद्ध अन्तर्राष्ट्रिय विमानस्थल भैरहवा र क्षेत्रीय विमानस्थल पोखराबाटै श्रम स्वीकृति प्रदान गर्ने कार्य अघि बढाइएकोमा सबै सरोकारवालाहरुसँग छलफल गरी प्रतिबद्धता प्राप्त भई सेवा प्रवाह गर्न तयारी पूरा गरिएको उल्लेख छ । मन्त्री भण्डारीले आफ्नो सय दिने कार्यावधिको उपलब्धिमा तीन देशसँग द्विपक्षीय श्रम सम्झौता तथा नवीकरण गर्ने तयारीलाई समेत राखेका छन् । जसमा दक्षिण कोरिया (इपिएस) र मलेसियासँगका द्विपक्षीय श्रम सम्झौताको नवीकरण र ओमानसँग द्विपक्षीय श्रम सम्झौताको प्रक्रिया अगाडि बढाइएको मन्त्री भण्डारीले जनाएका छन् ।
कोरियासँग इपिएस नवीकरणका लागि रोजगार व्यवस्थापन महाशाखा प्रमुखको संयोजकत्वमा कार्यदल गठन गरेर कार्यदलले काम गरिरहेको जनाइएको छ । एचआरडी कोरियासहितको सहभागितामा संयुक्त बैठक भई अन्तिम रुप दिन बाँकी रहेको बताइएको छ ।
यस्तै, नेपालको तर्फबाट मलेसियासँगको श्रम सम्झौतालाई अन्तिम रुप दिई परराष्ट्र मन्त्रालयमार्फत मलेसिया सरकारसमक्ष पठाइएको र जवाफ प्राप्त हुन बाँकी रहेको उल्लेख छ । त्यस्तै ओमानसँगको द्विपक्षीय श्रम सम्झौताका लागि नेपालमा उच्चस्तरीय छलफल भई प्रारम्भिक सहमति भई ओमान पठाइएको र ओमान सरकारको तर्फबाट कानुनी प्रक्रिया पूरा गरी नेपालले पाएपछि नेपाल सरकार मन्त्रिपरिषद् पठाउनेगरी अन्तिम तयारी भइरहेको बताइएको छ ।
वैदेशिक रोजगारीमा जाने व्यक्तिलाई विनाधितो कर्जा (ऋण) उपलब्ध गराउने योजनालाई मूर्तरुप दिन कार्यविधिको अन्तिम मस्यौदा तयार भएको र स्वीकृतिको चरणमा रहेको विषयलाई मन्त्री भण्डारीले सय दिने कार्यसम्पादन तथा उपलब्धि मानेका छन् ।
