काठमाडौं– रोजगारीका लागि युरोप जाने नेपालीको संख्या दिनानुदिन बढ्दै गएको देखिएको छ । वैदेशिक रोजगार विभागको पछिल्लो तथ्यांकमा यस्तो देखिएको हो । यद्यपि, युरोपमा मागपत्र प्रमाणीकरणको समस्या रहेकाले व्यक्तिगत श्रम स्वीकृतिमा जानेको संख्या बढेको पाइएको छ ।
युरोपेली मुलुक रोमानिया नेपालीहरुको आकर्षक श्रम गन्तव्य रहे पनि त्यहाँ संस्थागत (म्यानपावरबाट) भन्दा पनि व्यक्तिगत श्रम स्वीकृति लिएर रोजगारीका लागि जाने गरेको देखिएको छ । नेपाल र रोमानियाबीच द्विपक्षीय श्रम सम्झौता भए पनि पछिल्लो समय व्यक्तिगतरुपमा जाने कामदारको संख्या बढेपछि सरकारले निगरानीसमेत बढाएको छ ।
व्यक्तिगत श्रम स्वीकृतिले जोखिम बढाउने भन्दै म्यानपावरबाट भन्दा पनि व्यक्तिगतरुपमा जानेको संख्या बढ्नुको कारण खोजी गर्नुपर्ने अवस्था आएको श्रम, रोजगार तथा सामाजिक सुरक्षा मन्त्रालयका सहसचिव एवं प्रवक्ता डण्डुराज घिमिरेले बताए । व्यक्तिगतरुपमा रोमानिया जाने नेपालीको संख्या उच्च देखिएकाले यसलाई सूक्ष्मरुपमा हेर्न खोजिएको छ,’ उनले भने, ‘व्यक्तिगतरुपमा जानेहरु चर्को आर्थिक भारमा नपरून्, नठगिऊन् र सुरक्षित रोजगारीको प्रत्याभूति हुनुपर्छ भनेर केही प्रोटोकल व्यवस्था गर्न खोजिएको छ ।’
विभागको तथ्यांकअनुसार रोजगारीका लागि रोमानिया जाने नेपालीको संख्या उच्च दरले बढेको छ । विभागका अनुसार आव २०७८/७९ मा व्यक्तिगत श्रम स्वीकृति लिएर रोमानिया जाने नेपालीको संख्या एक हजार २४५ जना थियो । आव २०७९/८० मा यो संख्या पाँच हजार ४२९ पुग्यो भने गत आव २०८०/८१ मा झनै बढेर आठ हजार ४६४ पुगेको छ । पछिल्लो तीन वर्षको विवरण हेर्ने हो भने पनि व्यक्तिगतरुपमा रोमानिया जाने कामदारको संख्या ठूलो देखिन्छ ।
व्यक्तिगतरुपमा रोमानिया जाने नेपालीको संख्या बढ्दै गए पनि म्यानपावरमार्फत जाने संख्यामा कमी आएको छ । आव २०७८/७९ मा म्यानपावरले पाँच हजार १६६ जनालाई रोमानिया पठाएका थिए । आव २०७९/८० मा यो संख्या बढेर सात हजार ७०८ पुगे पनि गत आवमा चार हजार २३६ जनामात्रै म्यानपावरबाट रोमानिया पुगे ।व्यक्तिगत श्रम स्वीकृति लिएर जानेको संख्या बढ्दै गएका कारण आगामी दिनमा समस्या नआओस् भनेर सरकारले रोमानिया रोजगारीलाई व्यवस्थित गर्न खोजिरहेको प्रवक्ता घिमिरेले बताए । युरोपबाट आएका मागपत्र प्रमाणीकरणमा समस्या भएका कारण पनि व्यक्तिगतरुपमा जानेको संख्या बढेको हुनसक्ने भन्दै यसरी जाँदा ठगिने र जोखिममा परिने संभावना रहेकाले सम्बन्धित पक्षलाई सचेत रहन घिमिरेले आग्रह गरे ।
