काठमाडौं– वैदेशिक रोजगार व्यवसायीहरुले विना प्रमाण उजुरी दर्ता गर्न नहुने माग गरेका छन् । नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एशोसिएसनमा आवद्ध व्यवसायीहरुको प्रतिनिधि मण्डलले वैदेशिक रोजगार विभागका महानिर्देशक सूर्य बहादुर खत्रीसँग बिहीबार भेट गरी उक्त माग गरेका हुन् ।
लोकतान्त्रिक एशोसियसनले महानिर्देशक खत्रीलाई सफल कार्यकालको शुभकामना दिंदै पछिल्लो समय विना प्रमाण उजुरी दर्ता गर्दा नकारात्मक परिणामहरू देखा परेको उल्लेख गरेको छ । विशेष गरी व्यक्तिगत लेनदेन र अन्य विभिन्न प्रकारका घटनालाई समेत वैदेशिक रोजगारीको नाममा उजुरी दर्ता गरिनुले विभागको कार्य क्षमतासमेत असर पर्न गएको भन्दै महानिर्देशक खत्रीको ध्यानाकर्षण गराइएको छ । तसर्थ ईजाजतवाला संस्थाहरु (म्यानपावर कम्पनी)का बिरुद्धमा उजुरीहरू दर्ता गर्नु अघि प्रमाणको आधार अनिवार्य बनाउनु पर्नेमा एशोसियसनले जोड दिएको छ ।
त्यस्तै केही व्यक्ति तथा समुहहरुले आफ्नो स्वार्थ पूर्ति गर्नको लागि पनि अनाधिकृत उजुरी दर्ता गर्दा व्यवसायीहरु समस्यामा पर्ने गरेको बताइएको छ । एशोसियसनले महानिर्देशक खत्रीलाई बुझाएको अनुरोधपत्रमा केहि व्यक्तिहरु मिडियाकर्मी, सामाजिक अभियन्ता, वा अन्य तेस्रो पक्षका नातेदारका रूपमा विभागमा प्रवेश गरेर उजुरी दर्ता गर्ने गरेकाले रोक्नुपर्ने उल्लेख गरिएको छ । उजुरीका कारण व्यवसायीहरुले मानसिक तनावका साथै आर्थिक नोक्सानी खेप्नु परेको भन्दै त्यस्ता उजुरीहरुमा विभागलेसमेत अनावश्यक समय र स्रोत खेर फाल्नु परेको एशोसियसनको जिकिर छ ।
अनाधिकृत तथा व्यवसायी लक्षित उजुरी लिंदा प्रमाणका आधारमा लिई समस्या समाधानको लागि विभागले सम्बन्धी व्यक्तिहरुको पहिचान गर्न परिचयपत्र, पिडितहरुसँगको सम्बन्ध यकिन तथा अनिवार्य गर्नुपर्नेमा जोड दिइएको छ । जसका कारण श्रमिकहरुको समस्याको निष्पक्ष समाधानलाई सुनिश्चित गर्न र व्यवसायीहरुलाईसमेत कानूनी सुरक्षा प्रदान गर्न मद्दत पुग्ने एशोसियसनले विश्वास लिएको छ ।
त्यसैगरी कुनै पनि व्यवसायीविरुद्ध उजुरी दर्ता गर्नु अघि अनिवार्यरुपमा मेलमिलापको प्रक्रियालाई अघि बढाउन विभागसँग माग गरिएको छ । सम्बन्धित पक्षहरुसँग प्रारम्भिक छलफल नगरी उजुरी दर्ता गर्दा लामो कानूनी प्रक्रियामा फस्नुपर्ने स्थिति आउने भएकाले विना आधार र प्रमाण उजुरी दर्ता नगर्न विभागका महानिर्देशक खत्रीलाई आग्रह गरिएको एशोसियसनका महासचिव महेश कुमार बस्नेतले बताए ।
‘विभाग परिसरमा नै मेलमिलाप कक्ष छ र त्यहाँ गरिने छलफलबाटै समस्याको समाधान गराउन सकिन्छ,’ उनले भने, ‘महानिर्देशक (सूर्य बहादुर खत्री) ज्यूको सफल कार्यकालको शुभकामना व्यक्त गर्न र विना प्रमाण व्यवसायीविरुद्ध पर्ने उजुरीहरुको न्यायोचित सम्बोधन हुन सकोस् भन्ने उदेश्यले विभागमा गएका हौं ।’ मेलमिलाप प्रक्रियामा नजाँदै उजुरी दर्ता गर्दा, सम्बन्धित पक्षहरुलाई थप समस्या सिर्जना हुने उनको भनाई छ । मेलमिलापको प्रयासले उजुरीहरुको संख्या घटाउन, कानूनी प्रक्रियालाई सहजीकरण गर्न, र व्यवसायीक वातावरणलाई शान्तिपूर्ण बनाउन सघाउ पुग्ने बस्नेतले बताए ।
आगामी दिनमा यस्ता परिस्थितिहरुलाई रोक्न र उजुरी दर्ता गर्नु अघि मेलमिलाप कक्षमा अनिवार्य छलफल गराउनुपर्ने व्यवस्था मिलाउन एशेसियसनले आग्रह गरेको छ । वैदेशिक रोजगार क्षेत्रको समय अनुकुलको सुधारले देशको दिगो विकास र आर्थिक समृद्धिमा महत्वपूर्ण भूमिका निर्वाह गर्ने भएकाले यसमा संलग्न व्यवसायीहरुलाई आवश्यक नीतिगत सहजीकरण र कानूनी संरक्षण प्रदान गर्नुपर्नेमा एशोसियसनले जोड दिएको छ । वैदेशिक रोजगारीका क्षेत्रमा रहेका समस्या र व्यवसायीहरुको कठीनाई हल गर्न सबै सरोकारवालासँग समन्वय र सहकार्यका साथ आफु अघि बढ्ने विभागका महानिर्देशक खत्रीबाट प्रतिवद्धता व्यक्त भएको महासचिव बस्नेतले जानकारी दिए ।
