उच्च शिक्षाको प्रमाणपत्र प्रस्ट नदेखिएको, चारित्रिक प्रमाणपत्र नभएको, पूरा अवधि तालिम नगरेको, तालिम प्रदायक संस्था सूचीकृत भएको नपाइएको, तालिम लिएको प्रमाणपत्रमा उल्लेख गरिएको मितिभन्दा पछि राहदानी जारी भएकोलगायतका कैफियत
काठमाडौं– इजरायलको दीर्घकालीन स्याहार केन्द्रमा सहायक कामदार (केयर गिभर)मा जान आवेदन दिएर लक्की ड्रमा सहभागी गराइएका १०० जनाभन्दा बढीको प्रमाणपत्रमा कैफियत भेटिएको छ । केयर गिभरका लागि आवेदन दिएका चार हजार २४ जनामध्ये वैदेशिक रोजगार विभागले छनोट गरेका तीन हजार ४६१ जनामाथि पनि श्रम, रोजगार तथा समाजिक सुरक्षा मन्त्रालयले गरेको छानबिनमा १०० जनाभन्दा बढीको प्रमाणपत्रमा कैफियत भेटिएको हो ।
केयर गिभरमा जान दिएको आवेदनमा नक्कली कागजात पेस गरेको भन्दै चौतर्फी प्रश्न उठेपछि मन्त्रालयले गत साउन २५ गते उपसचिव मेघनाथ रिमालको संयोजकत्वमा छानबिन समिति गठन गरेको थियो । उक्त समितिले तयार पारेको प्रतिवेदन मन्त्रालयमा बुझाउँदै छानबिनको क्रममा आवेदन दिएर छनोट सूचीमा परेका १०० जनाभन्दा बढीको प्रमाणपत्रमा कैफियत भेटिएको उल्लेख गरेको छ । प्रतिवेदन गत बिहीबार मन्त्रालयका सचिव मुकुन्दप्रसाद निरौलालाई बुझाइएको थियो ।
प्रतिवेदनमा कतिपयको उच्च शिक्षाको प्रमाणपत्र प्रस्ट नदेखिएको, चारित्रिक प्रमाणपत्र नभएको, पूरा अवधि तालिम नगरेको, तालिम प्रदायक संस्था सूचीकृत भएको नपाइएको, तालिम लिएको प्रमाणपत्रमा उल्लेख गरिएको मितिभन्दा पछि राहदानी जारी भएकोलगायतका कैफियत भेटिएको बताइएको छ । समितिले दिएको प्रतिवेदनअनुसार सामान्य त्रुटि भएकाहरुको संख्या १५० कै हाराहारीमा रहेको र गम्भीर त्रुटि गर्ने १०० जनाभन्दा बढी हुनसक्ने मन्त्रालयका सहसचिव एवं प्रवक्ता डण्डुराज घिमिरेले बताए ।
‘संख्या यत्ति नै भन्ने छैन, छानबिन समितिले दिएको प्रतिवेदनमाथि थप अध्ययन गरेपछि निश्चित संख्या छुट्याइने छ,’ उनले भने । प्रवक्ता घिमिरे विभागको महानिर्देशक हुँदा इजरायल रोजगारीका लागि दुई हजार केयर गिभरको आवेदन माग भएको थियो । जसमा चार हजार २४ जनाको आवेदन परे पनि कागजात अपुग भएका र शंकास्पद कागजात पेस गरेका ५६३ जनाको आवेदन रद्द गरिएको थियो । तत्पश्चात् विभागले तीन हजार ४६१ जनाको नाम छनोट गरेर गत साउन २१ गते ‘नेमचेक’ का लागि इजरायलको जनसंख्या तथा अध्यागमन प्राधिकरण (पिबा)लाई पठाएको थियो ।
विभागले पठाएको सूची समावेश गरी पिबाले लक्की ड्रमार्फत दुई हजार २०० जनाको नामावली छनोट भएको सार्वजनिक ग¥यो । यद्यपि मन्त्रालयको छानबिन चलिरहेकै समयमा पिबाले लक्की ड्र घोषणा गरे पनि छनोटमा परेकाहरुको सूची हालसम्म पनि नेपाललाई औपचारिकरुपमा उपलब्ध गराएको छैन । मन्त्रालयबाट प्रतिवेदनमाथि आवश्यक निर्णय गरेपछि पिबाले लक्की ड्रमार्फत छनोटमा परेकाहरुको सूची पठाउने प्रवक्ता घिमिरेले बताए । पिबाले लक्की ड्रबाट २२ सय जनाको नाम छनोट गरेकोमा ६० प्रतिशत महिला र ४० प्रतिशत पुरुष रहेको उल्लेख गरेको छ ।
मन्त्रालयले इजरायलमा केयर गिभरमा जान दिएका आवेदनहरुमा कैफियत देखिएको भन्दै छानबिन चलिरहेको बताएको छ । रोजगार व्यवस्थापन महाशाखाका प्रमुख एवं सहसचिव गोविन्दप्रसाद रिजालले एक विज्ञप्ति जारी गर्दै केयर गिभरका लागि परेका केही आवेदकहरुले पेस गरेका कागजातमा कैफियत देखिएकाले हाल छानविनको प्रक्रियामा रहेको उल्लेख गरेका छन् । छानबिन प्रक्रिया सम्पन्न भएपश्चात्मात्रै थप प्रक्रिया अगाडि बढाइने रिजालले बताए ।
-1752335779.jpg)
