काठमाडाैं - लिबर्टी माइक्रो लाइफ इन्स्योरेन्स लिमिटेडको विशेष साधारण सभा कम्पनीको प्रधान कार्यालय न्यूरोड–०८, पोखरामा बिहीबार सम्पन्न भएको छ । साधारण सभामा बाइस लाख पचास हजारकाे शेयर संख्या सर्वसाधारणका लागि खुल्ला गर्ने लिबर्टी माइक्रो लाइफ इन्स्योरेन्सले जनाएकाे हाे ।
विशेष साधारण सभाको अध्यक्षता संचालक समितिका अध्यक्ष निकोलस पाण्डेले गरेका थिए । विशेष साधारण सभामा कम्पनीका अध्यक्ष लगायत संचालकज्यूहरु, शेयरधनी, शेयरधनीका प्रतिनिधि, कम्पनी सचिव, कम्पनीका प्रमुख कार्यकारी अधिकृत लगायत कम्पनीका कर्मचारीहरुको उपस्थिति रहेको थियो ।
कम्पनीको विशेष साधारण सभामा सञ्चालक समितिको तर्फबाट अध्यक्ष निकोलस पाण्डेले कम्पनीको जारी पूंजी अन्र्तगत सर्वसाधारण समूहका लागि छुट्टाइएको ३० प्रतिशत रकम रु.२२,५०,००,०००/– अक्षरेपी बाईस करोड पचास लाखको प्रति कित्ता अंकित मूल्य रु.१००/– का दरले हुने जम्मा शेयर संख्या २२,५०,००० (बाइस लाख पचास हजार) प्रचलित कानूनको अधिनमा रही प्राथमिक सार्वजनिक निष्काशनमार्फत सर्वसाधारणका लागि निष्काशन गर्ने सम्बन्धि प्रस्ताव उपर छलफल भई पारित गरे ।
त्यसै गरी प्राथमिक सार्वजनिक निष्काशनमार्फत बिक्रिबाट प्राप्त हुने रकम रु.२२.५० करोड रुपैया श्री नेपाल बीमा प्राधीकरणबाट लघु जीवन बीमा कम्पनीहरुका लागि जारी निर्देशिकाको अधीनमा रही लगानी गरी उपयोग गरिने निर्णय पारित गरे । सोही विशेष साधारण सभाबाट निष्काशन गर्नका लागि आवश्यक पर्ने सम्पूर्ण कार्य गर्न संचालक समितिलाई अख्यितारी प्रदान गर्ने कुरा सर्वसम्मतिबाट पारित गरे ।
