काठमाडौं– वैदेशिक रोजगार विभागले गत आर्थिक वर्ष २०८०/८१ मा रोजगारसम्बन्धी गरेको कार्यसम्पादन तथा प्रगति विवरण सार्वजनिक गरेको छ । विभागले एक वर्षमा प्रदान गरिएको श्रम स्वीकृति विवरण, प्रशासनसम्बन्धी प्रगति विवरण, उद्धार, राहत तथा समन्वय, मुद्दा तथा अनुसन्धान, संस्था दर्ता शाखाको क्रियाकलाप, अनुगमन तथा अभिमुखीकरणसम्बन्धी गतिविधिको प्रगति प्रतिवेदन सार्वजनिक गरेको हो ।
विभागले सार्वजनिक गरेको तथ्यांकअनुसार एक वर्षको अवधिमा सात हजार ७६३ व्यक्तिले वैदेशिक रोजगारीको नाममा ठगिएको भन्दै विभागमा उजुरी हालेका छन् । यसरी उजुरी गर्नेमध्ये तीन हजार ८३७ उजुरी फस्र्योट भएको विभागले उल्लेख गरेको छ ।
यस्तै वैदेशिक रोजगारीको नाममा ठगिएको भन्दै उजुरीकर्ताले ३० करोड ९३ लाख ८९ हजार ५१२ रुपैयाँ बराबरको रक असुली गर्नुपर्ने दाबी गरेका छन् । त्यसैगरी एक वर्षको अवधिमा उद्धार, राहत तथा समन्वय शाखामा एक हजार ४४२ उजुरी परेका छन् । तीमध्ये १७३ जनाको उद्धार गरिएको र दुई हजार ४४४ जनालाई क्षतिपूर्ति उपलब्ध गराइएको विभागले जनाएको छ ।
त्यस्तै मुद्दा तथा अनुसन्धान शाखामा दुई हजार ९१६ उजुरी परेका छन् । ती मध्ये ४५५ उजुरीमा मिलापत्र गराइएको छ भने ३९० वटा मुद्दा अदालतमा पठाइएको विभागले उल्लेख गरेको छ । यसैगरी प्रहरी शाखामा तीन हजार ४०५ उजुरी परेका छन् । ती मध्ये ८६ को मात्रै मिलापत्र गराइएको छ भने प्रहरीकहाँ परेका उजुरीमध्ये दुई हजार २१७ उजुरी फस्र्योट भएका छन् । जसमा क्षतिपूर्तिबापत एक करोड ७६ लाख एक हजार ६९८ रुपैयाँ असुल गरिएको छ ।
यतिमात्र नभई एक आर्थिक वर्षमा जिटुजी सम्झौतामार्फत सरकारले कोरिया, इजरायल र बेलायतमा ११ हजार ९०१ जना श्रमिक पठाएको छ भने म्यानपावरमार्फत तीन लाख ५३ हजार १६३ जना वैदेशिक रोजगारीका लागि विदेशिएको विभागले जनाएको छ । पुनः श्रम स्वीकृति लिएर जानेको संख्या दुई लाख ८१ हजार १९५ र व्यक्तिगत श्रम स्वीकृति लिएर जाने ९५ हजार ३८ जना रहेका छन् ।
यस्तै वैदेशिक रोजगार पूर्वप्रस्थान अभिमुखीकरण तालिम दिने १३७ वटा संस्था नवीकरण भएका छन् । यस अवधिमा ६२ वटा नयाँ म्यानपावर कम्पनी दर्ता भएका छन् भने ४३ वटाको दर्ता खारेजी तथा धरौटी फिर्ता गरेको विभागले जनाएको छ । त्यसैगरी ४२७ वटा इजाजतपत्र प्राप्त म्यानपावर कम्पनीको नवीकरण भएको छ ।
जिटकोमा सूचीकरण भएका ४७४ वटा म्यानपावर पनि नवीकरण भएका छन् । त्यस्तै ८९ वटा म्यानपावर कम्पनीमाथि आकस्मिक अनुगमन गरिएको छ भने १४ वटालाई निलम्बन गरी कारोबारमा बन्देज लगाइएको छ । एक वर्षमा २०७ वटा अभिमुखीकरण तालिम प्रदायक संस्थामाथि अनुगमन गरिएको विभागले उल्लेख गरेको छ ।
-1752335779.jpg)
