काठमाडौं– दक्षिण कोरिया उत्पादनमूलक क्षेत्रका लागि नेपाली कामदार लैजान लिइएको दोस्रो चरणको इपिएस कोरियन भाषा परीक्षामा झण्डै नौ हजार नेपाली परीक्षार्थी सफल भएका छन् । वैदेशिक रोजगार विभागअन्तर्गतको इपिएस कोरिया शाखाका अनुसार एचआरडी कोरिया शाखाले सार्वजनिक गरेको दोस्रो चरणको नतिजामा आठ हजार ९६५ परीक्षार्थी उत्तीर्ण भएका छन् ।
एचआरडी कोरिया शाखाले गएको वैशाख ३१ गतेदेखि साउन १६ गतेसम्म लिएको परीक्षामा ७९ हजार ९३७ जना सहभागी भएका थिए । जसअनुसार परीक्षामा सहभागीमध्ये ११.२१ प्रतिशतमात्र उत्तीर्ण भएका छन् । इपिएस कोरिया शाखाले दोस्रो चरणको परीक्षामा उत्तीर्ण भएकाहरुले अर्को सीप परीक्षण (स्किल टेस्ट) र ‘कम्पिटेन्सी टेस्ट’ लिनुपर्ने जनाएको छ ।
सीप परीक्षण र कम्पिटेन्सी टेस्टको लागि यही साउन २३ गते बेलुका पाँच बजेसम्म परीक्षार्थीले आफ्नो सक्कल पासपोर्ट र प्रवेशपत्रसहित कागजात संलग्न गरी फाराम भरेर कार्यालयमा बुझाउनुपर्ने छ । अन्यथा परीक्षास्थलमा प्रवेश नगराइने कोरिया शाखाले जनाएको छ । सीप परीक्षण र कम्पिटेन्सी टेस्टमा सहभागी नहुने परीक्षार्थीको नाम उत्पादनमूलक क्षेत्रको भाषा परीक्षाको उत्तीर्ण सूचीमा समावेश नगराइने पनि शाखाले जनाएको छ ।
उत्पादनमूलक क्षेत्रमा जानका लागि एक लाख ६३ हजार ६३५ जनाले आवेदन फाराम भरेका थिए । जसमध्ये पहिलो चरणको भाषा परीक्षामा ४० हजार ५८० जना सहभागी भए पनि छ हजार ३२१ जनामात्रै उत्तीर्ण भएका थिए । यसैगरी आगामी कात्तिक २६ गतेदेखि पुस २ गतेसम्म लिइने तेस्रो चरणको परीक्षामा ३६ हजार १७९ जना परीक्षार्थी सहभागी हुने इपिएस शाखाले जनाएको छ ।
रोजगारीको आकर्षक गन्तव्य मानिएको दक्षिण कोरियामा जिटुजी सम्झौताअनुसार इपिएस प्रणालीमार्फत नेपाली श्रमिक पठाउने व्यवस्था छ । त्यसका लागि भाषा परीक्षा अनिवार्य उत्तीर्ण भएको हुनुपर्छ । गत वर्षदेखि भाषा परीक्षा पास गरी सीप परीक्षणमा उत्तीर्ण भएकालाई मात्र रोजगारीमा लैजाने सूचीमा राखी प्रक्रिया अगाडि बढाउने गरिएको छ ।
-1752335779.jpg)
