काठमाडौं– इजरायलमा दीर्घकालीन स्याहार केन्द्रमा सहायक कामदार (केयर गिभर) का लागि जान आवेदन दिँदा पेस गरिएको तालिम प्रमाणपत्र नक्कली भएको आशंका गरिएको छ । वैदेशिक रोजगार विभागले यही साउन ११ गतेसम्म प्राप्त आवेदन तथा कागजातहरुमाथि अध्ययन गरी इजरायल जाने केयर गिभरको छनोट प्रक्रिया अगाडि बढाउने क्रममा केही आवेदकहरुले नक्कली प्रमाणपत्र पेस गरेको हुनसक्ने आशंका गरिएको हो ।
विभागले गत असार ११ गते सूचना निकालेर केयर गिभरका लागि आवेदन आह्वान गरेकोमा चार हजार २४ जनाले अनलाइनमार्फत आवेदन दिएका थिए । जसमा दुई हजार २०९ जना पुरूष र एक हजार ८१५ जना महिला रहेका विभागले जनाएको छ । छनोट प्रक्रियामा रहेका केही आवेदनहरु अस्वीकृत भएको विभागका एक अधिकारीले जानकारी दिए । उनका अनुसार आवेदन दिनेहरुमा केहीले केयर गिभरका लागि चाहिने तालिमसम्बन्धी तीन महिने कोर्शको प्रमाणपत्र नक्कली पेस गरेको आशंकामा छानबिन थालिएको छ ।
‘विभागले प्राप्त आवेदनहरुमाथि गम्भीररुपमा छानबिन तथा अध्ययन गरिरहेको छ,’ ती अधिकारीले भने, ‘नक्कली प्रमाणपत्र पेस गरेको आशंकामा केयर गिभरको तालिम प्रदान गर्न अनुमति प्राप्त तालिम प्रदायक संस्थाहरु र सिटिइभिटीद्वारा मान्यताप्राप्त संस्थालाई स्थापनादेखि हालसम्म तालिम लिएका प्रशिक्षार्थीहरूको विवरण माग गरिएको छ ।’
यसअघि विभागले केयर गिभरसम्बन्धी तालिमको प्रमाणपत्र किनबेच हुनसक्ने भन्दै सम्बन्धित संस्थाहरुसँग तालिम लिएका प्रशिक्षार्थीहरूको विवरण माग गरेको थियो । ती संस्थाहरुले विभागमा पेस गरेको विवरण र प्राप्त निवेदनहरुमा समावेश गरिएको प्रमाणपत्रको संख्याबीच अन्तर देखिएको बताइएको छ । ‘तालिमप्रदायक संस्थाहरुबाट पुनः विवरण माग गरिएको छ, सबै विवरण आएपछि कति आवेदकले नक्कली प्रमाणपत्र पेस गरेका रहेछन् भन्ने थाहा हुने छ,’ विभाग स्रोतले भन्यो, ‘कतिपयले हामीले पेस गरेको संख्यामा छुट भएछ भन्दै थप विवरण पनि पठाएका छन्, ती शंकास्पद हुन सक्छन् ।’
केयर गिभरका लागि प्राप्त आवेदनहरु प्रमाणीकरण गर्ने क्रम जारी रहेको विभागका महानिर्देशक डण्डुराज घिमिरेले बताए । प्रमाणीकरण गरेपछिमात्रै आवेदन स्वीकृत हुने उनले बताए । आवश्यक कागजात नपुगेका आवेदनहरु स्वीकृत नहुने उनले प्रस्ट पारे । नक्कली प्रमाणपत्रका सम्बन्धमा पनि कुरा उठिरहेको उनको भनाइ छ । महानिर्देशक घिमिरेले यस विषयमा विभाग गम्भीर रहेको बताए ।
‘विभिन्न विधि, प्रक्रिया अपनाएर आवेदनसँगै पेस गरिएका कागजात नक्कली हुन् कि सक्कली भन्ने छुट्याउन सम्बन्धित टिमले काम गरिरहेको छ,’ उनले भने, ‘कुनै पनि कागजातमा शंका लाग्नेबित्तिकै छानबिनका लागि आवश्यक प्रक्रिया अपनाइने छ ।’
विभागले इजरायबाट माग भएअनुसार केयर गिभरमा दुई हजार जनाका लागि आवेदन आह्वान गरेको थियो । जसमा एक हजार मुख्य उम्मेदवार र एक हजार वैकल्पिक उम्मेदवार रहने उल्लेख गरिएको छ । विभागले सुरुमा ८०० जनाका लागि आवेदन माग गरे पनि पछि इजरायलले कोटा थप गरेसँगै दुई हजार पु¥याएको हो ।
