काठमाडौं – संयुक्त अरब इमिरेट्स (युएई)का लागि अवुधावीस्थित नेपाली राजदूतावासले विगत केही दिनदेखि नेपालबाट श्रम स्वीकृति लिएर वा नलिएरै युएईका विभिन्न इमिरेट्समा नेपाली युवायुवती ल्याएर ठगी गर्ने क्रम बढेको बताएको छ । दूतावासले एक विज्ञप्ति जारी गर्दै आकर्षक तलबमा युएईका ठूला कम्पनीमा काम लगाइदिने भनी प्रलोभन तथा अश्वासन दिलाएर भिजिट भिसामा व्यक्तिलाई युएई पु¥याउने र आर्थिक शोषणमा पार्ने गरेको उल्लेख गरेको छ ।
कतिपय कन्सल्टेन्सीहरुले ‘टिकटक’मार्फत प्रचारप्रसार गरी युरोपलगायतका अन्य राष्ट्रहरुमा आकर्षक तलब सुविधा देखाई प्रलोभनमा पारेर नेपालीले नै नेपालीलाई गरी ठगी गर्ने क्रम बढेको दूतावासले उल्लेख गरेको छ । ‘शिक्षित युवा युवतीलाईसमेत युएईमा केही समयको बसाइँपछि युरोप अमेरिकालगायतका राष्ट्रमा पठाइदिने भन्दै सपना देखाएर ठूलो रकम असुल गर्ने गरेको, नेपालस्थित म्यानपावरले जानकारी गराएका कम्पनीले उपलब्ध गराउने तलब तथा सेवा सुविधाबारे सर्तहरु स्वीकार गरी विभिन्न म्यानपावरबाट युएईका विभिन्न कम्पनीमा काम गर्न आउने र कम्पनीमा करार सम्झौता गरी काम गर्न थालेको महिना दिन नपुग्दै सर्तबमोजिमका काम गर्न इन्कार गरी विनासूचना कम्पनी छाडी भागी एजेन्टको प्रलोभनमा परी फसेको र नेपाल सरकारले तय गरेको भिजिट भिसाका सम्पूर्ण सर्तहरु स्वीकार गरी युएई प्रवेशपश्चात् दलालले फसाएको जस्ता गुनासाहरुप्रति यस दूतावासको गम्भीर ध्यानाकर्षण भएको छ,’ दूतावासको विज्ञप्तिमा उल्लेख छ ।
उल्लिखित कार्यमा ह्युमन रिसोर्स कन्सल्टेन्सी, इजाजतवाला म्यानपावर, मेनपावरका प्रतिनिधि बताउने तथा युएईस्थित स–साना कम्पनीका सञ्चालक र एजेन्टसमेत संलग्न रहेको बुझिन आएको दूतावासले जनाएको छ । यसरी अनधिकृतरुपमा विभिन्न षड्यन्त्र तथा जालझेलबाट हुने ठगी तथा आर्थिक शोषणबाट बच्न भिजिट भिसामा आउनुभन्दा अघि सोसम्बन्धी आधारभूत कुराहरुबारे स्पष्टसँग जानकारी लिन पनि दूतावासले सम्बन्धित सबैमा अनुरोध गरेको छ ।
भिजिट भिसामा वा श्रम स्वीकृति लिएर आएका व्यक्तिहरुले युरोपका विभिन्न मुलुकहरु तथा अमेरिकालगायतका अन्य राष्ट्रमा रोजगारीका लागि जाने विषयमा विद्यमान कानुनविपरीत व्यवस्था हुने भएकोले आधिकारिक निकायबाट सूचना तथा वास्तविकता बुझेरमात्र आफ्नो भिसा प्रोसेसिङ बढाउन र बैंकिङ च्यानलबाट मात्र आर्थिक कारोबार गर्न सुझाइएको छ । अन्यथा कुनै समस्या परिश्रम शोषण, शारीरिक समस्या तथा अनधिकृत माध्यमबाट आर्थिक कारोबार गरी जोखिम व्यहोर्नुपरेको खण्डमा व्यक्ति स्वयं जिम्मेवार हुने दूतावासले उल्लेख गरेको छ ।
