काठमाडौं– चालु आर्थिक वर्षमा म्यानपावर कम्पनीमार्फत तीन लाख ३५ हजार ९९७ नेपाली वैदेशिक रोजगारीका लागि विभिन्न मुलुक गएको तथ्यांक सार्वजनिक भएको छ । वैदेशिक रोजगार विभागले यही असार १२ गतेसम्मको तथ्यांक सार्वजनिक गर्दै उक्त जानकारी दिएको हो । उनीहरुलाई ९२२ वटा म्यानपावर कम्पनीले विभिन्न मुलुकमा पठाएका हुन् ।
यसरी वैदेशिक रोजगारीमा गएकामध्ये दुई लाख ९९ हजार ८३३ पुरुष र ३६ हजार १४६ महिला रहेको विभागले उल्लेख गरेको छ । विभागले व्यक्तिगत तथा पुनः श्रम स्वीकृति लिएर विदेश गएका कामदारको संख्या भने यसमा समावेश गरिएको छैन । विभागले सार्वजनिक गरेको विवरणअनुसार एउटा म्यानपावरले झण्डै एक वर्षको अवधिमा एक जनादेखि सात हजारभन्दा बढी कामदारलाई रोजगारीका लागि विदेश पठाएका छन् । एकदेखि १० जना कामदार पठाउने म्यानपावरको संख्या ३८ रहेको छ भने ७७ वटाले एक हजारभन्दा बढी कामदार पठाएका छन् । एक जनामात्रै कामदार पठाउने म्यानपावर पाँचवटा रहेका छन् ।
चालु आवको अन्तिम महिना अर्थात् असारको दोस्रो हप्तासम्म नील कमल ह्युमन रिसोर्स प्रालिले सबैभन्दा बढी कामदार विदेश पठाएको छ । यस कम्पनीमार्फत सात हजार १३ जना नेपाली वैदेशिक रोजगारीमा गएका छन् । दोस्रो स्थानमा रहेको एसओएस म्यानपावर सर्भिस प्रालिबाट पाँच हजार ५५५ जना गएका छन् । त्यस्तै तेस्रो स्थानमा परेको एयर किंग्स प्लेसमेन्ट प्रालिले तीन हजार ८३७ जनालाई वैदेशिक रोजगारीमा पठाएको छ । यसैगरी चौथो स्थानमा रहेका प्याराडाइज इन्टरनेसनल प्रालिबाट तीन हजार ६०८ जना गएका छन् भने पाँचौं स्थानमा परेको दि रिभर ओभरसिज प्रालिले तीन हजार ५९७ जना कामदार पठाएको विभागको तथ्यांकले देखाएको छ ।
छैटौंमा रहेको साउण्डलाइन्स रिक्रुटमेन्ट प्रालिबाट तीन हजार ५६०, सातौंमा रहेको इन्टरनेसनल म्यानपावर रिक्रुटमेन्ट प्रालिबाट तीन हजार ५५४, आठौंमा रहेको सपोर्ट ह्युमन रिसोर्स प्रालिबाट तीन हजार ३३६, नवौंमा रहेको गल्फ म्यानपावर सर्भिस प्रालिबाट दुई हजार ९२७ र दशौं स्थानमा रहेको एड्भान्स म्यानेजमेन्ट कन्सल्ट्यान्टस् प्रालिबाट दुई हजार ८९० जना नेपाली रोजगारीका लागि विदेसिएका छन् ।
यसैबीच एक आर्थिक वर्षमा १०० जना कामदार विदेश पठाउन नसक्ने म्यानपावरको नवीकरण नभई खारेजीमा जाने कानुनी व्यवस्था भएकाले २०० भन्दा बढी म्यानपावर संकटमा देखिएका छन् । ती संस्थाहरुको नवीकरणमा सरकारले सहजीकरण गरिदिनुपर्ने व्यवसायीहरुले माग गर्दै आएका छन् । यसअघि पनि सरकारले १०० जना कामदार विदेश पठाउन नसक्ने म्यानपावर कम्पनीलाई नवीकरणको अवसर दिँदै आएको थियो ।
