काठमाडौं – वैदेशिक रोजगारीका क्रममा ७० प्रतिशतभन्दा बढी नेपाली व्यक्तिगत ठगीमा पर्ने गरेको तथ्यांक बाहिर आएको छ । मानवअधिकारका लागि जनमञ्च (पिपुल फोरम)ले सार्वजनिक गरेको पछिल्लो वर्षको प्रतिवेदनामा वैदेशिक रोजगारीका नाममा ७० प्रतिशतभन्दा बढी ठगी व्यक्तिगतरुपमा भएको देखिएको हो ।
पिपुल फोरमले म्यानपावर कम्पनीबाट भन्दा बढी ठगी व्यक्तिगतरुपमा भइरहेको उल्लेख गरेको छ । फोरमको तथ्यांकअनुसार ७०.७५ प्रतिशत व्यक्तिमार्फत र म्यानपावरमार्फत २९.२५ प्रतिशत नेपाली वैदेशिक रोजगारीको नाममा ठगिएका छन् । उल्लिखित तथ्यांक वैदेशिक रोजगारीका क्रममा समस्यामा परी पिपुल फोरमबाट निःशुल्क कानुनी सहायता लिएका पीडितहरुलाई आधार मानेर तयार पारिएको बताइएको छ ।
फोरमले चालु आर्थिक वर्षको हालसम्म दुई हजार ४०४ जनालाई निःशुल्क कानुनी सहायता प्रदान गरेको जनाएको छ । उल्लिखित संख्याका व्यक्तिबाट चार करोड ३३ लाख ५२ हजार रुपैयाँ ठगी भएको फोरमले उल्लेख गरेको छ । निःशुल्क कानुनी सहायता दिन थालेयता ३५ हजार ७३६ जनाले सेवा प्राप्त गरेको फोरमले जनाएको छ । जसमा एक अर्ब तीन करोड ३२ लाख रुपैयाँभन्दा बढी रकम ठगी भएको उल्लेख गरिएको छ ।
फोरमले लामो समयदेखि वैदेशिक रोजगारीमा समस्या परेकाहरूलाई निःशुल्क कानुनी सहायता प्रदान गर्दै आएको कार्यक्रम संयोजक एवं अधिवक्ता सुदीप देवकोटाले बताए । उनका अनुसार तोकिएभन्दा कम तलब, फरक काम, तोकिएको सेवासुविधा नपाउने, चर्को रकम असुलेर वैदेशिक रोजगारीमै नपुर्याउने, काम लगाइदिन्छु भनेर पैसा लिएर पासपोर्ट पनि जफत गरेर राख्नेलगायत समस्या लिएर आउनेको संख्या अत्यधिक रहेको छ । पछिल्लो समय सामाजिक सञ्जालबाट ठगी गर्नेहरु बढ्दै गएको उनले बताए ।
